上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以斯拉記
回復敬拜
3:1 以色列人佇家己的故鄉攏安頓好勢。七月，人民同心一意聚集佇耶路撒冷。
3:2 約薩達的子耶書亞及伊的祭司同伴，撒拉鐵的子所羅巴伯及伊的親族，攏起來起造以色列上帝的祭壇，欲照上帝重用的人摩西的律法，佇祭壇頂面獻燒化祭。
3:3 雖然𪜶驚當地的住民，𪜶猶原佇本來的所在重建祭壇，閣早暗佇彼頂面獻燒化祭互上主。
3:4 𪜶嘛照律法的記載守搭寮節，逐日照規定的數目獻燒化祭。
3:5 另外，𪜶獻經常啲獻的燒化祭、每月初一的祭，及上主分別作聖的節期的祭，以及逐個人甘心獻互上主的祭。
3:6 雖然上主的聖殿猶未重建，毋拘對七月初一起，𪜶就開始獻燒化祭互上主。
開始重建聖殿
3:7 𪜶用銀互拍石師傅及作木師傅，閣用糧食、酒，及油互西頓人及泰爾人，互𪜶將柏香樹對黎巴嫩用海運送到約帕；諸個代誌攏有得著波斯皇帝塞魯士的許可。
3:8 𪜶到耶路撒冷上帝聖殿的第二年二月，撒拉鐵的子所羅巴伯、約薩達的子耶書亞，及其他的祭司同伴、利未人，以及所有流放倒來耶路撒冷的人，攏開始起上主的聖殿；𪜶派二十歲以上的利未人做督工。
3:9 對按呢，猶大的後代，就是耶書亞及伊許個子及親族、甲篾及伊的子，以及利未人希拿達的子及孫，及𪜶的親族，攏做夥負責監督重建上帝聖殿的工程。
3:10 起厝師傅下上主聖殿的地基的時，祭司穿禮服歕喇叭，亞薩的後代利未人拍鈸，攏照以色列王大闢的規定，徛啲稱讚上主。
3:11 𪜶有的唱有的和，謳咾感謝上主，講：
上主至善，
伊對以色列的慈愛續到永遠。
𪜶稱讚上主的時，眾人大聲喝，因為上主聖殿的地基已經下好勢。
3:12 有真多祭司、利未人，及逐族的族長，就是許個曾看著以前的聖殿的老人，現在親目看著下此間殿的地基，就大聲哮；閣有真多人因為歡喜大聲喝。
3:13 人民分𣍐清是歡呼的聲抑是啼哭的聲；人民大聲喝的聲真遠攏聽會著。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。