上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
約瑟解夢
40:1 諸個代誌以後，埃及王的酒政長及廚房長得罪𪜶的主埃及王。
40:2 埃及王對此兩個人臣非常受氣，
40:3 將𪜶關佇侍衛長府內的監，就是關約瑟的所在。
40:4 侍衛長將𪜶交代約瑟，約瑟就侍候𪜶；𪜶佇監裡已經有一段時間。
40:5 互埃及王關佇監裡的酒政長及廚房長，仝一暝各做一個夢；𪜶的夢攏有無像的意思。
40:6 到天光，約瑟入去𪜶遐，看著𪜶憂頭結面。
40:7 約瑟就問及伊做夥關佇主人府內監裡彼兩個人臣，講：「今仔日恁哪會面帶憂容？」
40:8 𪜶給伊講：「阮兩個攏有夢著夢，無人會曉給阮解夢。」
約瑟給𪜶講：「解夢的才能是上帝所賜的。請給我講恁的夢。」
40:9 酒政長就對約瑟講伊的夢，講：「我夢中看見佇我的面頭前有一欉葡萄樹；
40:10 樹頂有三枝樹椏，拍莓，開花，就結歸葩成熟的葡萄。
40:11 我提埃及王的杯，閣提葡萄，淀汁佇杯裡，將杯捧互王。」
40:12 約瑟給伊講：「你的夢的意思是按呢：三枝樹椏就是三日。
40:13 三日內，埃及王欲將你對監獄導出去，給你復職；你欲閣捧伊的酒杯，回復以前做酒政長的職位。
40:14 你亨通的時，請你著會記得我，好款待我；佇王的面前替我講一聲，救我出監。
40:15 我實在是對希伯來人的所在互人賣來的；我佇遮嘛無做什麼代誌通互𪜶給我關佇監牢。」
40:16 廚房長看著約瑟解夢解了真好，就給約瑟講：「我嘛有夢著佇我的頭殼頂有三籃的白麵包；
40:17 頂面彼個籃仔有貯埃及王欲食的逐款物件；有鳥仔來啄我頭殼頂籃仔內的食物。」
40:18 約瑟應伊講：「你的夢的意思是按呢：三個籃就是三日。
40:19 三日內，埃及王欲將你對監獄導出去，斬你的頭，閣給你吊佇柴架，飛鳥會來啄你身軀的肉。」
40:20 到第三日，抵抵是埃及王的生日，伊辦桌請所有的人臣。王將酒政長及廚房長對監獄帶出來，互𪜶徛佇眾人臣的面前。
40:21 埃及王給酒政長復職，互伊猶原捧杯服事埃及王，
40:22 毋拘將廚房長吊死，攏照約瑟所給𪜶講的。
40:23 總是酒政長無想著約瑟，竟然給伊𣍐記得。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。