上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志下
猶大王瑪拿西
33:1 ( 王下 21:1-9 )
瑪拿西坐位的時十二歲，佇耶路撒冷作王五十五年。
33:2 伊做上主看做歹的事，學許個互上主佇以色列面前趕出的列國所做可惡的事。
33:3 伊重建伊的老父希西家所毀壞的山頭壇，為巴力起祭壇，造亞舍拉的柱像，閣敬拜服事天頂的萬象。
33:4 伊佇上主的殿內為著許個神明起幾若個壇；上主曾指此個聖殿，講：「我的名應該永遠佇耶路撒冷受敬奉。」
33:5 瑪拿西佇上主的殿兩個埕內面，為著天頂的萬象起祭壇。
33:6 伊佇欣嫩子山谷燒伊的子獻做祭，卜卦，行法術，行邪術，問牽亡的及童乩桌頭，做真多上主看做歹的事，激上主受氣。
33:7 瑪拿西閣佇上帝的殿內𫞼雕刻的偶像。關係此間聖殿，上帝曾對大闢及伊的子所羅門講：「此間聖殿及耶路撒冷，是我佇以色列支族中所揀選的，我的名著佇遮永遠受敬奉。
33:8 以色列人若聽趁我所有的命令，就是我通過摩西所傳一切的教示、規例，及誡命，我就無閣互𪜶對我所賞賜𪜶列祖的土地受遷徙。」
33:9 毋拘瑪拿西導猶大及耶路撒冷的住民做歹，比上主佇以色列人面前所毀滅的列國閣較嚴重。
瑪拿西悔改
33:10 上主警戒瑪拿西及伊的人民，毋拘𪜶毋聽。
33:11 所以上主互亞述王的軍長來攻擊𪜶，用鉤仔鉤瑪拿西，用銅鍊縛伊，給伊帶去巴比倫。
33:12 伊佇困苦的時就懇求上主 — 伊的上帝，閣佇伊列祖的上帝面前非常謙卑。
33:13 伊求叫上帝，上帝就聽伊的懇求，互伊倒來耶路撒冷，回復伊的統治。瑪拿西才知上主是上帝。
33:14 後來，瑪拿西佇大闢城的城外，對基訓泉附近的山谷，向北到魚門及俄斐勒地區，起真高的城牆，閣設立軍長防守猶大許個堅固的城。
33:15 伊廢除上主聖殿內面許個外族的神明及偶像，拆毀伊佇上主聖殿的山及耶路撒冷起的壇，將諸個攏㧒佇城外。
33:16 伊閣修建上主的祭壇，佇壇頂獻平安祭、謝恩祭，命令猶大人服事上主 — 以色列的上帝。
33:17 人民猶原佇山頭壇獻祭，毋拘只有獻互上主 — 𪜶的上帝。
瑪拿西死
33:18 ( 王下 21:17-18 )
瑪拿西其他的事蹟，伊對上帝的祈禱，及先見奉上主 — 以色列的上帝的名對伊警戒的話，攏記載佇《以色列列王史》。
33:19 伊的祈禱，及上帝對伊的應答，以及伊猶未悔改以前的罪過過失，及伊佇什麼所在起山頭壇，𫞼亞舍拉柱像及偶像，攏記載佇何賽的冊。
33:20 瑪拿西轉去伊的列祖遐，人將伊安葬佇伊家己的宮內。伊的子亞們續接伊作王。
猶大王亞們
33:21 ( 王下 21:19-26 )
亞們坐位的時二十二歲，佇耶路撒冷作王兩年。
33:22 伊做上主看做歹的事，親像伊的老父瑪拿西所做的。亞們對伊的老父瑪拿西所造的偶像獻祭，閣服事𪜶。
33:23 伊無親像伊的老父瑪拿西佇上主的面前家己謙卑。此個亞們犯罪愈來愈嚴重。
33:24 伊的人臣背叛伊，佇王宮內面給伊刣死。
33:25 毋拘國內的人民將許個背叛亞們王的人刣死，設立伊的子約西亞續接伊作王。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。