上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志下
21:1 約沙法轉去伊的列祖遐，及伊的列祖安葬佇大闢城；伊的子約蘭續接伊作王。
猶大王約蘭
21:2 ( 王下 8:17-24 )
約蘭有幾若個小弟，就是約沙法的子亞撒利雅、耶歇、撒迦利亞、亞撒列夫、米迦勒、示法提雅；𪜶攏是猶大王約沙法的子。
21:3 𪜶的老父用真多金、銀、寶貝，及猶大地堅固的城做禮物互𪜶，毋拘將國位交互約蘭，因為伊是大子。
21:4 約蘭一下起來治理伊老父的國，就加強伊的統治，刣死伊所有的小弟，及以色列幾若個首領。
21:5 約蘭坐位的時三十二歲，佇耶路撒冷作王八年。
21:6 伊行以色列諸王的路，所做的及亞哈家仝款；因為伊娶亞哈的查某子做某，做上主看做歹的事。
21:7 毋拘上主因為伊及大闢所立的約，毋甘滅大闢的家。上主照伊的應允，永遠賞賜一葩燈互大闢及伊的子孫。
21:8 約蘭作王的時，以東背叛猶大，脫離猶大的統治，設立𪜶家己的王。
21:9 約蘭就導伊的軍官及所有的戰車過去。以東人給𪜶包圍。暝時約蘭及戰車長起來反擊。
21:10 按呢以東人背叛猶大，脫離猶大的統治到今仔日。像彼時，立拿嘛脫離約蘭的統治，因為伊棄拺上主 — 伊列祖的上帝。
21:11 伊閣佇猶大的山起山頭壇，互耶路撒冷的住民行邪淫，互猶大人行偏路。
21:12 先知以利亞寫批互約蘭，講：「上主 — 你的祖先大闢的上帝按呢講：『因為你無行猶大王，你的老父約沙法及阿公亞撒的路，
21:13 顛倒去行以色列諸王的路，閣互猶大及耶路撒冷的住民行邪淫，親像亞哈家的所做；你閣刣死你老父的家許個比你較好的小弟。
21:14 所以上主欲降大災禍拍你的人民，及你的子兒、你的某，以及你一切所有的。
21:15 你的腸仔欲犯著重病，愈來愈嚴重，致到墜落來。』」
21:16 上主激動非利士人及倚近古實的阿拉伯人，來攻打約蘭。
21:17 𪜶上來攻擊猶大，侵入國境，搶奪王宮內面所有的財物，及伊的子伊的某；只有留煞尾子亞哈謝一個。
21:18 諸個代誌以後上主拍約蘭，互伊的腸仔犯著𣍐醫得的病。
21:19 按呢拖兩年，伊的腸仔墜落來，病重就死。伊的人民無起火記念伊，無親像以前為著伊的祖先所做的。
21:20 約蘭坐位的時三十二歲，佇耶路撒冷作王共八年。伊離開世間無人為著伊悲哀；人將伊安葬佇大闢城，毋拘無及列王埋做夥。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。