上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
猶大及她瑪
38:1 大約彼個時，猶大離開伊的兄弟，去住佇亞杜蘭人希拉的厝附近。
38:2 猶大佇遐看著迦南人書亞的查某子，就娶伊，及伊同房。
38:3 伊就懷孕生子；猶大給囝仔號名叫做珥。
38:4 伊閣懷孕生子；嬰仔的老母給伊號名叫做俄南。
38:5 伊閣生一個子，就給伊號名叫做示拉；示拉出世的時，猶大抵仔佇基悉。
38:6 猶大給伊的大子珥娶她瑪做某。
38:7 猶大的大子珥做上主看做歹的事，上主就互伊死。
38:8 猶大給俄南講：「你著及你的兄嫂同房，對伊盡你做小弟的本分，給你的兄哥生後嗣。」
38:9 俄南知，伊生的子𣍐當歸伊家己，所以同房的時，射精佇土腳，無欲互伊的兄哥有後嗣。
38:10 伊的所做，上主看做歹；上主嘛互伊死。
38:11 猶大驚示拉會親像伊兩個兄哥仝款死，就對伊的新婦她瑪講：「你倒去恁老父遐守寡，聽候我的子示拉大漢。」她瑪就倒去𪜶後頭厝。
38:12 過真久，猶大的某，書亞的查某子死；喪期過了，猶大及伊的朋友亞杜蘭人希拉去亭拿，去給猶大剪羊毛的人遐。
38:13 有人給她瑪講：「恁大官去亭拿剪伊羊群的毛。」
38:14 她瑪看著示拉已經大漢，猶未來娶伊作某，就褪伊守寡的衫，用帕罩面，用巾幔身軀，坐佇欲去亭拿的路伊拿印的城門口。
38:15 猶大看著她瑪，掠準伊是娼妓，因為伊有罩面。
38:16 猶大就斡去路邊她瑪遐，給伊講：「來，互我及你做夥睏。」猶大毋知婦仁人是伊的新婦。
她瑪應伊講：「你欲及我睏，欲什麼互我？」
38:17 猶大講：「我會對羊群掠一隻山羊仔送互你。」
她瑪講：「你送來以前，著有物件互我兜啲。」
38:18 猶大講：「我著用什麼互你兜啲？」
她瑪講：「你的印、印仔帶，及手裡的柺仔。」猶大就互伊，及伊睏；伊就對猶大懷孕。
38:19 她瑪就轉去，將面帕提起來，閣穿伊原來守寡的衫。
38:20 猶大託伊的朋友亞杜蘭人希拉送一隻山羊仔去互彼個婦仁人，欲將互伊兜啲的物件提倒轉；毋拘尋無彼個婦仁人。
38:21 希拉就問彼所在的人，講：「伊拿印路邊寺廟的妓女佇叨位？」
𪜶講：「遮無寺廟的妓女。」
38:22 伊倒去給猶大講：「我尋無伊；遐的人嘛講𪜶遐無寺廟的妓女。」
38:23 猶大講：「我欲給此隻山羊仔送互伊，你煞尋無伊。伊兜啲的物件，據在伊留啲，才免咱互人笑。」
38:24 大約過三月日，有人給猶大講：「你的新婦她瑪做妓女；閣因為行淫懷孕。」
猶大講：「給伊拖出來燒。」
38:25 她瑪互人拖出來的時，伊叫人去見伊的大官，講：「諸個物件是什麼人的，我就是對伊懷孕。請你認，看此個印仔、印仔帶，及柺仔是什麼人的。」
38:26 猶大會認得，就講：「伊比我較有理，因為我無將伊嫁互我的子示拉。」對彼陣起，猶大無閣及伊做夥睏。
38:27 她瑪啲欲生，竟然腹肚內是雙生。
38:28 伊生的時，有一個嬰仔伸一支手出來；產婆提紅線縛佇伊的手，講：「此個是先出世的。」
38:29 後來伊的手勼入去；伊的兄弟出世，產婆講：「你是按怎闖出來？」因為伊闖出來，所以伊的名叫做法勒斯。
38:30 後來，彼個手縛紅線的生出來，伊的名叫做謝拉。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。