上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志上
大闢作全以色列的王
11:1 ( 撒下 5:1-10 )
以色列眾人聚集來希伯崙見大闢，講：「阮是你的骨肉。
11:2 較早掃羅做阮的王的時，導以色列去交戰的是你；上主 — 你的上帝嘛曾給你講：『你會牧養我的子民以色列，嘛會做我的子民以色列的統治者。』」
11:3 以色列的長老攏來希伯崙見大闢王，伊就佇希伯崙，佇上主的面前及𪜶立約。𪜶就用油抹大闢，設立伊做以色列的王，照上主通過撒母耳講的話。
11:4 大闢及所有的以色列人去到耶路撒冷。耶路撒冷當時叫做耶布斯，因為耶布斯人住佇遐。
11:5 徛起佇耶布斯的人給大闢講：「你無可能攻入來。」毋拘大闢有攻取錫安的堡壘，就是現在的大闢城。
11:6 大闢講：「什麼人先攻打耶布斯人，伊欲做頭，做元帥。」洗璐雅的子約押代先上去，就做元帥。
11:7 大闢住佇堡壘，所以彼個堡壘叫做大闢城。
11:8 伊對米羅開始，起四圍的城牆，其他的部份交互約押修建。
11:9 大闢愈來愈強盛，因為上主 — 萬軍的統帥及伊同在。
大闢的勇士
11:10 ( 撒下 23:8-39 )
下面諸個是大闢的勇士的領袖；𪜶全力擁護大闢得著王權，嘛及以色列眾人照上主對以色列的應允設立伊作王。
11:11 許個領袖的名單記佇下面：
哈革摩尼的子雅朔班是眾軍官的首領，曾一遍用槍刣死三百個人。
11:12 第二個是亞何亞人朵多的子以利亞撒，伊是三個勇士的一個。
11:13 伊曾及大闢佇巴斯‧大憫；非利士人聚集佇遐欲交戰。遐有一坵園，種真多大麥；以色列人佇非利士人的面前逃走。
11:14 伊徛佇園中防守彼坵園，拍非利士人。上主互伊大勝利。
11:15 三十個首領中有三個落去亞杜蘭洞附近的石磐遐見大闢。非利士的軍隊佇利乏音山谷紮營。
11:16 彼時，大闢佇要塞；非利士的軍隊駐在佇伯利恆。
11:17 大闢用真渴慕的口氣講：「若有人會當去提伯利恆城門邊的井水互我飲，毋知偌仔呢好！」
11:18 此三個人就衝過非利士人的營地，對伯利恆城門邊的井汲水，捾來互大闢。毋拘大闢毋飲，倒出來獻互上主，
11:19 講：「我的上帝啊，我哪通飲此個水？這豈毋是諸個用性命去換來的人的血，我哪敢飲？」所以大闢毋飲。這是此三個勇士做的代誌。
11:20 約押的小弟亞比篩是另外三個勇士的首領；伊曾攑槍刣死三百個人，就佇三個勇士中有名。
11:21 伊比其他兩個較有名望，所以做𪜶的領袖；毋拘伊猶不及前彼三個勇士。
11:22 閣有甲薛人耶何耶大的子比拿雅；伊是勇士，有做真多大事：伊曾刣死摩押兩個強猛的勇士；閣佇落雪的時，落去坑內刣死一隻獅；
11:23 閣刣死一個兩百外公分高大的埃及人。彼個埃及人手攑槍，槍的柄親像織布機的車心赫粗。比拿雅只有攑棍落去伊遐，搶伊的槍，用彼支槍給伊刣死。
11:24 這是耶何耶大的子比拿雅所做的事，就佇三個勇士中有名。
11:25 伊比三十個勇士較有名望，毋拘不及前彼三個勇士。大闢有設立伊做侍衛長。
11:26 軍中的勇士有：
約押的小弟亞撒黑
伯利恆人朵多的子伊勒哈難
11:27 哈律人沙瑪
比倫人希利斯
11:28 提哥亞人益吉的子以拉
亞拿突人亞比以謝
11:29 戶沙人西比該
亞何亞人以來
11:30 尼陀法人瑪哈萊及巴拿的子希立
11:31 便雅憫支族基比亞人利拜的子以太
比拉頓人比拿雅
11:32 迦實溪人戶萊
亞拉巴人亞別
11:33 巴魯米人亞斯瑪威
沙本人以利雅哈巴
11:34 基孫人哈深的眾子
哈拉人沙基的子約拿單
11:35 哈拉人沙甲的子亞希暗
吾珥的子以利法勒
11:36 米基拉人希弗
比倫人亞希雅
11:37 迦密人希斯羅
伊斯拜的子拿萊
11:38 拿單的兄弟約珥
哈基利的子彌伯哈
11:39 亞捫人洗勒
給洗璐雅的子約押攑軍器的比錄人拿哈萊
11:40 以帖人以拉及迦立
11:41 赫人烏利亞
亞萊的子撒拔
11:42 呂便人示撒的子亞第拿 (伊是呂便支族中一個領袖，導三十人)
11:43 瑪迦的子哈難
彌特尼人約沙法
11:44 亞施他拉人烏西亞
亞羅珥人何坦的子沙瑪及耶利
11:45 提洗人申利的子耶疊及伊的兄弟約哈
11:46 瑪哈未人以利業
伊利拿安的子耶利拜及約沙未雅
摩押人伊特瑪
11:47 以利業、俄備得，及米瑣巴人雅西業。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。