上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
歷代志上
呂便的後代
5:1 雅各的大子呂便，伊本來是大子，因為及𪜶老父的細姨做夥睏，所以大子的權利就歸佇雅各的子約瑟；家譜無照出世的順序登錄。
5:2 猶大比伊的兄弟較強盛，閣出君王；毋拘大子的權利歸佇約瑟。
5:3 雅各的大子呂便有四個子：以諾、法路、希斯崙，及迦米。
5:4 約珥生示瑪雅，示瑪雅生歌革，歌革生示每，
5:5 示每生米迦，米迦生利亞雅，利亞雅生巴力，
5:6 巴力生備拉；備拉做呂便支族的領袖，互亞述王提革拉‧比列色掠去。
5:7 備拉的兄弟，照宗族的家譜，做族長的，有耶利、撒迦利亞，
5:8 及比拉；比拉是亞撒的子，示瑪的孫，約珥的乾仔孫；約珥住佇亞羅珥到尼波及巴力‧免的地區；
5:9 𪜶佇基列地區的牲生真多，就佔東旁的曠野，一直到幼發拉底河。
5:10 掃羅的時，呂便支族及夏甲人交戰；夏甲人死佇𪜶的手下，𪜶就搶夏甲人的布棚，住佇基列東旁全地。
迦得的後代
5:11 迦得的子孫住佇呂便的對面巴珊地區一直到撒迦；
5:12 約珥做𪜶的族長，沙番做副族長，閣有住佇巴珊的雅乃及沙法。
5:13 迦得支族其他的人攏屬下面七個宗族：米迦勒、米書蘭、示巴、約賴、雅干、細亞，及希伯。
5:14 以上諸個攏是戶利的子亞比孩的後代；亞比孩的祖先對阿公算上去是耶羅亞、基列、米迦勒、耶示篩、耶哈多、布斯。
5:15 沽尼的孫，押比疊的子亞希嘛做族長。
5:16 𪜶住佇基列、巴珊，及附近的庄社，以及沙崙的草埔，直到四圍的交界。
5:17 諸個人佇猶大王約坦及以色列王耶羅波安二世的時，攏有登錄佇家譜。
東岸支族的軍隊
5:18 呂便人、迦得人，及瑪拿西半支族的人，會提盾牌攑刀，開弓射箭，出征𠢕相刣的勇士，攏總有四萬四千七百六十人。
5:19 𪜶及夏甲人、伊突人、拿非施人、挪答人交戰。
5:20 𪜶信靠上帝，佇戰場祈求上帝幫贊，伊就聽𪜶的祈禱，將夏甲人及跟隨𪜶的人攏交佇𪜶的手。
5:21 𪜶搶夏甲人的牲生，有駱駝五萬隻、羊二十五萬隻、驢兩千隻，閣掠人十萬。
5:22 𪜶刣死真多敵人，因為此個交戰出佇上帝。𪜶就住佇彼個地區到𪜶受掠的時。
瑪拿西半支族
5:23 瑪拿西半支族的人徛起佇此個地區，對巴珊續到巴力‧黑門，示尼珥，及黑門山；𪜶的人口加添真多。
5:24 𪜶的族長就是以弗、以示、以利業、亞斯列、耶利米、何達威雅，及雅疊，攏是強猛的勇士，有名聲，嘛做族長。
東岸支族受掠
5:25 呂便、迦得，及瑪拿西半支族的人背叛𪜶列祖的上帝，服事彼所在住民的神明，許個住民是上帝佇以色列人面前所毀滅的。
5:26 所以以色列的上帝激動亞述王普勒，就是提革拉‧比列色的心，將呂便人、迦得人、瑪拿西半支族的人，掠去哈臘、哈博、哈拉，及歌散河邊，到今仔日。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。