上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
上帝佇伯特利祝福雅各
35:1 上帝給雅各講：「你著出發去伯特利，住佇遐，閣佇遐為上帝起一座祭壇，就是你逃避你的兄哥以掃的時，對你顯現彼位上帝。」
35:2 雅各就給家內的人以及所有跟隨伊的人講：「恁著將恁中間外邦的神明除掉，嘛著潔淨家己，換衫。
35:3 咱著出發來去伯特利；我欲佇遐起一座祭壇獻互上帝，就是我佇患難的時，應允欲一路及我同在彼位。」
35:4 大家就將𪜶的耳鉤及外邦的神明攏交互雅各；雅各將許個埋佇示劍的橡樹腳。
35:5 𪜶就出發。上帝互周圍許個城的人著驚恐惶；許個城的人就無追趇雅各的眾子。
35:6 雅各以及所有及伊做陣的人來到迦南地的路斯，就是伯特利。
35:7 伊佇遐起一座祭壇，就給彼個所在號名叫做伊勒‧伯特利；因為伊逃避伊的兄哥的時，上帝佇遐對伊顯現。
35:8 麗百加的奶母底波拉死，埋葬佇伯特利南旁的橡樹腳；所以彼個所在叫做亞倫‧巴古。
35:9 雅各對美索不達米亞倒來以後，上帝閣對伊顯現，賜福互伊。
35:10 上帝給伊講：
「你的名是雅各，
今無閣按呢叫你；
你欲叫做以色列。」
上帝就給伊改名做以色列。
35:11 上帝閣給伊講：
「我是全能的上帝；
你著生湠，著加添；
將來有一國，毋若有一國，
是真多國會對你出，
嘛有多多君王對你出。
35:12 我賜互亞伯拉罕及以撒的地，
嘛欲賜互你及你的後代。」
35:13 上帝就對及雅各講話的所在上去。
35:14 雅各佇遐𫞼一支石柱，佇彼頂面倒酒及橄欖油獻互上帝。
35:15 雅各就將上帝及伊講話的所在叫做伯特利。
蕾潔死
35:16 𪜶對伯特利出發，離開以法他猶有一站路的時，蕾潔催陣，毋拘難產。
35:17 佇伊生甲真艱苦的時，產婆對伊講：「毋免驚，你閣生後生啦。」
35:18 伊臨終氣欲斷的時，給此個囝仔號名叫做便‧俄尼；毋拘囝仔的老父給伊號名叫做便雅憫。
35:19 蕾潔死，埋葬佇去以法他的路邊；以法他就是伯利恆。
35:20 雅各佇蕾潔的墓頂徛墓牌，到今仔日猶佇遐。
35:21 雅各閣出發，去住佇以得塔。
雅各的眾子
35:22 ( 代上 2:1-2 )
雅各住佇以得塔的時，呂便去及伊老父的細姨辟拉做夥睏；雅各嘛聽著此個代誌。
35:23 雅各攏總有十二個子。麗亞的子有雅各的大子呂便，以及西緬、利未、猶大、以薩迦、西布倫；
35:24 蕾潔的子有約瑟及便雅憫；
35:25 蕾潔的女婢辟拉的子有但及拿弗他利；
35:26 麗亞的女婢悉帕的子有迦得及亞設。諸個是雅各佇美索不達米亞生的子。
以撒死
35:27 雅各來基列‧亞巴的幔利，伊的老父以撒遐；基列‧亞巴就是希伯崙，亞伯拉罕及以撒曾佇遐寄居。
35:28 以撒一生活一百八十歲。
35:29 以撒年歲老，食長歲壽，平平安安轉去伊的祖先遐；伊兩個子以掃及雅各給伊埋葬。
上一章 下一章 [ 條列 | 表格 | 整段 ] 羅馬字漢字對照表 現代台語譯本2021序 現代台語譯本2021用詞簡釋 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。