上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀下
以色列及摩押戰爭
3:1 猶大王約沙法十八年，亞哈的子耶和南佇撒瑪利亞坐位做以色列王共十二年。
3:2 伊行耶和華所看做歹的事，總是無親像伊的老父伊的老母所做的，因為𪜶老父所創巴力的柱像，伊有除去。
3:3 總是，伊擒住尼八的子耶羅波安互以色列犯罪彼號罪，攏無離開。
3:4 摩押王米沙飼多多羊，年年用十萬隻羊仔的毛，十萬隻綿羊牨的毛進貢以色列王。
3:5 亞哈死了，摩押王背叛以色列王。
3:6 彼時耶和南王出撒瑪利亞，點算以色列眾人。
3:7 起身的時，差人去見猶大王約沙法，講：「摩押王背叛我，你肯及我去攻擊摩押嗎？」伊講：「我欲上去，我親像你，我的百姓親像你的百姓，我的馬親像你的馬。」
3:8 伊講：「咱欲對叨落一條路上去啊？」伊講：「對以東曠野的路。」
3:9 以色列王及猶大王，及以東王就去，行踅七日的路站；軍隊及隨𪜶的精牲無水通飲。
3:10 以色列王講：「慘啊！耶和華聚集此三個王，欲將𪜶交佇摩押人的手。」
3:11 約沙法講：「佇遮豈無耶和華的先知，咱通託伊來問耶和華嗎？」以色列王一個奴僕應講：「前傾水佇以利亞的手者，沙法的子以利沙佇遮。」
3:12 約沙法講：「伊有耶和華的話。」以色列王及約沙法，及以東王就落去見伊。
3:13 以利沙給以色列王講：「我及你甚麼干涉？通去尋你的老父的先知，及你的老母的先知。」以色列王給伊講：「是按呢，耶和華聚集此三個王，欲交佇摩押人的手。」
3:14 以利沙講：「我指永活萬軍的耶和華，就是我徛佇伊的面前的來講，我若是看猶大王約沙法的面，就看你，插你。
3:15 今著給我叫一個樂師來遮。」樂師彈的時，耶和華的手就到以利沙。
3:16 伊就講：「耶和華按呢講：『此個山谷恁著遍遍開溝；
3:17 因為耶和華按呢講：恁欲無看見風，無看見雨，猶久此個山谷水欲滿滿，互恁通飲就是恁及恁的精牲恁的獸飲伊。』
3:18 在耶和華猶看此個做小可，伊也欲用摩押人交佇恁的手。
3:19 恁欲攻破逐個堅固的城及逐個媠的城，剉逐欉好的樹，塞住攏總的水泉，用石頭拍歹攏總好的田。」
3:20 隔早起，獻祭的時，看啊，有水對以東的路來，遍地就有水滿滿。
摩押人敗走
3:21 摩押眾人聽見此三個王上來欲及𪜶交戰，就聚集見若會攑家私的以上，攏徛佇邊界。
3:22 隔早起，𪜶早早起來，日照佇水裡，摩押人看對面的水紅親像血，
3:23 就講：「這就是血啊！許個王的確攏死，是相攻擊。摩押啊，著來去搶伊啦！」
3:24 𪜶到以色列人的營，以色列人就起來攻擊摩押人，互𪜶走佇𪜶的面前。以色列人入𪜶境界，拍死摩押人，
3:25 毀𪜶的城，逐人㧒石填滿攏總好的地，塞住攏總的水泉，剉𪜶逐欉好的樹，只有剩吉珥‧哈列設的石牆；甩石者四圍攻擊伊。
3:26 摩押王看見交戰的勢面抵敵𣍐住，就帶攑刀者七百，欲衝過陣到以東王遐，總是𣍐會；
3:27 就取應該續接伊的位的大子，佇城頂獻伊做燒祭。有大痛恨到佇以色列，𪜶就離開伊，倒去𪜶本國。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。