上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀下
以利亞受接上天
2:1 耶和華欲用捲螺風接以利亞上天的時，以利亞及以利沙對吉甲去。
2:2 以利亞給以利沙講：「你且𫢶遮，因為耶和華差我去伯特利。」以利沙講：「我指永活的耶和華，及你的活命來咒誓，我無欲離開你。」二人就落去伯特利。
2:3 佇伯特利許個先知的學生出來見以利沙，給伊講：「耶和華今仔日欲取你的老師離開你去，你知嗎？」伊講：「是，我知，恁莫做聲。」
2:4 以利亞給伊講：「以利沙啊，你且𫢶遮，因為耶和華差我去耶利哥。」伊講：「我指永活的耶和華，及你的活命來咒誓，我無欲離開你。」𪜶就到耶利哥。
2:5 佇耶利哥許個先知的學生就近以利沙，給伊講：「耶和華今仔日欲取你的老師離開你去，你知嗎？」伊講：「是，我知，恁莫做聲。」
2:6 以利亞給以利沙講：「你且𫢶遮，因為耶和華差我去約但。」以利沙講：「我指永活的耶和華，及你的活命來咒誓，我無欲離開你。」𪜶二人就相及去。
2:7 有先知的學生五十人去，遠遠徛佇𪜶的對面；二人佇約但河邊啲徛。
2:8 以利亞提伊的外衫捲起來，拍許個水，水就分雙旁，二人行乾地過去。
2:9 過去了，以利亞給以利沙講：「我猶未受取離開你去，我欲給你做甚麼？你今著求。」以利沙講：「求你將感動你的神互我雙份。」
2:10 以利亞講：「你所求的得啊！總是我受取離開你的時，你若看見我，就欲得著，若無，就𣍐得著。」
以利亞坐捲螺風上天
2:11 𪜶啲行啲講，忽然有火車火馬隔開𪜶二人，以利亞就坐捲螺風上天。
2:12 以利沙看見，就叫講：「我的父啊！我的父啊！以色列的戰車及伊馬兵啊！」後來無閣看見伊。
就提家己的衫來拆做二旁。
2:13 伊拾以利亞磕落落來的外衫，倒轉去徛佇約但河邊。
2:14 伊用以利亞磕落落來的外衫拍水，講：「以利亞的上帝──耶和華佇叨落？」拍水了後，水就分雙旁，以利沙就過去。
2:15 先知的學生𫢶佇耶利哥佇伊的對面的，看見伊就講：「感動以利亞的神𫢶佇以利沙啦。」𪜶就來迎接伊，仆落佇伊的面前，
2:16 給伊講：「你看啊，你的奴僕遮有壯士五十人，求你准𪜶去尋你的老師，驚了耶和華的神提伊，㧒佇某個山某個山谷。」伊講：「通差。」
2:17 𪜶迫伊到互伊歹推，伊就講：「恁通差伊。」𪜶就差五十人去，尋三日，也尋無。
2:18 伊佇耶利哥聽候𪜶倒來到伊遐；伊給𪜶講：「我豈無給恁講，通去嗎？」
以利沙的神蹟
2:19 城內的百姓給以利沙講：「請你看此個城的地點是好，照我的主所看見的；總是水歹，致到土地無出產。」
2:20 以利沙講：「恁提一個新的瓶，貯鹽來互我。」𪜶就提來互伊。
2:21 伊出去到水泉，將鹽傾佇彼內面，講：耶和華按呢講：『我醫好此個水，無閣對遐有死無，抑是無出產。』」
2:22 彼個水就醫好，到今仔日，照以利沙所講的話。
2:23 以利沙對遐上去伯特利，上路的時，有囝仔對城內出來，恥笑伊，對伊講：「翏額的上去噢！翏額的上去噢！」
2:24 伊越頭看𪜶，就奉耶和華的名咒詛𪜶。就有二隻熊母對樹林內出來，擘拆𪜶中間四十二個囝仔。
2:25 伊對遐上迦密山，閣對遐倒去撒瑪利亞。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。