上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
列王紀上
大衛互所羅門的遺訓
2:1 大衛欲死的期近啦，就吩咐伊的子所羅門講：
2:2 「我啲欲行世間眾人所著行的路。所以，你著勇敢，做大丈夫，
2:3 守耶和華──你上帝所交代你守的，行伊的道路，守伊的律例、伊的誡命、伊的法度、伊干證的話，照所寫佇摩西律法的冊裡的。按呢，你無論做甚麼，無論對叨落去，攏會亨通。
2:4 也互耶和華應驗伊所應允我的話講：『你的子孫若謹慎伊的路，盡心盡意誠實行佇我的面前，就你的後裔坐以色列的國位永無斷。』
2:5 你也知洗魯雅的子約押對我所行的，伊對以色列二個軍長所行的：就是尼珥的子押尼珥及益帖的子亞瑪撒，伊刣死𪜶。伊佇太平的時流𪜶的血，親像佇交戰的時一樣，將此個交戰的血染著伊的腰所縖的帶及伊的腳所穿的鞋。
2:6 所以你著照你的智慧來行，通容允伊白頭毛安然落陰間。
2:7 你著好款待基列人巴西萊許個子，互𪜶常常佇你的桌食；因為我閃避你的兄押沙龍的時，𪜶按呢款待我。
2:8 看啊，及你佇啲的有巴戶琳的便雅憫人，基拉的子示每；我去瑪哈念的日，伊用重的咒詛咒詛我，總是伊有落約但迎接我，我就指耶和華對伊咒誓講：『我無欲用刀刣你。』
2:9 今你莫得算伊無罪。因為你是聰明的人，也會知著怎樣款待伊，著互伊白頭毛，流血落陰間。」
大衛及伊的列祖相及睏
2:10 大衛及伊的列祖相及睏，埋葬佇大衛的城。
2:11 大衛做以色列王共四十年；佇希伯崙做王七年，佇耶路撒冷做王三十三年。
2:12 所羅門坐伊的老父大衛的位，伊的國堅固到極。
亞多尼雅的死
2:13 哈及的子亞多尼雅去見所羅門的老母拔示巴，伊問伊講：「你來是平安嗎？」應講：「平安」；
2:14 閣講：「我有代誌欲對你講。」伊講：「做你講。」
2:15 亞多尼雅講：「你知國本是我的，以色列眾人也攏意向我，愛我做王，總是，國反轉歸我的小弟，因為是對耶和華互伊。
2:16 今我有一件事求你，向望你莫得推辭我。」伊講：「做你講。」
2:17 伊講：「求你對所羅門王講，互伊將書念的查某子亞比煞賞賜我做某，因為王的確無推辭你。」
2:18 拔示巴講：「好，我替你給王講。」
2:19 對按呢，拔示巴去見所羅門王，欲為著亞多尼雅給伊講；王起來迎接伊，對伊鞠躬，閣坐伊的位，吩咐人為王的老母設座位，伊就坐佇王的正旁。
2:20 伊就講：「我有一件小可事求你，請你莫得推辭我。」王給伊講：「我的老母啊，做你講，我無欲推辭你。」
2:21 伊講：「願用書念的查某囝仔亞比煞互你的兄亞多尼雅做某。」
2:22 所羅門王應伊的老母講：「你啥事為著亞多尼雅求書念的查某囝仔亞比煞啊？也著替伊求國，因為伊是我的兄，就是著為伊及祭司亞比亞他及洗魯雅的子約押來求。」
2:23 所羅門王就指耶和華來咒誓講：「亞多尼雅講這話是害家己的生命，若無，願上帝加倍責罰我。
2:24 耶和華堅固我，互我坐我的父大衛的位，照伊所應允的話給我建立家；我指伊的永活來咒誓，亞多尼雅今仔日的確死。」
2:25 所羅門王就差耶何耶大的子比拿雅去，伊就拍伊互伊死。
亞比亞他受革逐及約押的死
2:26 王給祭司亞比亞他講：「你著倒去亞拿突你的田園遐！你應該著死，總是今仔日我互你死，因為你佇我的父大衛的面前有扛主耶和華的櫃，閣我的老父所受一切的患難，你也及伊受患難。」
2:27 所羅門就革逐亞比亞他，准伊做耶和華的祭司。按呢，就應驗耶和華佇示羅論以利的家所講的話。
2:28 此個消息傳到約押，約押就走入耶和華的布棚，擒壇角。因為約押雖然無隨押沙龍，總是隨亞多尼雅。
2:29 有人給所羅門王講：「約押走到耶和華的布棚，今佇壇邊。」所羅門就差耶何耶大的子比拿雅，講：「你去拍伊。」
2:30 比拿雅到耶和華的布棚，給約押講：「王按呢講，你著出來！」伊應講：「啊，我欲死佇遮。」比拿雅去回覆王，講約押按呢講按呢應我。
2:31 王給伊講：「你通照伊的話行，拍死來埋葬伊，通互約押無因端流人的血彼個罪無歸佇我及我老父的家。
2:32 耶和華欲用伊的血歸佇伊家己的頭殼；因為伊拍比伊卡義比伊卡好的二人，用刀刣死伊，就是以色列的軍長尼珥的子押尼珥及猶大的軍長益帖的子亞瑪撒，也我的老父大衛知。
2:33 對按呢，𪜶的血欲歸佇約押的頭殼及伊的後裔的頭殼，到永遠；獨獨大衛及伊的後裔，伊的家，伊的位，欲對耶和華得著平安，到永遠。」
2:34 耶何耶大的子比拿雅就上去，拍死伊，就埋葬伊佇曠野佇伊家己的厝。
2:35 王就設立耶何耶大的子比拿雅，替約押做軍長，閣設立祭司撒督來替亞比亞他。
示每的死
2:36 王差人叫示每來，就給伊講：「你著為家己起厝佇耶路撒冷，徛起佇遐，通出遐去別位。
2:37 因為你著確實知，你出去過汲淪溪，彼日著死！你的血欲歸你家己的頭殼。」
2:38 示每應王講：「此個話真好！我的主我的王所講的，你的奴僕欲按呢行。」對按呢示每𫢶佇耶路撒冷多多日。
2:39 過三年，示每二個奴僕走到迦特王瑪迦的子亞吉遐。有人給示每講：「你看，你的奴僕佇迦特。」
2:40 示每起來，備辦驢，去迦特到亞吉王遐尋伊的奴僕，示每就去迦特帶伊的奴僕倒來。
2:41 有人給所羅門講：「示每出耶路撒冷去迦特倒來。」
2:42 王就差人叫示每來，對伊講：「我豈是叫你指耶和華咒誓，閣警戒你講『你著確實知，你出來去外面無論去叨落，彼日你著死』嗎？你應我講：『我聽此個話真好。』
2:43 今你啥事無執守指耶和華所咒誓的及我所警戒你的命令啊？」
2:44 王閣給示每講：「你的心所存的歹就是你對阮老父大衛所行的，你家己攏知，所以耶和華欲將你的歹歸你家己的頭殼；
2:45 總是所羅門王欲得著福氣，閣大衛的國位欲佇耶和華的面前堅固，到永遠。」
2:46 王就命令耶何耶大的子比拿雅。伊就出去拍互伊死。對按呢，國位堅固佇所羅門的手。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。