上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記下
大衛及洗巴
16:1 大衛過山頂無偌遠，看見米非波設的奴僕洗巴來抵著伊帶掛鞍的驢二隻，載餅二百，葡萄干一百葩，夏天的果子一百，酒一皮囊。
16:2 王問洗巴講：「你帶諸個來是甚麼意思？」洗巴講：「驢是欲互王的家眷騎；餅及夏天的果子是欲互少年人食；酒是欲互佇曠野厭倦的人飲。」
16:3 王問講：「你的主人的子佇叨落？」洗巴應王講：「伊猶原佇耶路撒冷，因為伊講：『以色列人今仔日欲將我的父的國還我。』」
16:4 王給洗巴講：「米非波設所有的攏歸互你。」洗巴講：「我跪拜，願得著恩典佇我的主我的王的面前。」
大衛及示每
16:5 大衛王到巴戶琳的時，看啊，有掃羅族的家一人出來，就是基拉的子，名叫示每。他出來愈行愈咒詛，
16:6 閣拾石頭擲大衛及大衛王的人臣；彼時眾百姓及勇士攏佇王的左右。
16:7 示每咒詛講：「你此個流人的血的人啊，你此個歹人啊，去啊去啊！
16:8 你替掃羅做王，今耶和華用伊的家的血攏歸佇你，耶和華用此個國交佇你的子押沙龍的手。今你抵著惡報，因為你是流人的血的人。」
16:9 洗魯雅的子亞比篩給王講：「此隻死狗豈通咒詛我的主我的王嗎？求你准我過去，割伊的頭。」
16:10 王講：「洗魯雅諸個子啊，我及恁有甚麼干涉？出在伊咒詛因為耶和華吩咐伊講：『你著咒詛大衛。』按呢，是誰敢講你啥事按呢行啊？」
16:11 大衛閣給亞比篩及伊的眾人臣講：「我親生的子尚且數想我的生命，何況此個便雅憫人啊？容允伊出在伊咒詛！因為這是耶和華教伊的。
16:12 豈採耶和華鑑察我的冤枉，因為伊今仔日的咒詛，耶和華欲用好報我。」
16:13 大衛及隨伊的人行路去。示每行佇伊相對的山坪，愈行愈咒詛，閣擲石頭，撒土。
16:14 王及隨伊的眾百姓真厭倦到一所在，就佇遐歇睏。
押沙龍佇耶路撒冷
16:15 押沙龍及眾百姓以色列人來到耶路撒冷；亞希多弗也及伊佇遐。
16:16 大衛的朋友亞基人戶篩來到押沙龍遐，戶篩給押沙龍講：「願王萬歲！願王萬歲！」
16:17 押沙龍給戶篩講：「你好款待你的朋友是按呢嗎？啥事無及你的朋友相及去啊？」
16:18 戶篩給押沙龍講：「是按呢，耶和華及此個百姓，及以色列眾人，所揀的，我欲歸伊，也欲及伊住。
16:19 閣一項，我著服事是誰啊？豈是佇伊的子的面前嗎？我怎樣佇你的老父的面前服事，也欲按呢佇你的面前。」
16:20 押沙龍給亞希多弗講：「恁著計劃，看咱著怎樣行？」
16:21 亞希多弗給押沙龍講：「你的老父所留啲顧厝許個嬪妃，你著及伊睏。就以色列的眾人聽見你互你的老父厭惡，見若歸你的人，伊的手欲嚴硬。」
16:22 𪜶就給押沙龍搭布棚，佇王宮的磚棚頂；押沙龍就佇以色列眾人的面前入去，及伊的老父的嬪妃睏。
16:23 彼時亞希多弗所計劃的計劃親像人問上帝的話一樣；亞希多弗對佇大衛，抑是對佇押沙龍所計劃的，攏是按呢。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。