上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
撒母耳記下
拍敗亞捫人及亞蘭人
10:1 ( 代上 19:1-19 )
此霎以後，亞捫人的王死，伊的子哈嫩續接伊做王。
10:2 大衛講：「我欲施恩互拿轄的子哈嫩親像伊的老父施恩互我一樣。」大衛就差人臣，託仗𪜶安慰伊死老父。大衛的人臣到亞捫人的境內。
10:3 總是亞捫人的首領差人給𪜶的主哈嫩講：「大衛差人來你遮慰問你，你拍算伊是尊敬你的父嗎？大衛差伊的人臣豈是欲偵探此個城、詳細看來捙倒伊嗎？」
10:4 哈嫩就將大衛的人臣的嘴鬚剃一半，閣對中割斷伊的衫，到大腿頂，差𪜶倒去。
10:5 有人給大衛講，伊就差人去迎接𪜶，（因為許個人見誚到極），王講：「通𫢶佇耶利哥聽候嘴鬚發長才倒來。」
10:6 亞捫人知𪜶互大衛厭惡，亞捫人就差人去，倩伯‧利合的亞蘭人及瑣巴的亞蘭人，步兵二萬，及瑪迦王的人一千、陀伯人一萬二千。
10:7 大衛聽見，就差約押導勇士全軍。
10:8 亞捫人出來排陣佇城門口；瑣巴及利合的亞蘭人、陀伯人，及瑪迦人，另外排陣佇郊野。
10:9 約押看見前後有對敵排陣，就對以色列精兵的中間閣再揀伊來排陣，抵敵亞蘭人。
10:10 其餘的百姓交伊的小弟亞比篩，互伊排陣抵敵亞捫人。
10:11 閣講：「若亞蘭人卡強我，你就來幫助我；若亞捫人卡強你，我就去幫助你。
10:12 著勇敢，咱著為咱的百姓及咱上帝的城做大丈夫。願耶和華照伊所看做好的來行！」
10:13 對按呢，約押及隨伊的百姓進前及亞蘭人交戰；𪜶就佇伊的面前逃走。
10:14 亞捫人看見亞蘭人逃走，𪜶也佇亞比篩的面前走入城。約押就對亞捫人遐倒去，到耶路撒冷。
10:15 亞蘭人看見𪜶刣輸佇以色列人的面前，就閣聚集。
10:16 哈大底謝差人，召河外的亞蘭人出來；𪜶到希蘭，哈大底謝的軍長朔法導𪜶。
10:17 有人報大衛知，伊就聚集以色列眾人，過約但河，來到希蘭。亞蘭人排陣攻擊大衛，及伊交戰。
10:18 亞蘭人逃走佇以色列的面前；大衛刣死亞蘭七百張戰車的兵，馬兵四萬，閣拍𪜶的軍長朔法互伊死佇遐。
10:19 降服哈大底謝許個王看見𪜶刣輸佇以色列的面前，就及以色列和好，來降服𪜶。對按呢亞蘭人敢閣幫助亞捫人。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。