上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
該隱及亞伯
4:1 彼人及伊的某夏娃同房，夏娃就懷孕生該隱，講：「我對耶和華庇佑得著子。」
4:2 閣生伊的小弟亞伯。亞伯是顧羊者，該隱是作田者。
4:3 到日後，該隱將土產做禮物獻互耶和華；
4:4 亞伯也將羊群中頭上生的羊及伊的油提來獻。耶和華眷顧亞伯及伊的禮物，
4:5 總是無眷顧該隱及伊的禮物。該隱就大受氣，變面。
4:6 耶和華對該隱講：「你啥事受氣？你啥事變面？
4:7 你若行好，豈無得著監納？若無行好，罪孽埋伏佇門口。伊欲戀慕你，你欲管轄伊。」
4:8 該隱給伊的小弟講；以後𪜶佇山裡的時，該隱攻擊伊的小弟亞伯，給伊刣死。
4:9 耶和華對該隱講：「你的小弟亞伯佇叨落？」伊講：「知！我豈是顧守我的小弟的嗎？」
4:10 伊講：「你有做甚麼？恁小弟的血的聲對地裡喉叫我。
4:11 地有開嘴，對你的手來接受恁小弟的血。今你對此個地受咒詛。
4:12 你種作，地無欲出土產互你；你欲四界走，漂流地上。」
4:13 該隱對耶和華講：「我的刑罰太重，過頭佇我所會當的。
4:14 你今仔日趕我離開此個地面，無通住佇你的面前；我四界走漂流地上，見若抵著我的欲刣死我。」
4:15 耶和華對伊講：「因為按呢，見若刣死該隱的，欲受七倍的報應。」耶和華就給該隱立一個記號，免得抵著伊的刣死伊。
4:16 該隱就離開耶和華的面前，去佇伊甸的東勢羅得的地徛起。
該隱的世系
4:17 該隱及伊的某同房，伊的某懷孕，生以諾。該隱起城，就照伊的子的名稱彼個城的名做以諾。
4:18 以諾生以拿；以拿生米戶雅利；米戶雅利生瑪土撒利；瑪土撒利生拉麥。
4:19 拉麥娶二個某：一個名亞大，一個名洗拉。
4:20 亞大生雅八；伊做徛起布棚、飼精牲的人的祖。
4:21 伊的小弟名猶八；伊是做一切彈琴歕簫的人的祖。
4:22 洗拉也生土八‧該隱；伊就是製造逐樣銅鐵利器的。土八‧該隱的姊妹就是拿瑪。
4:23 拉麥對伊二個某講：
亞大及洗拉啊！著聽我的聲；
拉麥的某啊！著致意聽我的話：
人傷我，我刣伊；
少年人害我，我刣伊。
4:24 該隱的伸冤，若是七倍，
就拉麥的伸冤，的確七十七倍。
設及以羅士
4:25 亞當閣及伊的某同房，伊的某生子，標名叫設，是講：「上帝閣給我設立一個子來替亞伯，因為該隱給伊刣死。」
4:26 設也生子，標名以羅士。彼時，人才起頭求叫耶和華的名。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。