上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
士師記
15:1 閣有許久，到割麥的時，參孫帶一隻山羊仔去尋伊的某，講：「我欲入房尋我的某。」伊的丈人准伊入，
15:2 丈人講：「我按算你實在怨恨伊，因為按呢我將伊互你的陪伴。伊的小妹豈是比伊卡媠嗎？請你娶來替伊！」
15:3 參孫給𪜶講：「此擺我傷害非利士人𪜶無通責罪我。」
15:4 參孫就去掠三百隻狐狸，閣帶火把，將狐狸尾二隻二隻縛相粘，將火把縛佇二支尾的中間，
15:5 火把點𤏸，就放狐狸入非利士人猶未收割的五穀，燒伊歸捆的及伊未割的五穀，以及橄欖園攏燒去。
15:6 非利士人講：「此個事是誰做的啊？」𪜶講：「是亭拿人的子婿參孫，因為伊的丈人將伊的某互伊的陪伴。」非利士人就上去，用火燒婦仁人及伊的老父。
15:7 參孫對非利士人講：「恁既然行按呢，我欲對恁報仇才欲息。」
15:8 參孫就大大拍死𪜶，身屍相褡。就落去，𫢶佇以坦的石頭孔。
參孫拍散非利士人
15:9 非利士人上去紮營佇猶大，分散佇利希。
15:10 猶大人講：「恁啥事上來攻擊阮啊？」𪜶講：「阮上來是欲捆縛參孫；伊款待阮怎樣，阮也欲按呢款待伊。」
15:11 對按呢猶大三千人到以坦的石頭孔，對參孫講：「非利士人管轄咱，你知嗎？你啥事做此個事互阮啊？」應講：「𪜶怎樣款待我，我也按呢款待𪜶。」
15:12 猶大人給伊講：「阮落來是欲捆縛你，將你交佇非利士人的手。」參孫給𪜶講：「恁著對我咒誓，恁本身無欲害我。」
15:13 𪜶對伊講：「無，只有欲捆縛你交佇𪜶的手，阮的確無害死你。」就用二條新的索捆縛伊，對石磐帶伊上去。
15:14 參孫到利希，非利士人抵著就喝。耶和華的神大大臨到伊，伊手裡的索就親像過火燒的麻，所縛伊的索就對伊的手落落去。
15:15 伊看見驢一支新的嘴䩃骨，就伸手拾伊，用來拍死一千人。
15:16 參孫講：
我用驢的嘴䩃骨拍死人一堆一堆，
我用驢的嘴䩃骨拍死一千人。
15:17 講息，就將手裡的嘴䩃骨㧒擲。彼所在就叫拉末‧利希。
15:18 參孫嘴乾到極，就求叫耶和華講：「你既然用你的奴僕的手行即大的拯救，總無我今著嘴乾來死、陷落佇無受割禮的人的手嗎？」
15:19 上帝就互利希塌窩的所在裂開，有水對遐淐出來。參孫飲了，精神復倒閣活動；對按呢號彼個水泉叫隱‧哈歌利，彼個水泉到今仔日猶佇利希。
15:20 當非利士人的時，參孫做以色列的士師二十年。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。