上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
申命記
約書亞繼承摩西
31:1 摩西用諸個話去給以色列眾人講，
31:2 對𪜶講：「我今仔日一百二十歲，𣍐閣照常出入；耶和華也曾對我講：『你𣍐會過此個約但。』
31:3 耶和華──你的上帝欲導你過去，欲滅無諸個國佇你的面前，你欲承接𪜶。約書亞欲導你過去，親像耶和華所曾講的。
31:4 耶和華欲款待𪜶，親像前日款待伊所滅亞摩利人二個王西宏及噩以及𪜶的地一樣。
31:5 耶和華欲用𪜶交佇恁的面前；恁著照我所吩咐恁一切的命令款待𪜶。
31:6 恁著勇敢壯膽，莫得驚𪜶，也莫得愞𪜶，因為耶和華──你的上帝及你去。伊無離開你，也無放拺你。」
31:7 摩西叫約書亞來，佇以色列眾人的面前對伊講：「你著勇敢壯膽！因為你欲及此個百姓去，入耶和華對𪜶列祖咒誓欲互𪜶的地；你也欲互𪜶得著伊做業。
31:8 耶和華欲行佇你的面前；伊欲及你佇啲，伊無離開你，也無放拺你。莫得驚，也莫得愞。」
每七年讀律法一擺
31:9 摩西寫此個律法，交互扛耶和華約櫃的祭司利未的子孫及以色列的眾長老。
31:10 摩西命令𪜶講：「每七年的路尾，就是佇解放的年定著的期搭寮節的時，
31:11 以色列眾人來到耶和華──你上帝的面前佇伊所揀的所在。彼時，你著佇以色列眾人的面前讀此個律法互𪜶聽。
31:12 你著聚集百姓查甫、查某、囝仔，以及你城門內的出外人，互𪜶聽，互𪜶學習，通敬畏耶和華──恁的上帝，執守、來行此個律法一切的話，
31:13 也互𪜶知影的子兒得著聽見，就佇恁過約但所承接的地，照恁𫢶佇遐一切的日通學習敬畏耶和華──恁的上帝。」
對摩西最後的指示
31:14 耶和華對摩西講：「看啊！你死的期近啦；你召約書亞來，相及徛佇會幕中，我欲用職任命令伊。」摩西就及約書亞去相及徛佇會幕中。
31:15 耶和華佇會幕內雲柱中顯現，雲柱停佇會幕門的頂面。
31:16 耶和華閣對摩西講：「看啊，你欲及你列祖相及睏。此個百姓欲起來，行邪淫來趁伊所欲去𫢶彼所在外面的上帝，離開我，背我及伊所立的約。
31:17 彼時，我欲對𪜶發出受氣；我也欲離開𪜶，掩面看𪜶，𪜶欲受吞滅，抵著多多災禍患難。彼日𪜶欲講：『咱抵著災禍患難，豈是因為咱的上帝無佇咱的中間嗎？』
31:18 彼日，因為𪜶偏向別個上帝所行一切的歹，所以我決斷掩我的面。
31:19 今恁家己著寫此個歌，用彼個教示以色列的子孫，互𪜶的嘴唸，互此個歌給我做干證佇以色列的子孫；
31:20 因為我導𪜶入我對𪜶的列祖所咒誓彼個流奶及蜜的地，𪜶得著食閣飽足，身體肥，就欲偏向別個上帝，服事𪜶，看輕我，背我的約。
31:21 到𪜶抵著多多災禍患難的時，此個歌欲佇𪜶的面前做見證來干證𪜶，因為𪜶的子孫的嘴欲唸無𣍐記得。因為現今我猶未導𪜶到我所咒誓的地，𪜶所存的念頭我已經知。」
31:22 當彼日摩西就寫此個歌，將伊來教示以色列的子孫。
31:23 耶和華吩咐嫩的子約書亞講：「你著勇敢壯膽，因為你欲導以色列人入我所咒誓互𪜶的地；我欲及你相及佇啲。」
31:24 摩西用此個律法的話寫佇冊裡，一盡寫明白，
31:25 摩西就吩咐扛耶和華約櫃的利未人講：
31:26 「將此個律法的冊下佇耶和華──恁上帝的約櫃邊，通佇遐做你的干證；
31:27 因為我知你是悖逆的，是頷頸硬的。看啊，我今仔日猶活及恁佇啲，恁尚且悖逆耶和華，何況我死了後啊？
31:28 著聚集恁諸個支派的長老及官長攏來，我欲講諸個話互𪜶聽，也欲叫天叫地互𪜶做干證。
31:29 因為我知我死了後，恁欲全然敗壞，歪斜我所命令恁行的道路，日後恁欲抵著災禍，因為恁欲行耶和華所看做歹的事，用恁的手所做惹伊的受氣。」
摩西的歌
31:30 摩西將此個歌的話頭到尾講互以色列全會聽。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。