上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
申命記
佇摩押及以色列人立約
29:1 諸個是耶和華佇摩押地命令摩西及以色列人立約的話，是伊佇何烈及𪜶所立的約以外的。
29:2 摩西召以色列眾人來，給𪜶講：「耶和華佇埃及地，佇恁的目睭前對法老及伊的眾人臣，以及伊全地所行一切的事恁攏有看見，
29:3 就是你親目看見的大試驗及神蹟，及許個大奇事。
29:4 總是到今仔日耶和華猶無互你會曉悟的心，會看見的目睭，會聽見的耳孔。
29:5 我導恁佇曠野四十年，恁身軀的衫無破，腳裡的鞋也無破。
29:6 恁無食餅，也無飲清酒厚酒。這是欲互恁知，我就是耶和華──恁的上帝。
29:7 恁到此所在，希實本王西宏、巴珊王噩出來及咱交戰，咱就攻擊𪜶，
29:8 取𪜶的地互流便的支派、迦得的支派，及瑪拿西半支派做業。
29:9 所以恁著執守來行此個約的話，通互恁佇一切所行的事亨通。
29:10 「今仔日恁眾人、恁的首領、恁的支派、恁的長老、恁的官長、以色列的查甫丁，恁的子兒恁的某，及你營內的出外人，對恁的劈柴的到恁的汲水的，攏徛佇耶和華──恁的上帝的面前，
29:11 併於上節
29:12 互你入佇耶和華──你上帝的約，也入佇耶和華──你上帝今仔日及你所咒誓的。
29:13 互伊照伊所曾對你講的，閣照伊對你的列祖亞伯拉罕、以撒、雅各所咒誓的，今仔日設立你做伊的百姓，伊做你的上帝。
29:14 我若及恁立此個約，及此個咒誓，
29:15 也是及許個今仔日及咱同徛佇耶和華──咱上帝的面前的，以及今仔日無及咱同佇啲的人立的。」
29:16 「因為咱有怎樣𫢶佇埃及地，也咱有怎樣經過恁所對遐過的列國；這是恁所知的。
29:17 恁也看見𪜶中間通厭惡的物，及𪜶許個柴、石、金、銀的偶像。
29:18 驚了恁中間，查甫人抑是查某人，或是家族或是支派，𪜶的心今仔日悖謬耶和華──咱的上帝，去服事許個國的上帝；閣驚了恁中間有歹根生出毒草及茵蔯，
29:19 伊聽見此個咒詛的話，心內猶原家己安慰講：『我雖然行代誌心硬，將乾的、𣸄的攏毀滅，我猶久會平安。』
29:20 耶和華無欲赦免伊；耶和華的受氣及妒忌欲燒彼人，將此本冊所記一切的咒詛攏欲到佇伊的身軀。耶和華閣欲對天下擦滅伊的名，
29:21 耶和華也欲照此個律法的冊所記載的約一切的咒詛，對以色列眾支派的中間分別伊，互伊抵著災禍。
29:22 就後代，恁後輩的子孫，及遠遠來的外國人，看見彼所在的災禍，以及耶和華所互𪜶抵著的病症，
29:23 閣看見遍地有硫磺，有鹽，有火燒，無種作，無出產，連草也無發生佇遐──親像所多瑪、蛾摩拉、押瑪、洗扁的毀壞，就是耶和華大受氣的時所毀壞的一樣──
29:24 許個列國𪜶攏欲講：『耶和華啥事對此個地按呢行啊？此個受氣許猛烈是甚麼意思啊？』
29:25 人欲講：『是因為𪜶棄拺耶和華──𪜶列祖的上帝的約，是伊導𪜶出埃及地的時所立的，
29:26 𪜶去趁別個上帝服事伊，是𪜶平素所識的上帝，耶和華未曾分派互𪜶的。
29:27 所以耶和華發大受氣佇此個地，將此個冊所記一切的咒詛攏降落佇伊。
29:28 耶和華佇受氣中、大受氣、痛恨拔𪜶出伊的地，㧒𪜶佇外邦，親像今仔日一樣。』
29:29 「秘密的事屬佇耶和華──咱上帝的；顯明的事是永遠屬佇咱及咱的子孫，欲互咱行此個律法一切的話。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。