上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
民數記
逐日例常的祭
28:1 ( 出 29:38-46 )
耶和華吩咐摩西講：
28:2 「你著命令以色列人講：『我的禮物，就是獻互我做芳芳諸個火祭的食物，恁著照日期謹慎獻互我』；
28:3 閣著給𪜶講：恁著獻互耶和華的火祭，就是無瑕疵、未滿年的羊牨仔，逐日二隻，做久長獻的燒祭。
28:4 早起時著獻羊仔一隻，黃昏的時著獻羊仔一隻；
28:5 閣著獻幼麵粉伊法十份一，及調和夾好的油一欣四份一，做素祭。
28:6 這是佇西奈山所定著做常常獻的燒祭，就是獻互耶和華做芳芳的火祭。
28:7 為著此一隻羊仔，著續獻灌奠的酒一欣四份的一份。佇聖所中，你著將厚的酒獻互耶和華做灌奠。
28:8 下昏時，著獻第二隻羊仔，親像早起時的素祭也親像伊的灌奠，獻伊互耶和華做芳芳的火祭。」
安息日獻的祭
28:9 「閣佇安息日，著獻二隻無瑕疵、未滿年的羊牨仔，也用調和油的幼麵粉伊法十份的二分做素祭，及伊的灌奠。
28:10 這是逐個安息日的燒祭；彼個常常獻的燒祭，及伊的灌奠以外。」
月初獻的祭
28:11 「逐月的初一，恁著獻燒祭互耶和華，就是牛牨仔二隻，綿羊牨一隻，無瑕疵、未滿年的羊牨仔七隻。
28:12 為逐隻牛牨仔，著用調和油的幼麵粉伊法十份的三份做素祭；為彼隻羊牨也著用調和油的幼麵粉伊法十份的二份做素祭；
28:13 為著逐隻羊仔著用調和油的幼麵粉十份的一分做素祭及芳芳的燒祭，是獻互耶和華的火祭。
28:14 伊的灌奠著用酒，為著一隻牛牨仔用半欣，為著一隻羊牨用一欣的三份一，為著一隻羊仔就用一欣的四份一。這是逐月的燒祭，一年的中間逐月著按呢。
28:15 閣著用一隻山羊牨做贖罪祭，獻互耶和華；著佇常常獻的燒祭及伊的灌奠以外來獻伊。」
除酵節獻的際
28:16 ( 利 23:5-14 )
「正月十四日是耶和華的𨃟過節。
28:17 此月十五日是節筵，著食無酵餅七日久。
28:18 佇伊的頭一日著有聖會；攏通做勞動的工。
28:19 你著獻火祭做燒祭互耶和華，就是牛牨仔二隻，綿羊牨一隻，未滿年的羊牨仔七隻，恁攏著用無瑕疵的。
28:20 𪜶的素祭，用調和油的幼麵粉；為著一隻牛牨獻十份三；為著一隻羊牨獻十份二；
28:21 為著彼七隻羊仔，逐隻著獻十份一。
28:22 閣獻一隻山羊牨做贖罪祭，給恁贖罪。
28:23 恁獻諸個，著佇早起時的燒祭，就是常常獻的燒祭以外。
28:24 連連七日久，逐日照此個例用芳芳的火祭的食物獻互耶和華，著佇常常獻的燒祭及伊的灌奠，以外來獻。
28:25 第七日恁著有聖會，攏通做甚麼勞動的工。」
七七收土產的節獻的祭
28:26 ( 利 23:15-22 )
「七個七日節，起頭熟的土產，恁獻新的素祭互耶和華的日，著有聖會；攏通做勞動的工。
28:27 恁著獻芳芳的燒祭互耶和華，就是牛牨仔二隻，綿羊牨仔一隻，未滿年的羊牨仔七隻。
28:28 𪜶的素祭用調和油的幼麵粉；為著一隻牛牨獻十份三；為著一隻羊牨獻十份二；
28:29 為著彼七隻羊仔，逐隻著獻十份一。
28:30 閣獻一隻山羊牨給恁贖罪。
28:31 恁著獻諸個，及伊的灌奠佇常常獻的燒祭及伊的素祭以外，恁攏著用無瑕疵的。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。