上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
提摩太前書
6:1 見若佇人的轄下做奴僕的，著看家己的主人堪得受齊全的尊敬，免得上帝的名及道理抵著誹謗。
6:2 設使伊的主人是信道理的，就通因為伊是兄弟來看輕伊；反轉閣卡著服事伊；因為受利益的就是信及得著疼的，你著用諸個教示來苦勸𪜶。
假道理及真財富
6:3 若有人傳別樣的教，無順服咱的主耶穌基督端正的話及照敬虔的教訓的，
6:4 伊是家己肨風，知半項，有好辯論，及相爭話的弊病，
6:5 對按呢就生起怨妒、相爭、誹謗、歹念頭，以及心志敗壞、喪失真理的人的冤家。𪜶掠敬虔做利路。
6:6 若是敬虔兼知足就是大利路；
6:7 因為咱出世無帶甚麼來，過世也𣍐會帶甚麼去。
6:8 若是有通食穿，咱就欲知足。
6:9 獨獨許個想欲發財的，就陷落迷惑及羅網以及多多戇戇有損害的私慾，就是互人沈落佇敗壞及滅無的。
6:10 因為貪財是萬惡的根源。有人戀慕伊，就受迷惑來離開道理，用多多艱苦家己刺鑿。
好的爭戰
6:11 獨獨你屬上帝的人啊，著閃避諸個，來追趇義、敬虔、信、仁愛、吞愞、溫柔。
6:12 著爭戰信的好爭戰，將永活擒住住。你的受召就是為著此個，你也曾承認好的志願佇多多干證的人的面前。
6:13 我佇賞賜活命互萬項有的上帝的面前，以及對本丟‧彼拉多做好的干證的基督耶穌的面前，吩咐你：
6:14 著守此個命令，無瑕疵，無通嫌，到咱的主耶穌基督的顯現。
6:15 到期，大福氣、獨一有權能萬王的王、萬主的主，欲顯明伊，
6:16 就是獨一𣍐死，𫢶佇𣍐通近倚的光，人所未曾看見、也𣍐會看見的，願尊貴及永遠的權勢歸佇伊。阿們！
6:17 今世好額的人你著吩咐𪜶，心志莫得自高，莫得下𪜶的向望佇無定著的錢財；著下佇將萬物滿滿互咱享受的上帝。
6:18 閣吩咐𪜶行好事，好額佇好所行，歡喜賑濟，甘願分互人，
6:19 為著家己積聚好的地基，備辦後來的事，互𪜶擒住真的活命。
6:20 提摩太啊，所交託你的，你著保守伊，離開有名無實的智慧諸個粗俗的虛詞，及相比較的辯論。
6:21 有人自稱有此號智慧，就已經差謬道理啦。
願恩典及恁佇啲！
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。