上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
利未記
立亞倫及伊的子作祭司
8:1 ( 出 29:1-30 )
耶和華吩咐摩西講：
8:2 「你著將亞倫及伊的子，以及衣服，抹𪜶的油，及贖罪祭的一隻牛牨、二隻綿羊牨、一筐無酵餅攏帶來，
8:3 閣招集會眾到會幕門口。」
8:4 摩西照耶和華所命令伊的來行；對按呢會眾就聚集佇會幕門口。
8:5 摩西給會眾講：「這就是耶和華所命令著行的事。」
8:6 摩西帶亞倫及伊的子來，用水給𪜶洗。
8:7 給伊穿內衫，縖帶，穿外袍，褡以弗得，用奇巧的工所織以弗得的帶給伊縖用按呢來縛伊佇伊的身軀，
8:8 閣給伊糽補𧞔，用烏陵及土明，下佇補𧞔內，
8:9 用帽戴佇伊的頭殼，佇帽頭前的頂面糽金牌，就是聖的冕旒，攏是照耶和華所命令摩西的。
8:10 摩西用抹𪜶的油抹會幕及其中所有的物，分別伊做聖；
8:11 閣用彼個油灑壇頂七擺，也抹壇及伊一切的器具，及洗盪的盆及伊的座，分別伊做聖；
8:12 閣用抹的油倒佇亞倫的頭殼頂來抹伊，分別伊做聖。
8:13 摩西帶亞倫的子來，給𪜶穿內衫，縖帶，包頭殼的巾，攏是照耶和華所命令摩西的。
8:14 伊牽贖罪祭的牛牨仔來，亞倫及伊的子按手佇贖罪祭牛牨仔的頭殼，
8:15 就刣伊。摩西提血用指頭仔抹佇壇頂四周圍許個角，互壇清氣，將血倒佇壇腳遐分別伊做聖，給伊贖罪；
8:16 閣提臟腑所有的油及肝裡的網紗，以及二粒腰子及𪜶所有的油，摩西攏燒伊佇壇頂；
8:17 若是牛牨仔，伊的皮、伊的肉、伊的糞，用火燒佇營外，是照耶和華所命令摩西的。
8:18 伊牽燒祭的綿羊牨來；亞倫及伊的子按手佇羊牨的頭殼，
8:19 就刣伊。摩西用血灑佇壇頂的周圍，
8:20 將羊切一塊一塊，摩西用頭，及肉塊以及油攏燒伊。
8:21 用水洗臟腑及腿，摩西就將全牲隻羊燒佇壇頂，做芳芳的燒祭，做火祭獻互耶和華，攏是照耶和華所命令摩西的。
8:22 伊閣牽第二隻綿羊牨，就是設立聖職的禮的羊；亞倫及伊的子按手佇羊的頭殼，
8:23 就刣伊。摩西提淡薄血抹佇亞倫的正旁的耳仔垂，及正手的大哺拇，及正腳的大哺拇，
8:24 閣帶亞倫的子來，摩西用淡薄血抹佇𪜶正旁的耳仔垂及正手的大哺拇，及正腳的大哺拇，摩西閣用血灑佇壇頂的周圍。
8:25 閣取油及肥的尾，以及臟腑一切的油及肝裡的網紗，二粒腰子及𪜶的油，及正腿，
8:26 閣對耶和華的面前、貯無酵餅的筐提出一塊無酵餅，一塊油餅，一塊薄餅，攏下佇油及正腿頂，
8:27 將這一切下佇亞倫的手及伊的子的手做搖祭，佇耶和華的面前搖伊。
8:28 摩西對𪜶的手提落來，燒佇壇裡燒祭的頂面，攏是設立聖職的禮做芳芳是做獻互耶和華的火祭。
8:29 摩西提羊的胸做搖祭，佇耶和華的面前搖伊，是佇設立聖職的禮的羊，摩西所得著的份額，攏是照耶和華所命令摩西的。
8:30 摩西提抹的油及壇頂的血，灑佇亞倫及伊的衫，以及伊的子及伊的子的衫，互亞倫及伊的衫以及伊的子及伊的子的衫相及做聖。
8:31 摩西對亞倫及伊的子講：「將肉煮佇會幕的門口，佇遐食伊，也食設立聖職的禮筐仔內的餅，照我所命令的講：『這是亞倫及伊的子著食的。』
8:32 所剩的肉及餅，恁著用火燒去。
8:33 恁七日久通出會幕的門，到恁受設立的禮的日滿，因為七日久伊欲給恁行設立的禮。
8:34 親像今仔日所行的，耶和華吩咐著按呢行，為著恁贖罪。
8:35 七日久恁著暝日𫢶佇會幕門口，守耶和華所命令的職份，免得恁死，因為我所受的命令是按呢。」
8:36 亞倫及伊的子就行耶和華託摩西所命令一切的事。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。