上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
使徒行傳
保羅上耶路撒冷
21:1 阮已經離別𪜶，開船直直到哥士。隔日到羅底，對遐閣到帕大喇，
21:2 抵著一隻船欲過去腓尼基，就搭伊起身。
21:3 已經會看見居比路，對正旁行過，到敘利亞，佇推羅上山，因為船佇遐卸載。
21:4 尋著有學生，及𪜶住七日。𪜶對神感動，給保羅講：「莫得行到耶路撒冷。」
21:5 諸個日已經滿，阮起身行。眾人及某子，送阮到城外，就攏跪落佇海邊祈禱，大家相辭。
21:6 阮上船，𪜶倒去𪜶兜。
21:7 阮對推羅水路行盡，就到多利買，請安兄弟，及𪜶住一日。
21:8 隔日，起身到該撒利亞，入傳福音的人腓力的家，及伊相及住。伊是彼七人中一個。
21:9 伊有四個查某子，攏是在室女，也做先知。
21:10 阮𫢶遐幾若日，有先知，名亞迦布，對猶太落來，
21:11 就近阮，提保羅的帶縛家己的腳手，講：「聖神講：猶太人佇耶路撒冷，欲按呢縛此條帶的主人，交佇外邦人的手。」
21:12 阮聽見諸個話，就及彼所在的人勸保羅通上耶路撒冷。
21:13 保羅就應講：「恁啥事啼哭，來嘈齪我的心啊？我為著主耶穌的名，若受縛，就死佇耶路撒冷亦已經便啦。」
21:14 伊受苦勸，阮就息，講：「主的旨意得著成，就是。」
21:15 諸個日了後，阮收拾行李上耶路撒冷。
21:16 該撒利亞幾若個學生及阮去，亦導一個居比路人拿孫，是舊的學生，阮欲歇𪜶兜。
保羅訪問雅各
21:17 到耶路撒冷，兄弟歡喜至接阮。
21:18 隔日，保羅及阮入去見雅各；眾長老亦佇啲。
21:19 保羅已經給𪜶請安，就將上帝用伊做工，所行佇外邦的，一項一項講明。
21:20 𪜶聽見，就歸榮光上帝，也對保羅講：「兄弟啊，你看見猶太人的中間信的偌多萬，攏是為著律法啲熱心。
21:21 𪜶曾聽見人講，你教示外邦中的猶太人攏背摩西，講莫得給𪜶的子行割禮，亦莫得趁諸個規例。
21:22 今欲怎樣？𪜶的確會聽見你來。
21:23 所以阮所給你講的你著行伊。阮遮有四個人下願。
21:24 你導諸個人，及𪜶成清氣，出所費互𪜶剃頭毛。按呢，就眾人會知，所聽見講起你的代誌是無影；就你本身亦是守律法來行。
21:25 論到信主的外邦人，阮已經曾寄批議定，著禁戒祭偶像的物，及血、及勒死的物，及淫亂。」
21:26 保羅就導許個人，第二日及𪜶成清氣，入殿，報明清氣的日期滿啦，聽候給𪜶逐人獻禮物。
保羅佇聖殿內受掠
21:27 彼七日啲欲滿，對亞西亞來的猶太人看見保羅佇殿裡，就教唆眾百姓，下手掠伊，
21:28 叫講：「以色列人啊，來幫助，此人就是彼個佇逐所在教示眾人攻擊咱的百姓及律法，及此所在的。閣有導希利尼人入殿，拍垃墋此個聖的所在。」（
21:29 因為𪜶曾看見以弗所人特羅非摩及伊佇城內，拍算保羅有導伊入殿。）
21:30 對按呢通城搖泏，百姓攏走來，掠保羅，拖伊出殿，諸個門連鞭關。
21:31 𪜶啲欲刣伊，有消息傳到營裡的千總講：「通耶路撒冷紛亂。」
21:32 伊連鞭導兵丁及百總幾若個，走落去到𪜶遐。𪜶看見千總及兵丁，就停手無閣拍保羅。
21:33 千總近前掠保羅，命令用二條鍊縛伊；問伊是是誰，做甚麼代誌。
21:34 眾人一個喝一款；因為喊嘩𣍐知彼個實情，就命令帶伊入營盤。
21:35 已經到崎仔，因為眾人挨夾真雄，兵丁就將保羅插上去。
21:36 是眾百姓隨佇後面，叫講：「給伊除去！」
保羅為家己辯護
21:37 保羅互𪜶帶去欲入營盤的時，對千總講：「我一句話給你講，通嗎？」伊講：「你識希利尼話嗎？
21:38 你豈是彼個埃及人，前日起擾亂、導四千個兇手出去曠野的嗎？」
21:39 保羅講：「我是猶太人，出世佇基利家的大數，是出名的城的百姓。求你准我對百姓講。」
21:40 已經准伊。保羅就徛佇崎仔頂，對百姓搖手，眾人靜靜，就用希伯來的腔口對𪜶講：
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。