上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
使徒行傳
保羅佇哥林多
18:1 此霎了後，保羅離開雅典，到哥林多。
18:2 抵著一個猶太人，名亞居拉，出世佇本都；及伊的某百基拉，抵仔對意大利來，因為克勞丟命令猶太人攏離開羅馬。保羅就就近𪜶。
18:3 因為𪜶同工藝，就及𪜶相及𫢶合啲做。𪜶的工藝就是做布棚。
18:4 逐個安息日，保羅佇會堂辯論，苦勸猶太人及希利尼人。
18:5 西拉、提摩太對馬其頓落來的時，保羅就為著道理不止迫切，對猶太人干證耶穌是基督。
18:6 𪜶對敵伊來謗瀆的時，保羅就拂衫，對𪜶講：「恁的血歸佇恁，無我的關係。今了後，我欲就近外邦人啦。」
18:7 就離開去，入一人的厝；彼人名提多‧猶士都，是敬拜上帝的人，伊的厝佇會堂的隔壁。
18:8 管會堂的人名革利司布及全家信主，哥林多人亦多多聽見，信來受洗禮。
18:9 暝時，主佇異象中對保羅講：「莫得驚，著講，通靜靜，
18:10 因為我及你佇啲，無人欲攻擊來害你，因為我有多多百姓佇此個城。」
18:11 保羅住遐一年閣六月日，佇𪜶中間將上帝的道理來教示人。
18:12 迦流做亞該亞總督的時，猶太人同心攻擊保羅，拖伊到公座前，
18:13 講：「此個人勸人拜上帝無照律法。」
18:14 保羅抵抵欲開嘴，迦流給猶太人講：「猶太人啊！設使是甚麼不義奸惡的事，照理我著容允恁。
18:15 總是辯論言語、名字，及恁的律法，恁去家己料理！我愛審判諸個」；
18:16 就趕𪜶離開公座前。
18:17 眾人掠管會堂的所提尼，佇公座前拍伊。諸個代誌迦流攏無掠做要緊。
保羅倒轉到安提阿
18:18 保羅猶𫢶幾若日，就離別諸個兄弟，搭船欲去敘利亞；百基拉、亞居拉相及去。佇堅革哩剪頭毛，有下願的緣故。
18:19 𪜶到以弗所，保羅就留𪜶住遐，家己入會堂及猶太人辯論。
18:20 𪜶請伊加住幾日，無允，
18:21 就離別𪜶，講：「上帝若准，我欲倒轉來就近恁」；就開船離開以弗所。
18:22 到該撒利亞，就上去請安教會，才落去安提阿。
18:23 住遐幾日，閣起身，照次序經過加拉太、弗呂家的地方，堅固眾學生。
亞波羅佇以弗所講道
18:24 有一個猶太人，名亞波羅，到以弗所。伊出世佇亞力山大，是有學問，佇聖經亦不止會。
18:25 伊曾學習主的路，熱心將耶穌的事詳細講來教示人；只有知約翰的洗禮若定。
18:26 伊佇會堂好膽來講；百基拉、亞居拉聽見，就導伊來，對伊排列上帝的路卡詳細。
18:27 亞波羅愛去亞該亞的時，兄弟勸勉伊，閣寄批請學生接納伊。已經到，就對恩典來大大幫助許個信徒，
18:28 因為伊佇眾人的面前出力辯倒猶太人，引聖經指明耶穌是基督。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。