上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
使徒行傳
聖神降臨
2:1 五旬節的期已經到，𪜶攏聚集佇一所在。
2:2 忽然，對天有聲，親像大風啲吹，充滿𪜶所坐歸間的厝，
2:3 就有啲分開的舌出現互𪜶看見，親像火的舌，歇佇逐人的頂面。
2:4 𪜶攏受聖神充滿，才開嘴講別樣的腔口，是照聖神所賞賜𪜶講的。
2:5 彼時，有虔誠的猶太人對天下逐國來的，住佇耶路撒冷。
2:6 此個聲一下起，眾人聚集紛紛亂亂，因為逐人聽見𪜶照伊家己的土腔來講，就攏卬愕；
2:7 奇怪講：「你看，諸個啲講的豈無一概是 加利利人嗎？
2:8 怎樣咱聽𪜶講照咱逐人所出世的土腔啊？
2:9 咱諸個帕提亞人、米太人、以攔人，及𫢶佇米所波大米、猶太，及加帕多家、本都、及亞西亞、
2:10 弗呂家，及旁非利亞、埃及，近倚古利奈的呂彼亞，諸個地方的人，以及對羅馬來的出外人，有的是猶太人，有的是入猶太教的人，
2:11 革哩底人、亞拉伯人，攏聽𪜶用咱的腔口，來講上帝的大事。」
2:12 就攏卬愕躊躇，相及講：「這甚麼意思？」
2:13 亦有別人恥笑𪜶講：「𪜶是飲新酒啲醉。」
彼得佇五旬節的信息
2:14 總是彼得及十一個使徒徛啲，大聲給𪜶講：「猶太人及攏總徛起佇耶路撒冷的百姓啊，恁著知此個，亦著致意聽我的話。
2:15 諸個人是酒醉；親像恁所拍算，因為此霎抵才頂晡九點鐘。
2:16 這就是託先知約珥所講的，講：
2:17 上帝講：佇路尾的時日，
我欲用我的神降落佇凡有肉體的。
恁的後生恁的查某子欲做先知講話；
恁的少年人欲看見異象；
恁的老人欲得著眠夢。
2:18 佇許個日，
我也欲用我的神降落佇我的奴僕女婢，
𪜶亦欲做先知來講。
2:19 頂面佇天裡，我欲顯出奇事；
下面佇地裡，我欲顯出神蹟；
就是血，及火，及煙霧。
2:20 日欲變做暗，
月欲變做血；
佇主大閣榮顯的日未到的代先。
2:21 閣凡若求叫主的名的，會得著救。
2:22 「以色列人啊，著聽我的話：拿撒勒人耶穌，上帝曾用伊佇恁中間行各樣的權能、奇事，及神蹟，來對恁證明伊，這就是恁所知的。
2:23 伊照上帝定著的旨意及代先知的已經受解送，恁諸個借不法的人的手，釘十字架害死伊。
2:24 總是上帝解放許個死的苦痛，互伊復活，是伊𣍐會互死所把縛。
2:25 因為大衛有指伊講：
我看主常常佇我的面前；
伊𫢶佇我的正旁，互我免搖動。
2:26 所以，我的心歡喜，
我的舌快樂；
閣我的肉體也欲𫢶佇向望中。
2:27 因為你無欲將我的靈魂放下佇陰間，
也無欲互你的聖者抵著朽爛。
2:28 你曾用活命的路指示我，
欲互我佇你的面前
滿心快樂。
2:29 「兄弟啊！先祖大衛的事，我通好膽對恁講：伊已經死，閣埋葬，伊的墓到今仔日猶佇咱中間。
2:30 伊既然是先知，閣知上帝曾及伊咒誓，欲佇伊後裔中設立一人坐伊的座位，
2:31 伊代先看出按呢，就論基督的復活講：
伊無放下佇陰間；
亦伊的肉體無抵著朽爛。
2:32 此個耶穌，上帝已經互伊復活，阮諸個攏做伊的干證。
2:33 伊既然互上帝的正手舉伊高高，閣對父受所應允的聖神，就將此個降落，就是恁所看見所聽見的。
2:34 因為大衛未曾上天，獨獨家己講：
主給我的主講：
你坐我的大旁，
2:35 聽候我互你的對敵做你的腳踏椅。
2:36 「按呢，以色列全家著確實知，此個耶穌，上帝已經設立伊做主，做基督，就是恁所釘佇十字架的。」
2:37 眾人聽了，心內刺鑿，對彼得及其餘的使徒講：「兄弟啊，阮著怎樣做？」
2:38 彼得給𪜶講：「恁著反悔，逐人佇耶穌基督的名受洗禮，到互恁的罪赦免，閣欲受聖神的賞賜；
2:39 因為所應允的歸佇恁及恁的子孫，以及攏總遠遠的人，就是見若主──咱的上帝所欲召的。」
2:40 閣另外用多多話干證，來苦勸𪜶講：「恁著救家己脫離此個邪的世代。」
2:41 對按呢接納𪜶的話的人攏受洗禮。彼日，約略加添三千人，
2:42 常常專務使徒的教示，相及交陪，擘餅，祈禱。
使徒中間的生活
2:43 眾人攏驚惶；使徒閣行多多奇事神蹟。
2:44 信的人攏聚集佇一所在，所有的物公家用，
2:45 閣賣物產、家業，照逐人所欠用分互𪜶。
2:46 日日同心專務佇殿內，也佇人家擘餅，用歡喜、誠實的心來食，
2:47 謳咾上帝，亦得著眾百姓歡喜𪜶。主將得救的人日日加添互𪜶。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。