上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
約翰福音
19:1 對按呢彼拉多用鞭拍耶穌。
19:2 兵丁用茦仔編做冕旒戴佇伊的頭殼，閣用紫色的袍給伊穿，
19:3 就近伊，講：「猶太人的王，平安啊！」就搧伊。
19:4 彼拉多閣出去外面給𪜶講：「你看，我導伊出來互恁，互恁知我查了看伊無罪。」
19:5 耶穌戴茦仔的冕旒，穿紫色的袍，出來外面。彼拉多閣給𪜶講：「你看，此個人！」
19:6 諸個祭司頭及差役看見伊，就大聲喉叫講：「釘伊十字架！釘伊十字架！」彼拉多給𪜶講：「恁家己掠去釘！因為我看伊無罪。」
19:7 猶太人應伊講：「阮有律法，也照此個律法，伊應該死，因為伊掠本身做上帝的子。」
19:8 彼拉多聽見此個話，就益發驚，
19:9 閣入公堂，給耶穌講：「你對叨落來？」若是耶穌無應伊。
19:10 彼拉多就給伊講：「你及我講嗎？豈知我有權通放你，亦有權通釘你佇十字架嗎？」
19:11 耶穌應伊講：「若是對頂面互你，就你無權通辦我。所以，將我交互你的人，伊的罪閣卡重。」
19:12 對按呢，彼拉多愛欲放伊，猶太人大聲喉叫講：「你若放此個人，就是該撒的朋友。因為凡若掠家己做王的，是背叛該撒。」
19:13 彼拉多聽見諸個話，就導耶穌出來，也家己坐佇公座，佇一個名叫「舖石的所在」，希伯來的話叫做勒巴大。
19:14 彼日就是備辦𨃟過節的日，約略日中晝。就給猶太人講：「你看，恁的王！」
19:15 𪜶大聲喉叫講：「除去！除去！釘伊佇十字架！」彼拉多給𪜶講：「我將恁的王釘十字架嗎？」諸個祭司頭應講：「該撒以外，阮無王。」
19:16 對按呢就將耶穌交互𪜶去釘十字架。
耶穌受釘十字架
19:17 ( 太 27:32-44 可 15:21-32 路 23:26-43 )
𪜶就收伊。耶穌家己夯伊的十字架出去，到一個名叫「頭殼碗」的所在，希伯來的話叫做各各他。
19:18 佇遐釘伊十字架，閣有二人及伊同釘，一旁一個，耶穌佇中央。
19:19 彼拉多亦寫斬條，下佇十字架，寫講：「猶太人的王，拿撒勒人耶穌。」
19:20 猶太人多多讀此個斬條；因為耶穌受釘的所在近城，閣所寫的是用希伯來、羅馬、希利尼的文字。
19:21 所以猶太人諸個祭司頭給彼拉多講：「莫得寫『猶太人的王』，著寫『伊家己講：我是猶太人的王』。」
19:22 彼拉多應講：「我所寫的，已經寫了啦。」
19:23 兵丁已經釘耶穌佇十字架，就提伊的衫分做四份，逐個兵得著一份；閣提伊的內衫，此領內衫無合鑆，是頂下透織的。
19:24 所以相及講：「莫得拆裂，著來拈鬮，看是誰得著。」這是欲應驗聖經所講：
𪜶相及分我的衫，
拈鬮我的衣服。
19:25 兵丁果然做諸個事。徛佇耶穌十字架邊，有伊的老母及伊的老母的姊妹，革流巴的某馬利亞，及抹大拉的馬利亞。
19:26 耶穌看見老母及所疼的學生徛佇邊頭，就對老母講：「老母啊，看，你的子！」
19:27 閣對學生講：「看，你的老母！」對彼時，彼個學生至接伊到家己的家。
耶穌的死
19:28 ( 太 27:45-56 可 15:33-41 路 23:44-49 )
此個代誌以後，耶穌知眾項事已經明白，因為欲互聖經的話應驗，就講：「我嘴乾。」
19:29 佇遐有一個器具貯醋滿滿，𪜶就提海絨浸醋，縖牛膝草托到伊的嘴。
19:30 耶穌已經受醋，就講：「事明白啦！」就俯頭氣斷。
脇下受槍鑿
19:31 彼時是備辦節的日，猶太人愛免得佇安息日留身屍佇十字架，因為此個安息日是大的日，所以求彼拉多教人摃折𪜶的腳骨，來收𪜶。
19:32 兵丁到，摃折頭一個的腳骨，以及彼個及伊同釘者的腳骨。
19:33 到佇耶穌，看見伊已經死，就無摃折伊的腳骨。
19:34 獨獨有一個兵用槍鑿伊的脇下，血及水連鞭流出。
19:35 看見的人做干證──伊的干證是真，家己知所講是實──互恁亦會信。
19:36 因為諸個代誌成，是欲應驗聖經所講：「伊的骨無一支欲受拍碎。」
19:37 閣聖經有一句講：「人欲看𪜶所鑿的。」
耶穌的安葬
19:38 ( 太 27:57-61 可 15:42-47 路 23:50-56 )
諸個代誌以後，有亞利馬太的約瑟，是耶穌的學生，獨獨驚猶太人，才暗靜做學生。伊來求彼拉多，准伊去收耶穌的身屍。彼拉多允准，就來收伊的身屍去。
19:39 閣有尼哥底某，起頭曾暝時就近耶穌的亦來，帶沒藥摶沈香約略一百斤。
19:40 𪜶就收耶穌的身屍，用幼苧布及香料包伊，照猶太人埋葬的例。
19:41 釘十字架的所在有園，園內有新的墓，攏未曾有人葬的。
19:42 彼日是猶太人備辦節的日，閣因為彼個墓近，所以安置耶穌佇遐。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。