上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
馬太福音
撒種的譬喻
13:1 ( 可 4:1-9 路 8:4-8 )
當彼日，耶穌對厝內出去，坐佇海邊。
13:2 有多多陣的人聚集就近伊，致到伊上船來坐，歸陣的人攏徛佇岸裡。
13:3 就用多多項設譬喻給𪜶講：「你看，有撒種的出去撒種；
13:4 撒的時，有的磕落佇路邊，飛鳥到一盡食伊；
13:5 有的磕落佇石垎的地，土淺的位，因為土無深，就發真緊，
13:6 若是日出曝伊，因為無根就枯焦；
13:7 亦有的磕落佇茦仔內，茦仔發起，遮蔽伊；
13:8 有的磕落佇好的土地，結實，有的百倍，有的六十倍，有的三十倍。
13:9 有耳孔的，著聽！」
用譬喻的目的
13:10 ( 可 4:10-12 路 8:9-10 )
學生就近伊講：「你用譬喻給𪜶講是怎樣？」
13:11 伊應講：「天國的奧妙互恁知，亦無互𪜶。
13:12 因為見若有的，欲互伊，就伊有剩；無的，連伊所有的，亦欲搶伊。
13:13 所以我用譬喻給𪜶講，因為𪜶看亦看無見，聽亦聽無現，亦無曉悟。
13:14 以賽亞所讖語的，是應驗佇𪜶，講：
恁聽是欲聽，若是決斷無曉悟；
恁看是欲看，若是決斷看無見；
13:15 因為此個百姓心鈍，
耳孔重，
𪜶的目睭放瞌，
驚了𪜶用目睭看見，
用耳孔聽見，
用心曉悟，來越輪轉，
我就醫好𪜶。
13:16 「若是恁的目睭有福氣，因為𪜶看見；恁的耳孔有福氣，因為𪜶聽見。
13:17 因為我實在給恁講，前有多多先知及義人愛看恁所看見的，亦無看見，愛聽恁所聽見的，亦無聽見。」
解明撒種的譬喻
13:18 ( 可 4:13-20 路 8:11-15 )
「今此個撒種子者的譬喻恁著聽。
13:19 見若聽天國的道理也無曉悟的，彼個歹者就到，將所撒佇伊的心的搶去；這是撒佇路邊的。
13:20 撒佇石垎的地的，這是人聽道理，連鞭歡喜承受伊，
13:21 總是內面無根，不過是暫時若定，到為著道理抵著有患難、窘逐，連鞭著觸。
13:22 撒佇莿仔內的，這是人聽道理，亦世間的掛慮、錢財的迷惑遮蔽彼個道理，就無結實。
13:23 撒佇好土地的，這是人聽道理來曉悟，伊實在結實，所結的，有的百倍，有的六十倍，有的三十倍。」
稗的譬喻
13:24 閣設譬喻對𪜶講：「天國親像人撒好種子佇伊的園，
13:25 人睏的時，伊的仇讎來，撒稗佇麥中就去。
13:26 到麥發起來續結穗的時，稗亦出現。
13:27 家主的奴僕來給伊講：『頭家啊，你豈是撒好種子佇你的園嗎？對叨落有稗？』
13:28 伊給𪜶講：『這是仇讎做的。』奴僕給伊講：『你愛阮去薅伊嗎？』
13:29 伊就講：『無，驚了恁薅稗，連麥續拔起來。
13:30 容允二項平平大欉，聽候收割。到收割的時，我欲給割的講，代先拾許個稗，縖歸把，通燒伊；獨獨麥著收入我的粟倉。』」
芥菜子及麵酵的譬喻
13:31 ( 可 4:30-32 路 13:18-21 )
閣設譬喻對𪜶講：「天國親像一粒芥菜子，人提去撒佇伊的園。
13:32 此個是百項種子的第一細，到伊大欉，是卡大攏總的菜蔬，續成做樹，致到空中的鳥來歇佇伊的枝。」
13:33 閣用譬喻給𪜶講：「天國親像酵，婦仁人提去，囥佇三斗麵粉的內面，到攏發酵。」
用譬喻的原因
13:34 ( 可 4:33-34 )
諸個攏是耶穌用譬喻給眾人講；若是用譬喻，就無所給𪜶講。
13:35 來應驗早託先知所講的，講：
我欲開嘴設譬喻，
闡明創造世間以來所隱密的。
解明稗的譬喻
13:36 彼時，耶穌互眾人四散，才入厝。伊的學生就近伊，講：「園的稗仔的譬喻給阮解明。」
13:37 伊應講：「撒好種子的是人子；
13:38 園就是世間；好種子的就是天國的子；稗就是歹者的子；
13:39 撒稗的仇讎就是魔鬼；收割的時是世界的路尾；割的就是天使。
13:40 所以親像拾稗仔來用火燒，佇世界的路尾亦欲按呢。
13:41 人子欲差伊的天使對伊的國內收拾，見若互人著觸的及做不法的，
13:42 㧒𪜶佇火爐；佇遐欲有啼哭咬牙切齒。
13:43 彼時，義人欲發出光，親像日，佇𪜶的父的國。有耳孔的，著聽！」
囥寶貝、尋珠、拋網的譬喻
13:44 「天國親像寶貝囥佇園裡，人抵著就囥密伊，因為歡喜才去賣一切所有的，來買彼區園。
13:45 閣天國親像生理人尋好的珠，
13:46 抵著一粒不止值錢的，就去賣一切所有的，來買伊。
13:47 閣天國親像網拋佇海裡，聚集逐類的水族，
13:48 已經滿，就拖上坪，坐啲，拾好的入器具，好的㧒擲佇外面。
13:49 世界的路尾亦欲按呢。諸個天使欲出來，對義人的中間來分別歹人，
13:50 㧒𪜶佇火爐；佇遐欲有啼哭咬牙切齒。」
新舊的物
13:51 「諸個恁攏會曉得𣍐？」𪜶講：「會。」
13:52 伊給𪜶講：「所以見若經學士做天國的學生的，是親像家主對伊的庫房提出新舊的物的。」
拿撒勒人厭賤耶穌
13:53 ( 可 6:1-6 路 4:16-30 )
耶穌已經講諸個譬喻明白，就離開遐。
13:54 到伊的本鄉，佇𪜶的會堂教示𪜶，致到𪜶卬愕，講：「此人對叨落得著此個智慧，及諸個權能啊？
13:55 此個豈是木匠的子嗎？伊的老母豈是叫做馬利亞？伊的兄弟雅各、約瑟、西門、猶大嗎？
13:56 伊的姊妹豈無攏及咱佇遮嗎？按呢此人對叨落得著諸個一切啊？」
13:57 𪜶就厭賤伊。若是耶穌給𪜶講：「先知人佇本鄉本家以外，無尊貴。」
13:58 耶穌佇遐無行多多權能，因為𪜶無信伊。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。