上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
出埃及記
祭司的聖衫
28:1 ( 出 39:1-7 )
「你著對以色列人的中間，互你的兄亞倫及伊許個子來你遮，通做祭司服事我，就是亞倫及亞倫的子拿答、亞比戶、以利亞撒、以他瑪。
28:2 你著給你的兄亞倫做聖的衫，互伊榮光閣媠。
28:3 閣著吩咐一切心有智慧者，就是我用智慧的神所充滿的人，給亞倫做衫，分別伊做聖，通做祭司服事我。
28:4 𪜶所著做的衫就是補𧞔、以弗得、外袍、有花的內衫、帽、腰帶，𪜶著給你的兄亞倫及伊的子做聖的衫，互伊做祭司來服事我。
28:5 𪜶著用金及藍色、紫色、朱紅色的料，及幼苧做伊。
28:6 「𪜶著用金及藍色、紫色、朱紅色的料，及過紡的幼苧，用奇巧的工做以弗得。
28:7 著有披肩二塊，連佇雙旁，互伊相連。
28:8 以弗得頂面奇巧的工所織的帶，著及伊同一樣的做法，互伊相連做一個，用金及藍色、紫色、朱紅色的料，以及過紡的幼苧做的。
28:9 著提二塊紅瑪瑙，佇頂面刻以色列諸個子的名：
28:10 六個名佇此塊寶石，其餘六個名佇彼塊寶石，攏照𪜶出世的次序。
28:11 著用刻寶石的手工，親像刻印，照以色列諸個子的名，刻此二塊寶石，入佇金槽裡。
28:12 著將此二塊寶石安佇以弗得的披肩頂，為以色列人做紀念石。亞倫著佇二個肩頭背𪜶的名，佇耶和華的面前做紀念。
28:13 著用金做二塊槽，
28:14 閣用好金，親像拍索仔，來做二條鍊仔，將諸個拍成的鍊仔，安佇許個槽裡。」
補𧞔
28:15 ( 出 39:8-21 )
「你著用奇巧的工做一個判斷的補𧞔。著及以弗得同一樣的做法：用金及藍色、紫色、朱紅色的料，以及過紡的幼苧做伊。
28:16 補𧞔著四方，拗雙重，長一𠞉，闊一𠞉。
28:17 你著入諸個寶石佇伊的頂面，有寶石四叕：一叕是紅寶石、黃玉、赤玉，這是第一叕；
28:18 第二叕是綠寶石、藍玉、金鋼石；
28:19 第三叕是紫色的瑪瑙、白瑪瑙、紫色水晶；
28:20 第四叕是青玉、紅瑪瑙、碧玉。這攏著入佇金槽內。
28:21 諸個寶石照以色列的子的名共十二塊，親像刻印，每塊刻一個名為著十二支派來做伊。
28:22 著用好金拍鍊仔親像索仔安佇補𧞔。
28:23 佇補𧞔著做二個金環，將此二個環安佇補𧞔的雙頭。
28:24 著將所拍彼二條金鍊仔，連佇補𧞔雙頭二個環。
28:25 用所拍二條鍊仔的雙頭連佇二個槽，安佇以弗得披肩的頭前。
28:26 你著做二個金環，下佇補𧞔雙頭的墘，近以弗得向內彼旁。
28:27 閣著做二個金環，安佇以弗得披肩下面的頭前，倚近相連的所在，佇以弗得奇巧的工所織的帶的頂面。
28:28 𪜶著用藍色的幼帶將補𧞔的環及以弗得的環縛相連，互伊粘佇以弗得奇巧的工所織的帶，互補𧞔及以弗得無離縫。
28:29 亞倫入聖所的時，著將判斷的補𧞔，所刻以色列的子的名，帶佇伊的胸前，佇耶和華的面前常常做紀念。
28:30 你著將烏陵及土明下佇判斷的補𧞔內；亞倫到耶和華面前的時，許個著佇伊的胸前，亞倫著佇耶和華的面前常常將以色列的判斷掛佇胸前。」
祭司的其他聖衫
28:31 ( 出 39:22-31 )
「你著做以弗得內面的外袍，歸領是藍色的。
28:32 袍頂面的對中，著為著頭殼留一個領孔，孔的周圍織領緣，親像戰甲的領孔，免得破裂。
28:33 袍周圍的下腳裒著用藍色、紫色、朱紅色的料做石榴。佇袍周圍，石榴的中間著有金瑊鈴：
28:34 一粒金瑊鈴一粒石榴，佇袍周圍的下腳裒。
28:35 亞倫服事的時著穿伊。伊入聖所到耶和華面前，以及出來的時，有聲通聽見，互伊免死。
28:36 「著用好金做一個牌，照刻印的法度刻佇伊的頂面講『做聖歸耶和華』。
28:37 著用一條藍色的幼帶，將伊縛佇帽頂就是佇帽的頭前。
28:38 此個牌著佇亞倫的頭額，互亞倫擔當聖物的罪；就是以色列人佇一切聖的禮物所分別做聖者。此個牌著常常佇伊的頭額，互𪜶佇耶和華面前得著接納。
28:39 著用幼苧織有叕的內衫，著用幼苧布做帽，閣用綉花的工做腰帶。
28:40 「你著給亞倫諸個子做內衫、做腰帶、做包頭殼的巾，互𪜶榮光閣媠。
28:41 著將諸個給你的兄亞倫及伊的子穿，閣用油抹𪜶，行設立的禮，分別𪜶做聖，互𪜶做祭司來服事我。
28:42 著給𪜶做幼苧布的褲，遮𪜶的下體；褲著對腰到大腿。
28:43 亞倫及伊的子入會幕，抑是就近壇，欲佇聖所服事的時著穿伊，免得𪜶擔當罪來死。這是欲給亞倫及伊的後裔做永遠的例。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。