上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
出埃及記
奉獻聖所
25:1 ( 出 35:4-9 )
耶和華給摩西講：
25:2 「你給以色列人講，著獻禮物互我；見若心所甘願的，恁通給伊收來做禮物互我。
25:3 所著收的禮物：就是金、銀、銅、
25:4 藍色、紫色、朱紅色的料，幼苧，山羊毛，
25:5 染紅的公羊皮，海狗皮，皂莢柴，
25:6 點燈的油，芳芳的品料通做膏油來抹，也做芳香，
25:7 紅瑪瑙及別樣的寶石，通鑲以弗得及補𧞔。
25:8 𪜶著給我起聖的所在，互我通𫢶佇𪜶中間。
25:9 照我一切所指示你的，就是會幕的款式及內中器具款式，恁著照按呢來造。」
約櫃
25:10 ( 出 37:1-9 )
「𪜶著用皂莢柴做一個櫃，長二肘半，闊肘半，高肘半。
25:11 你著用好金包，內外攏著包，四圍著齒金線。
25:12 你著給伊鑄四個金環，安佇伊的四腳；此旁二環，彼旁二環。
25:13 著用皂莢柴做二支槓，用金包伊。
25:14 著將槓串佇櫃邊的環內，通用來扛櫃。
25:15 諸個槓著常常佇櫃的環內，通抽出來。
25:16 著用我所欲賞賜你的律法下佇櫃內。
25:17 著用好金做施恩所，長二肘半，闊肘半。
25:18 著用金做二個𠼻𡀔兵用拍的法做伊，佇施恩所的雙頭。
25:19 此頭做一個𠼻𡀔兵，彼頭做一個𠼻𡀔兵，雙頭的𠼻𡀔兵，及施恩所著歸塊做相連。
25:20 二個𠼻𡀔兵著高高展開翅，用𪜶的翅遮施恩所。𪜶的面著相對，𠼻𡀔兵的面著俯施恩所。
25:21 著將施恩所安佇櫃頂，閣將我所欲賞賜你的律法下佇櫃內。
25:22 我欲佇遐及你聚會，閣欲對施恩所頂就是對法櫃頂二個𠼻𡀔兵的中間，及你講我所欲吩咐你傳互以色列人一切的事。」
排列餅的桌
25:23 ( 出 37:10-16 )
「你著用皂莢柴做一塊桌，長二肘，闊一肘，高肘半。
25:24 著用好金包，四圍齒金線。
25:25 桌的四圍，各做一巴掌闊的橫樑，橫樑頂四圍齒金線。
25:26 你著做四個金環，安佇伊的四腳的四角。
25:27 安環的所在著倚近橫樑，通串槓來扛桌。
25:28 著用皂莢柴做二支槓，用金包伊，通用來扛桌。
25:29 著做盤、碗、杯、瓶通來灌奠；攏著用好金做。
25:30 桌頂常常下排列的餅，佇我的面前。」
燈台
25:31 ( 出 37:17-24 )
「你著用好金做一個燈台。燈台的座及中柱，伊的杯，伊的木，伊的花，攏用拍的法做歸座。
25:32 佇伊的邊仔著分出六枝；燈台的此旁著有三枝，燈台的彼旁著有三枝。
25:33 此旁每枝有三個杯，款式親像杏花，有木、有花；彼旁每枝也有三個杯，款式親像杏花，有木，有花。對燈台分出的六枝攏是按呢。
25:34 燈台柱有四個杯，款式親像杏花，有伊的木，及伊的花。
25:35 二枝的下面有一木及伊相連。閣二枝的下面有一木及伊相連。閣二枝的下面有一木及伊相連。燈台所出的六枝攏是按呢。
25:36 許個木及許個枝攏及伊連做一個，攏用好金照拍的法做。
25:37 著給伊做七個燈盞。著點許個燈，互伊照光佇對面。
25:38 燈台的剪及伊的盤攏著用好金做伊。
25:39 做燈台及這一切的器具用好金一他連得。
25:40 你著謹慎做諸個物件，攏著照佇山頂指示你的款式。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。