上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
但以理書
尼布甲尼撒下令拜金像
3:1 尼布甲尼撒王造金像，高六十肘，闊六肘，祀佇巴比倫省杜拉的平洋。
3:2 尼布甲尼撒王召集諸個總督、欽差、巡撫、按察司、保正司、謀士、法官，及各省的官員來，赴尼布甲尼撒王所立的像行點眼的禮。
3:3 對按呢許個總督、欽差、巡撫、按察司、保正司、謀士、法官，及各省的官員攏聚集，為著尼布甲尼撒所立的像行點眼的禮，就徛佇尼布甲尼撒所立的像的頭前。
3:4 彼時傳命令者大聲叫講：「恁諸個百姓、諸個國、諸個腔口的人啊，有命令傳互恁：
3:5 恁一下聽見哨角、笛仔、琵琶、琴、瑟、笙，及逐樣樂器的聲，就著仆落敬拜尼布甲尼撒王所立的金像。
3:6 見若無仆落敬拜的，欲即時㧒落佇炎熱的火爐。」
3:7 因為按呢眾百姓一下聽見哨角、笛仔、琵琶、琴、瑟、及逐樣樂器的聲，就諸個百姓、諸個國、諸個腔口的人攏仆落敬拜尼布甲尼撒王所立的金像。
但以理的三個朋友受告違令
3:8 彼時，有幾若個迦勒底人進前來告猶大人。
3:9 𪜶對尼布甲尼撒王講：「願王萬歲！
3:10 王啊，你曾出令講，見若人聽見哨角、笛仔、琵琶、琴、瑟、笙，及逐樣樂器的聲，攏著仆落敬拜金像。
3:11 見若無仆落敬拜的，欲㧒落佇炎熱的火爐。
3:12 今有幾若個猶大人，就是你所派管理巴比倫省的事務的沙得拉、米煞、亞伯尼歌；王啊，諸個人無要緊你的話，服事你諸個上帝，也敬拜你所立的金像。」
3:13 彼時，尼布甲尼撒大受氣到極，命令將沙得拉、米煞、亞伯尼歌帶來，𪜶就將諸個人帶到王的面前。
3:14 尼布甲尼撒問𪜶講：「沙得拉、米煞、亞伯尼歌，恁無服事我諸個上帝，也無敬拜我所立的金像，是刁故意嗎？
3:15 今恁閣聽見哨角、笛仔、琵琶、琴、瑟、笙，及逐樣樂器的聲，若便便仆落敬拜我所造的像，就好；總是恁若敬拜，欲即時㧒恁落炎熱的火爐，有甚麼上帝欲救恁脫離我的手啊？」
3:16 沙得拉、米煞、亞伯尼歌應王講：「尼布甲尼撒啊，此個事阮免應你；
3:17 果然按呢，阮所服事的上帝會救阮出炎熱的火爐。王啊，伊也欲救阮脫離你的手；
3:18 若無按呢，王啊，你著知阮決斷無欲服事你諸個上帝，亦無欲敬拜你所立的金像。」
但以理的三個朋友受判死刑
3:19 彼時，尼布甲尼撒滿心受氣，對沙得拉、米煞、亞伯尼歌變面，命令人起火爐，比平常七倍卡熱；
3:20 也命令軍隊中勇猛的幾若人，縛沙得拉、米煞、亞伯尼歌，㧒佇炎熱的火爐。
3:21 𪜶許個人受縛猶原穿褲、袍、及內衫，及其餘的衫，㧒佇炎熱的火爐。
3:22 因為王的命令真緊急，火爐閣真熱，許個掠沙得拉、米煞、亞伯尼歌的人攏互火舌燒死。
3:23 沙得拉、米煞、亞伯尼歌彼三個人攏受縛墜落佇炎熱的火爐。
3:24 彼時，尼布甲尼撒王卬愕，緊緊起來，對伊的謀士講：「咱豈是縛三人㧒佇火裡嗎？」𪜶應王講：「王啊，是啊！」
3:25 王講：「看啊，我看見有四個人，並無受縛，行佇火中，也無受傷；彼個第四個的容貌是親像上帝的子。」
三人受放閣得高升
3:26 對彼霎，尼布甲尼撒行近炎熱的火爐口，叫講：「至高的上帝的奴僕沙得拉、米煞、亞伯尼歌出來，來到遮！」沙得拉、米煞、亞伯尼歌就對火中出來。
3:27 許個總督、欽差、巡撫，及王的謀士，相及聚集看見彼三人，火無力通害𪜶的身軀，𪜶的頭毛也無燒著，衫褲無變換，𪜶也攏無臭火味。
3:28 尼布甲尼撒講：「沙得拉、米煞、亞伯尼歌的上帝是應該謳咾的！因為伊差伊的使者拯救許個倚靠伊的奴僕，𪜶反對王的命令，放拺家己的身軀，佇𪜶家己的上帝以外肯服事敬拜別個上帝。
3:29 所以我出令，諸個百姓、諸個國、諸個腔口的人，見若用話褻瀆沙得拉、米煞、亞伯尼歌的上帝，欲將𪜶的肉割碎碎，𪜶的厝欲做糞埽堆，因為無別個上帝會救人親像按呢。」
3:30 彼時王佇巴比倫省，高升沙得拉、米煞、亞伯尼歌。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。