上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
用鱷魚譬罭埃及王
32:1 十二年十二月初一，耶和華的話臨到我講：
32:2 「人子啊，你著為埃及王法老做哀歌，給伊講：
從前你佇列國中，親像勇的獅；
今你是親像海中的鱷魚。
你𧽵出你的江河，
用腳振動諸個水，
致到江河的水變濁。
32:3 主耶和華按呢講：
我欲用多多國的百姓，
將我的網拋佇你的頂面，
𪜶欲用我的網，
給你拖出來。
32:4 我欲㧒你佇地裡，
放下佇田野，
互空中的飛鳥攏歇佇你的頂面，
互遍地的野獸食你到飽。
32:5 我欲將你的肉㧒佇山裡，
用你高大的身屍填滿山谷。
32:6 我閣欲用你的血灌沃你所泅的地，
淹到諸個山；
河溝欲對你來充滿。
32:7 我拍滅你的時，
欲遮蓋諸個天，
互眾星黑暗，
用密雲遮掩日頭，
月亦無發出光。
32:8 我欲互天的光佇你的頂面攏黑暗，
閣互你的地黑暗。
這是主耶和華講的。
32:9 「我互你敗無的風聲到你所識的逐國。彼時，我欲互多多百姓的心煩惱。
32:10 我佇𪜶的面前舞我的劍的時，我欲互多多國的百姓為著你卬愕，君王亦欲為著你大驚惶。佇你倒落去的日，𪜶逐人為家己的生命愕愕惙。」
32:11 因為主耶和華按呢講：「巴比倫王的刀欲臨到你。
32:12 我欲用勇士的刀互你的多多人倒落去；諸個勇士攏是列國中強暴者。
𪜶欲互埃及的驕傲歸佇無；
埃及的眾百姓欲受剿滅。
32:13 我欲對埃及多多水邊除滅所有的走獸；
人的腳無閣拍濁此個水，
獸的蹄亦無閣踏伊。
32:14 彼時，我欲互𪜶的水坐清，
互𪜶的河流親像油。
這是主耶和華講的。
32:15 我互埃及地荒廢冷靜；
此個地絕無從前所充滿的，
閣我攻擊其中一切徛起的百姓。
彼時，𪜶就知我是耶和華。
32:16 「此個是哀歌，人欲用此個來哀哭，列國諸個查某囝仔欲用按呢來哀哭，𪜶為著埃及及伊的眾百姓亦欲用此個來哀哭。這是主耶和華講的。」
陰間
32:17 十二年十二月十五，耶和華的話臨到我講：
32:18 「人子啊，你著因為埃及的眾人哀哭，閣著將埃及及有名聲的國諸個查某囝仔，及落坑的人，做一下㧒落地下深的所在。
32:19 你的媠贏過是誰啊？
你著落去及無受割禮的人相及倒啲！
32:20 𪜶欲倒佇互刀刣的人的中間。伊受交付佇刀劍，著將伊及伊的眾人拖去。
32:21 強猛的勇士欲佇陰間對伊及幫助伊者講話；𪜶是無受割禮受刀刣的人，已經落去，倒啲無振動。
32:22 「亞述及伊的眾百姓攏佇遐，伊的墓佇伊的四圍；𪜶攏是受刣倒佇刀下者。
32:23 𪜶的墓佇坑中極深的所在。伊的眾百姓佇伊的墓的四周圍，攏是受刣倒佇刀下者；𪜶曾佇活人的地互人驚惶。
32:24 「以攔亦佇遐，伊的眾百姓佇伊的墓的四圍，攏是受刣倒佇刀下，無受割禮落去地下深的所在的；𪜶曾佇活人的地互人驚惶，閣及落坑的人相及擔當凌辱。
32:25 𪜶給伊及伊的眾百姓佇受刣的人的中間安眠床。𪜶的墓佇伊的四周圍，𪜶攏是無受割禮受刀刣者；𪜶曾佇活人的地互人驚惶，閣及落坑的人相及擔當凌辱。伊已經下佇受刣的人的中間。
32:26 「米設、土巴，及伊的眾百姓攏佇遐。伊的墓攏佇伊的四圍，𪜶攏是無受割禮互刀刣者；𪜶曾佇活人的地互人驚惶。
32:27 𪜶𣍐得著及許個無受割禮倒啲的勇士相及倒啲；諸個勇士帶家私落陰間，頭殼睏佇刀劍，骨頭頂有𪜶的罪惡；𪜶曾佇活人的地互勇士驚惶。
32:28 「你欲敗壞佇無受割禮的人的中間，及許個受刀刣的人相及倒啲。
32:29 「以東亦佇遐。伊許個國王及一切的首領雖然有勢力，猶原下佇受刣的人的中間；𪜶欲及無受割禮者以及落坑的人相及倒啲。
32:30 「佇遐有北方眾王的子及一切西頓人，攏及受刣的人落去。𪜶雖然有勢力互人驚惶，猶原受見誚。𪜶無受割禮，及受刀刣者相及倒啲，及落坑的人相及擔當凌辱。
32:31 「法老及伊的軍兵攏互刀刣死，法老看見，為著伊許個眾人就受安慰。這是主耶和華講的。
32:32 我互伊佇活人的地做通驚惶，法老及伊的眾人，欲及受刀刣的人相及下佇無受割禮的人的中間。這是主耶和華講的。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。