上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以西結書
耶和華欲刑罰埃及
30:1 耶和華的話臨到我講：
30:2 「人子啊，你著宣傳講，主耶和華按呢講：
慘啊此日！恁著啼哭。
30:3 因為日近啦，就是耶和華的日近啦，
就是密雲的日，
欲做列國的時期。
30:4 欲有刀劍臨到埃及；
佇埃及受刣的人倒落去的時，
古實人就有痛苦，
𪜶欲掠伊的眾人，
拆毀伊的地基。
30:5 古實、弗、路德、參插的百姓，及古巴，以及同盟的國的百姓攏欲及𪜶相及倒佇刀下。」
30:6 耶和華按呢講：
扶助埃及者亦欲倒。
伊勢力的驕傲欲降低；
對色弗尼的塔起，𪜶攏欲佇遐倒佇刀下。
這是主耶和華講的。
30:7 𪜶欲佇冷靜的地的中間來做冷靜；
伊諸個城亦欲列佇諸個荒廢的城的中間。
30:8 當我放火佇埃及；
見若幫助伊者，攏受滅無。
彼時，𪜶就知我是耶和華。
30:9 「到彼日，欲有使者對我的面前搭船出去，互安然徛起的古實人驚惶；欲有痛苦臨到𪜶，親像埃及的日一樣。看啊，代誌來啦！
30:10 主耶和華按呢講：
我欲用巴比倫王尼布甲尼撒的手，
滅埃及的眾人。
30:11 伊及隨伊的人，
就是列國中強暴的，
欲來毀滅此個地。
𪜶欲拔刀攻擊埃及，
互遍地有受刣的人。
30:12 我欲互許個江河乾，
亦欲用彼個地賣互歹人的手；
我欲用外邦的手，
互彼個地及其中所有的變做冷靜。
這是我──耶和華講的。
30:13 主耶和華按呢講：
我欲毀滅許個偶像，
對羅弗除滅神佛；
的確無閣有君王對埃及地出。
我欲降落驚惶佇埃及地。
30:14 我欲互巴忒羅冷靜，
放火佇瑣安的中間，
行審判的事佇羅的地方。
30:15 我欲傾出我的大受氣佇訓，
就是埃及的衛所，
亦欲滅羅的眾人。
30:16 我欲放火佇埃及，
訓欲抵著大痛苦；
羅欲抵著攻破；
羅弗當頭白日抵著對敵。
30:17 亞捫及比伯實的少年人欲倒佇刀下；
𪜶欲互人掠去。
30:18 我佇答比匿遏折埃及諸個軛，
互伊因為勢力的驕傲息佇伊的中間。
彼時，佇遐日黑暗；
論到此個城，欲有密雲遮蓋，
伊中間的查某子欲互人掠去。
30:19 我欲按呢審判埃及，
𪜶就知我是耶和華。」
埃及破碎的力量
30:20 十一年正月初七，耶和華的話臨到我講：
30:21 「人子啊，我已經遏折埃及王法老的手骨；無包伊的傷無糊藥，無紮布料，通互伊有力攑刀。
30:22 所以主耶和華按呢講：看啊，我及埃及王法老做對敵，欲將伊二支手骨勇者、受遏折者，欲做一下遏折，互刀對伊的手磕落。
30:23 我欲將埃及人分散佇列國，四散佇列邦。
30:24 我欲互巴比倫王的手骨有力，將我的刀交佇伊的手；我欲遏折法老的手骨，伊欲佇伊的面前譆譆孱，親像受死傷的人譆譆孱。
30:25 我欲扶巴比倫王的手骨，法老的手骨欲垂落去；我將我的刀交佇巴比倫王的手，伊欲伸出彼支刀佇埃及地，彼時𪜶就知我是耶和華。
30:26 我欲將埃及人分散佇列國，四散佇列邦；𪜶就知我是耶和華。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。