上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米哀歌
刑罰、悔改、向望
3:1 因為主受氣的柺仔，
來抵著艱苦者，我就是彼個人。
3:2 伊導我，互我行佇黑暗，
無佇光明。
3:3 伊真正通日沓沓出手攻擊我。
3:4 伊互我的肉及皮焦啦去；
伊遏折我的骨頭。
3:5 伊起土堆攻擊我，
用苦毒的物及艱難圍困我。
3:6 伊互我住佇黑暗的所在，
親像死久久的人一樣。
3:7 伊用籬笆圍我，互我走𣍐出；
伊互我的鐵鍊愈重。
3:8 我哀叫求幫助的時；
伊互我的祈禱𣍐得著聽見。
3:9 伊用過拍的石頭塞密我的路；
伊互我的路彎曲。
3:10 伊對敵我親像熊埋伏啲，
親像獅𫢶暗密的所在。
3:11 伊互我迷路，
給我拆碎，互我冷靜。
3:12 伊開弓用我做箭靶。
3:13 伊用箭袋的箭射入我的臟腑。
3:14 我成做我的百姓的笑柄；
𪜶通日用我做歌曲。
3:15 伊用苦毒的物充滿我，用茵蔯給我灌到驚。
3:16 伊用沙拇粒拍折我的嘴齒，
用火灰摻我的身軀。
3:17 你互我的心離開平安遠遠，
我𣍐記得福氣。
3:18 我就講：我的氣力衰敗；
閣我佇耶和華遐攏無向望！
3:19 求你記得我的困苦，
我的艱難親像茵蔯苦膽。
3:20 我的心追想諸個，
就佇我的腹內鬱悶。
3:21 我的心倒轉想此個事，
所以我有向望，
3:22 阮無致到滅無，
是對耶和華諸個慈愛；
因為伊的憐憫無窮盡。
3:23 主的仁慈逐早起換新；
你的誠實極其闊大！
3:24 我的心講：耶和華是我的基業，
因為按呢我欲向望伊。
3:25 見若聽候耶和華，尋求伊者，
伊欲施恩互伊。
3:26 向望耶和華的拯救，
靜靜聽候，
這是好。
3:27 人少年的時背伊的軛，
這是好。
3:28 伊著家己坐，無做聲，
因為此個軛是耶和華下佇伊的身上。
3:29 伊的嘴著俯佇塵埃，
豈採有向望。
3:30 伊著據在人拍嘴䩃，
滿滿受凌辱。
3:31 因為主的確無永遠棄拺人。
3:32 主雖然互人憂悶，
猶久欲照伊百般的慈愛發出憐憫。
3:33 伊互人受苦憂悶，
是伊所甘心。
3:34 人將世上受關監者踏佇腳下，
3:35 抑是佇至高者的面前冤屈人，
3:36 抑是冤枉人的案件，
這是主所無歡喜。
3:37 若是主所命令，
是誰會講伊就成？
3:38 好歹代豈是出佇至高者的嘴嗎？
3:39 人活佇世間，因為家己的罪過受刑罰，
啥事哀怨？
3:40 咱著省察查考咱的路，
閣越轉來歸耶和華。
3:41 咱著獻心攑手，向天頂的上帝。
3:42 阮犯罪悖逆，
你無赦免。
3:43 你用受氣罩阮，追趇阮；
你行剿滅，亦無憐憫。
3:44 你用密雲遮蓋家己，
致到祈禱𣍐會透過。
3:45 你互阮佇萬百姓的中間成做污穢受棄拺的物。
3:46 阮的對敵攏向阮大大開嘴。
3:47 驚惶及陷坑，殘害及毀滅，
攏到佇阮。
3:48 我的百姓的查某子抵著毀滅，
因為按呢我流目屎親像溪。
3:49 我的目睭流目屎，
無停無息，
3:50 直直聽候耶和華俯落看，
對天鑑察。
3:51 因為我的城諸個查某子，
互我觸目傷心。
3:52 無因端及我做仇讎者追趇我，
親像趇鳥仔一樣。
3:53 𪜶互我的生命死佇陷坑，
用一塊石頭填佇我的頂面。
3:54 多多水淹過我的頭殼，
我講：我無命啦！
3:55 耶和華啊，
我對深的陷坑求叫你的名。
3:56 你曾聽我的聲；
我的替氣求叫，
你莫得掩耳孔聽。
3:57 我求叫你的日，你近倚我，
講：免驚！
3:58 主啊，你伸我的冤枉；
你救贖我的生命。
3:59 耶和華啊，你看見我所受的冤屈，
求你給我判斷。
3:60 𪜶怨恨我，謀害我，
你攏有看見。
3:61 耶和華啊，𪜶詈罵我，謀害我，
你攏有聽見。
3:62 亦聽見許個起來攻擊我的人所講的，
以及通日所設欲害我的計謀。
3:63 求你觀看，
𪜶坐啲，抑是起來，攏用我做𪜶的歌曲。
3:64 耶和華啊，你著照𪜶的手所做的，
來報應𪜶。
3:65 你著互𪜶的心剛硬，
互你的咒詛到佇𪜶。
3:66 你著發出受氣追趕𪜶，
對耶和華的天下剿滅𪜶。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。