上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米哀歌
耶路撒冷的憂苦
1:1 唉啊！此個城從前百姓滿滿，
今怎樣孤單啲坐！
從前佇列國中做大的，
今竟然親像寡婦；
從前佇諸個省中尊伊做王后者，
今成做進貢者。
1:2 伊暝間大啼哭，目屎流到滿面；
佇一切親愛的人的中間無一個安慰伊。
伊的朋友攏用詭詐款待伊，
𪜶成做伊的對敵。
1:3 猶大因為抵著苦難，
閣因為受著多多勞苦就遷徙到外邦。
伊𫢶佇異邦中，無通尋著安息；
追趇伊者佇狹狹的所在攏趇著伊。
1:4 錫安的路徑悲傷，因為無人赴伊的節期；
伊的城門攏冷靜；
伊的祭司吐氣；
伊的在室女艱難，伊本身也憂苦。
1:5 伊的對敵做頭；
伊的仇讎亨通；
因為耶和華為著伊多多悖逆，互伊受苦；
伊的囝仔互對敵掠去。
1:6 錫安的查某子，伊的媠一盡無去。
伊的貴族親像尋無草場的鹿；
𪜶無氣力，受趕佇追趇的人的面前。
1:7 耶路撒冷佇患難窘逐的時，
就追想早時一切歡喜的事。
伊的百姓陷落佇對敵的手，無人救護伊的時；
對敵看見，就恥笑伊的冷靜。
1:8 耶路撒冷大大犯罪，
所以成做無清氣的物；
平素尊敬伊的，今看見伊赤身露體就攏看輕伊；
伊家己也吐氣倒退。
1:9 伊的污穢佇伊的衫仔裾；
伊無想著伊的結局，
所以抵著非常的狼狽，
無人安慰伊。
耶和華啊，求你看我的苦難，
因為對敵家己誇大。
1:10 對敵伸手，搶伊一切的寶物；
伊看見外邦人入伊的聖所──
就是你曾吩咐通入你的會中的。
1:11 伊的百姓攏吐氣，四界尋食物；
𪜶用好物換米糧，愛救生命。
耶和華啊，求你看顧，
因為我是真卑賤。
1:12 凡若對遮過的人啊，此個事豈及你無干涉嗎？
請看：
我所抵著的憂悶有甚麼憂悶通比並──
就是耶和華佇伊大受氣的日所行佇我的。
1:13 伊對頂面降落火入我的骨，
來卡贏伊；
伊張羅網，纏絆我的腳，
互我越倒轉；
伊互我通日冷靜昏去。
1:14 我罪過的軛是伊的手所縛的；
絞歸條下佇我的頷頸；
互我的氣力無去。
主交我佇對敵的手我所抵當𣍐住者。
1:15 我城中的勇士主揲伊，
主招集大的會來攻擊我，
制壓我的少年人。
主踏猶大的在室女，
親像佇酒窟中。
1:16 我因為諸個代誌啼哭；
我的目睭目屎泚泚倒；
因為扶持我的生命來安慰我者，
離開我真遠。
我的子兒無依倚，
因為對敵卡贏。
1:17 錫安伸手，無人安慰伊。
論到雅各耶和華已經出命令，
互四圍的人做伊的對敵；
耶路撒冷佇𪜶中間親像無清氣的物。
1:18 耶和華是公義！
因為我有悖逆伊的命令。
眾百姓啊！請聽，
看我的痛苦；
我諸個在室女及少年人攏互人掠去。
1:19 我叫親愛的人，
總是𪜶欺騙我。
我的祭司，我的長老啲尋救命的米糧，
彼時就斷氣佇城內。
1:20 耶和華啊，我佇患難中請你來鑑察。
我的心腸攪絞；
我的心佇我的內面亂糟糟，
因為我大大悖逆。
佇外面，刀劍互人死子；
佇厝內，親像有死失。
1:21 𪜶聽見我吐氣；
亦無人安慰我！
我的對敵攏聽見我所抵著的患難；
因為你做此個事，𪜶攏歡喜。
你欲互報告的日到，
𪜶就親像我。
1:22 願𪜶歹的所行攏排佇你的面前；
你為著我一切的罪過，怎樣款待我，
求你照按呢款待𪜶；
因為我的吐氣真多，我的心也昏去。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。