上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
耶路撒冷的陷落
52:1 ( 王下 24:18—25:7 )
西底家坐位的時二十一歲，佇耶路撒冷做王十一年。伊的老母名哈慕他，是立拿人耶利米的查某子。
52:2 伊行耶和華所看做歹的事，照約雅敬一切所行的。
52:3 耶路撒冷及猶大抵著諸個事，是因為耶和華發出受氣欲對伊的面前趕出𪜶；彼時西底家背叛巴比倫王。
52:4 當西底家坐位第九年十月初十，巴比倫王尼布甲尼撒導伊全軍來攻擊耶路撒冷，佇城的對面紮營，閣佇四圍作土堆攻擊城。
52:5 對按呢城受圍困直到西底家十一年。
52:6 四月初九日，城內飢荒真傷重，致到彼所在的百姓攏無糧。
52:7 城受攻破，一切的兵丁透暝對倚近王的園，二個城牆中的門，彼條路走出城；迦勒底人抵抵佇四圍攻擊城。𪜶就對亞拉巴的路逃走。
52:8 迦勒底的軍兵追趇王，佇耶利哥的平洋追著西底家。伊的全軍攏離開伊四散。
52:9 𪜶掠著王，帶到哈馬地的利比拉，巴比倫王遐；巴比倫王就審判伊。
52:10 巴比倫王佇西底家的目睭前刣死伊許個子，閣佇利比拉刣猶大一切的貴族，
52:11 閣挖西底家二蕊目睭，巴比倫王用鐵鍊鍊伊，帶到巴比倫，關伊佇監裡，直到伊死的日。
聖殿毀滅
52:12 ( 王下 25:8-17 )
巴比倫王尼布甲尼撒王十九年五月初十日，跟隨巴比倫王的侍衛長尼布撒拉旦入耶路撒冷，
52:13 用火燒耶和華的殿及王宮，閣用火燒耶路撒冷一切的厝，就是富貴家的厝。
52:14 跟隨侍衛長迦勒底的全軍就拆毀耶路撒冷四圍的城牆。
52:15 彼時侍衛長尼布撒拉旦將民間喪鄉者及留佇城內所剩的百姓，及許個投降巴比倫王者，以及眾人中所剩者，攏掠去。
52:16 獨獨侍衛長尼布撒拉旦留彼個地方第一喪鄉者，互𪜶治理葡萄園，及種作。
52:17 耶和華殿內的銅柱及耶和華殿內的盆座以及銅海，迦勒底人攏拍破，將許個銅運到巴比倫，
52:18 閣帶去鼎、托仔、剪刀、盤、碗、及所用一切的銅器、
52:19 杯、火爐、盤、鼎、燈台、碗、甌，一切金器的金，銀器的銀，侍衛長攏帶去。
52:20 閣帶所羅門為耶和華的殿所創二支柱、一個銅海，及座下十二隻銅牛，諸個器具的銅𣍐會秤伊的輕重。
52:21 一支柱高十八肘，圓環十一肘，厚四指，中央空殼。
52:22 柱的頂面有銅的柱枓，高五肘；柱枓的周圍有網仔及石榴，攏是銅做的。第二支柱像一款，亦有石榴。
52:23 四面有九十六粒的石榴，佇網仔的周圍，共有一百粒石榴。
以色列人受掠到巴比倫
52:24 ( 王下 15:18-21,27-30 )
侍衛長掠祭司頭西萊雅，及第二級的祭司西番亞，及三個顧門者，
52:25 閣對城內掠一個管兵的官，及佇城內所抵著常常見王的面者七人及軍長的書記點算百姓者，以及城中所抵著的國民六十人。
52:26 侍衛長尼布撒拉旦將諸個人帶到利比拉，巴比倫王遐。
52:27 巴比倫王拍𪜶佇哈馬地的利比拉刣死𪜶。按呢，猶大百姓受掠離開本地。
52:28 尼布甲尼撒所掠的人數記佇下底；佇第七年掠猶大人三千連二十三人；
52:29 尼布甲尼撒十八年對耶路撒冷掠去八百三十二人；
52:30 尼布甲尼撒二十三年，侍衛長尼布撒拉旦掠去猶大人七百四十五名；共有四千六百人。
52:31 猶大王約雅斤受掠了後第三十七年，巴比倫王以未‧米羅達元年十二月二五日，舉起猶大王約雅斤，放伊出監，
52:32 亦用好話安慰伊，互伊的位卡高其餘諸個王的位，就是及伊同佇巴比倫者，
52:33 褪去伊監內所穿的衫。一世人及巴比倫王相及食。
52:34 巴比倫王賞賜伊所欠用的食物，日日互伊一份，歸世人是按呢，直到伊死的日。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。