上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
閣審判巴比倫
51:1 耶和華按呢講：
看啊，我欲起毀滅的風，
攻擊巴比倫及𫢶佇立加米的人。
51:2 我欲差外邦人來到巴比倫，
來簸𪜶，互𪜶的地空虛。
佇伊抵著患難的日，
𪜶欲周圍攻擊伊。
51:3 開弓者，著向開弓者來開弓，向穿甲挺身者來開弓。
莫得惜伊的少年人；
著一盡滅伊的全軍。
51:4 受刣者欲倒佇迦勒底人的地，
受刺者欲倒佇伊的街路。
51:5 雖莽以色列及猶大，𪜶的地方滿滿得罪以色列的聖者，
猶久𪜶無互萬軍的耶和華──伊的上帝棄拺𪜶。
51:6 恁著對巴比倫中走出，
逐人救家己的生命！
莫得佇𪜶的罪中來滅無；
因為這是耶和華報讎的期，
伊欲互𪜶抵著應該受的報應。
51:7 巴比倫平素是耶和華手內的金杯，
互全地的人醉；
列邦曾飲伊的酒，所以列邦發狂。
51:8 巴比倫忽然捙倒毀壞；
著為伊啼哭；
提乳香來止伊的痛疼，
豈採猶會醫得。
51:9 咱想欲醫治巴比倫，
若是伊無得著。
咱著離開伊！逐人倒來去本國；
因為伊的罪案抵天，透到穹蒼。
51:10 耶和華已經顯明咱的公義。
來啊！咱通佇錫安
報告咱的上帝──耶和華的所做。
51:11 恁著磨光恁的箭，
夯住恁的盾牌。
耶和華定著意思攻擊巴比倫，來毀滅伊，所以激動瑪大君王的心；因為這是耶和華報讎，就是伊為著伊的殿來報讎。
51:12 著竪大旗，
攻擊巴比倫的城牆；
著堅固瞭望的台，
派守望的設埋伏；
因為耶和華所講論巴比倫徛起的百姓，
伊有計劃伊，亦有成伊。
51:13 徛起佇多多水的頂面大發財者啊，
你的結局到啦！
貪心的量滿啦！
51:14 萬軍的耶和華指家己咒誓講：
我欲互人充滿恁中間，親像草蜢一樣；
𪜶欲喝喊攻擊你。
謳咾上帝的詩歌
51:15 耶和華用能力創造地，
用智慧建立世界，
用聰明展開諸個天。
51:16 伊一下出聲，空中就有多多水激動；
伊互雲霧對地極淐起來。
伊為著雨，創造閃爁，
伊互風對伊的府庫出來。
51:17 逐人攏愚蠢無智識。
逐個銀匠攏為著伊雕刻的偶像來見誚；
因為伊所鑄的偶像是假的，
也無活氣佇伊的內面，
51:18 攏是空空的，是迷惑人的所做，
到辦理𪜶的時，的確受除滅。
51:19 雅各的份額無親像諸個，
因為伊是創造萬物的主；
以色列也是伊產業的支派。
萬軍的耶和華是伊的名。
耶和華的斧頭
51:20 你是我的斧頭，交戰的家私；
我欲用你拍碎列邦，
用你毀滅列國；
51:21 用你拍碎馬及騎馬的；
用你拍碎戰車及坐佇彼頂面者；
51:22 用你拍碎查甫人及婦仁人；
用你拍碎老人及囝仔；
51:23 用你拍碎少年人及在室女；
用你拍碎牧者及伊的羊群；
用你拍碎作田人及伊的一對牛；
用你拍碎總督及官員。
刑罰巴比倫
51:24 耶和華講：「早巴比倫及迦勒底徛起的百姓佇錫安所行一切的歹，我欲報應𪜶，互恁親目看見。」
51:25 耶和華講：
你此個行毀滅的山啊，
看啊，我對敵你，
你毀滅全地。
我欲伸我的手佇你的頂面，
對山巖捙你落去；
互你成做燒毀的山。
51:26 人的確無對你遐取一塊石做厝角，
亦無一塊石做地基；
你欲永遠拋荒。
這是耶和華講的。
51:27 著佇境內竪大旗，
佇逐國中歕哨角，
刁持備辦列國來攻擊伊，
招集亞拉臘、米尼、亞實基拿諸個國來攻擊伊；
閣派軍長來攻擊伊，互馬兵上來親像粗毛的草蜢，
51:28 刁持備辦列國及瑪代的列王，伊的總督，伊的官員，
及伊所管全地的人，來攻擊伊。
51:29 地振動閣凄慘；
因為耶和華攻擊巴比倫的旨意已經定著，
欲互巴比倫的地拋荒，無人徛起。
51:30 巴比倫的勇士愛交戰，
住佇營盤內。
伊的力已經無，成做親像婦仁人。
𪜶的厝宅受燒，
𪜶的門楗拍折。
51:31 走文書者走去抵著走文書者，
報消息者抵著報消息者，
報告巴比倫王知：
伊的城四面互人取去，
51:32 路頭互人佔去，
蘆竹受火燒，
交戰的人亦驚惶。
51:33 萬軍的耶和華──以色列的上帝按呢講：
巴比倫親像粟埕，已經踏到平平，
閣無偌久，收成的時就到。
51:34 巴比倫王尼布甲尼撒吞食我，壓碎我，
互我成做空的器具。
伊親像大魚吞我，
用我的寶物充滿伊的腹肚，
閣將我吐出。
51:35 錫安徛起的百姓欲講：
巴比倫用暴虐款待我，
及我的身體，
願此個罪歸佇伊。
耶路撒冷人欲講：
願流阮的血的罪歸佇迦勒底徛起的百姓。
耶和華欲幫助以色列
51:36 所以，耶和華按呢講：
看啊，我欲替你伸冤，亦欲替你報仇；
我欲互伊的海乾去，互伊的水泉無水。
51:37 巴比倫欲成做土堆，做野狗住的所在，
做通卬愕、通恥笑者，
亦無人徛起。
51:38 𪜶欲親像勇的獅噤噤哮，
親像細隻獅哮叫。
51:39 當𪜶熱的時，
我欲為𪜶辦酒桌，
互伊酒醉，
互伊快樂，
長睏，永無精神。
這是耶和華講的。
51:40 我欲帶𪜶落去，親像羊仔、
親像公的綿羊、公的山羊到受刣的地。
巴比倫的命運
51:41 示沙克怎樣受攻破？
天下所謳咾者怎樣受霸佔？
巴比倫佇列國中怎樣變做拋荒？
51:42 海水漲起來，淹過巴比倫；
伊互多多湧蓋密。
51:43 伊的城變做拋荒、乾燥的地、沙漠，
無人徛起，無人經過的所在。
51:44 我欲刑罰彼勒佇巴比倫，
我欲挖出伊的嘴所吞的。
萬百姓無閣歸倚伊；
巴比倫的城牆亦倒壞。
51:45 我的百姓啊，恁著對伊的中間出去！
逐人救家己，閃避耶和華的大受氣。
51:46 恁的心通失膽，
亦通因為境內所聽見的風聲來驚惶；
因為今年有風聲傳來；
暝時亦有風聲；
境內有強暴的事，
官長攻擊官長。
51:47 看啊，日子欲到，我欲辦巴比倫雕刻的偶像。
互𪜶全地見誚；
伊許個受刣的人欲倒佇𪜶中間。
51:48 彼時，天地及其中所有的，
欲因為巴比倫失敗來歡喜，
因為行毀滅者欲對北方來到伊遐。
這是耶和華講的。
51:49 巴比倫按怎樣互以色列受刣的人倒落去，
親像按呢伊全地受刣的人亦欲佇巴比倫倒落去。
互佇巴比倫的以色列人的信息
51:50 閃避刀劍者著緊走，
通徛啲！
著佇遠遠的所在記念耶和華，
心內追想耶路撒冷。
51:51 阮因為聽詈罵漏氣，滿面見誚，
因為異邦人入耶和華的厝許個聖的所在。
51:52 所以耶和華講：
看啊，日子欲到，我辦巴比倫雕刻的偶像，
通國受傷的人欲譆譆孱。
51:53 巴比倫雖然上到天，
雖然互伊堅固高的所在閣卡堅固，
猶久有行毀滅者欲對我遮到伊遐。
這是耶和華講的。
巴比倫滅無
51:54 對巴比倫有哀哭的聲；
對迦勒底人的地有大毀滅的聲。
51:55 因為耶和華毀滅巴比倫，
互𪜶中間的大聲息去。
𪜶的湧嘩嘩哮，親像多多的水，
伊響的聲亦發出。
51:56 因為毀滅者來攻擊巴比倫。
伊的勇士受掠，
𪜶的弓抵著遏折；
因為耶和華是行報應的上帝，
伊決斷欲報讎。
51:57 君王──名做萬軍的耶和華的，講：
我欲互伊的貴族、
博士、總督、官員，以及勇士攏酒醉，
永永睏，無精神。
51:58 萬軍的耶和華按呢講：
巴比倫闊大的城牆欲一盡倒壞；
伊高大的城門欲互火燒燎去。
眾百姓所著磨的欲歸佇空空；
列國所著磨的歸佇火，
𪜶攏欲厭倦。
耶利米的信息傳到巴比倫
51:59 猶大王西底家坐位的第四年，上去巴比倫的時，瑪西雅的孫、尼利亞的子西萊雅及王相及去、（西萊雅是王的內侍）先知耶利米有話吩咐伊。
51:60 耶利米將一切欲臨到巴比倫的災禍，就是論到巴比倫所寫一切的話，來記上冊。
51:61 耶利米對西萊雅講：「你到巴比倫的時，要緊著讀此個冊裡的話：
51:62 閣著講：『耶和華啊，你論到此所在曾講欲滅伊，甚至無人徛起連精牲亦無，的確永遠拋荒。』
51:63 你此個冊讀了，就著縛佇一塊石頭，㧒落佇伯拉河中，
51:64 講：『巴比倫為著耶和華所欲降互伊的災禍，的確親像按呢沈落去，𣍐閣起來，伊攏欲厭倦。』」
耶利米的話，到遮為止。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。