上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
巴比倫受侵佔
50:1 耶和華託先知耶利米論巴比倫，論迦勒底人的地所講的話。
50:2 恁著傳報佇列邦中互𪜶聽見，
著徛大旗；
著互𪜶聽見，通隱瞞，講：
巴比倫受攻破，
彼勒見誚，
米羅達拍歹。
伊的佛攏見誚；
伊的偶像攏拍歹。
50:3 「因為有一國對北方起來攻擊伊，欲互伊的地拋荒，無人徛起，人及精牲攏走去。」
以色列倒轉本國
50:4 耶和華講：「彼日、彼時，以色列人欲來，𪜶欲及猶大人相及來，𪜶欲行路，愈行愈哮，來尋𪜶的上帝──耶和華。
50:5 𪜶問錫安的事，面向遐，講：『來啦，恁著結永遠無𣍐記得的約來及耶和華聯合。』
50:6 「我的百姓做迷路的羊，𪜶的牧者互𪜶行差路，互𪜶越去山裡。𪜶對大山行到小山，𣍐記得𪜶安息的所在。
50:7 見若抵著𪜶的，欲吞食𪜶。𪜶諸個對敵講：『阮無罪；因為𪜶得罪耶和華，就是公義徛起的所在，也是𪜶的列祖所向望的耶和華。』
50:8 「恁著對巴比倫中逃走，對迦勒底人的地出去，著親像公的山羊佇羊群的頭前。
50:9 我欲激動多多大國對北方相及來攻擊巴比倫，𪜶欲排陣攻擊伊；伊欲對遐受攻破。𪜶的箭欲親像𠢕射的勇士的箭，攏無空空倒轉來。
50:10 迦勒底欲互人搶去；見若搶伊的攏欲滿意。這是耶和華講的。」
巴比倫陷落
50:11 搶我的業者啊，
因為恁歡喜快樂，
因為恁跳來跳去親像踏五穀的牛母，
也啲哮親像勇的馬。
50:12 恁的老母欲見誚到極，
生你的的確漏氣。
看啊，伊欲列佇諸個國的路尾，
成做曠野、做乾燥的地、做沙漠。
50:13 因為耶和華的大受氣，的確無人徛起，
欲全然拋荒。
見若經過巴比倫的欲卬愕，
也因為伊所抵著諸個災禍來恥笑伊。
50:14 開弓的人啊，恁著佇巴比倫四圍排陣，
著射箭攻擊伊。
莫得保惜恁的箭，
因為伊有得罪耶和華。
50:15 恁著佇伊的四圍喝喊；
伊已經投降。
伊的營寨倒壞啦，
城牆拆毀啦，
因為這是耶和華報讎的事。
恁著向伊報讎；
伊怎樣款待人，也著按呢款待伊。
50:16 恁著對巴比倫剪除撒種的
及收割的時攑鐮仔的。
因為驚壓制的刀劍逐人欲倒去本族，
逐人欲走到本所在。
以色列人倒去
50:17 「以色列是四散的羊，是互獅趕走的。代先是亞述王吞伊，路尾此個巴比倫王尼布甲尼撒，遏折伊的骨頭。」
50:18 所以萬軍的耶和華──以色列的上帝按呢講：「看啊，我欲刑罰巴比倫王及伊的地，親像我曾刑罰亞述王一樣。
50:19 我欲閣導以色列倒來伊的草場，伊欲佇迦密及巴珊食草，閣佇以法蓮山及基列地，伊的心得著飽足。」
50:20 耶和華講：「彼日，彼時欲查以色列的罪過，也攏總無；欲尋猶大的罪惡，也尋無；因為我所留啲的百姓我欲赦免𪜶。」
上帝審判巴比倫
50:21 耶和華講：著上去攻擊米拉大翁的地，
及比割徛起的百姓。
著追趇一盡刣𪜶，
照我一切所吩咐你的去行。
50:22 境內有交戰的聲及大毀滅。
50:23 拍全地的大支鎚怎樣拍折毀壞啊？
巴比倫佇列國中怎樣拋荒啊？
50:24 巴比倫啊，我為你設活罩，
你互你罩著也知。
你互人尋著，掠著；
因為你及耶和華做對敵。
50:25 耶和華已經開伊的軍藏局，
攑出伊大受氣的器械；
因為主──萬軍的耶和華
有代誌佇迦勒底人的地。
50:26 恁著對極遠的邊界來攻擊伊，
開伊的粟倉，
㧒伊成土堆，
一盡滅伊，無留半項。
50:27 著刣伊一切的牛牨，
互𪜶落去受刣。
𪜶有災禍啊！
因為辦𪜶的日，彼個期已經到。
50:28 （有對巴比倫地逃走出來者的聲，佇錫安報告耶和華──咱的上帝報仇，就是伊為著伊的殿來報仇。）
50:29 「著招集射箭的兵就是一切開弓者來攻擊巴比倫。佇伊的四圍紮營來拍伊，通互伊走一個，照伊所做的報應伊；伊怎樣款待人，著照按呢款待伊，因為伊驕傲悖逆耶和華──以色列的聖者。
50:30 因為按呢伊的少年人欲佇伊的街市倒落去。當彼日，伊一切的兵丁欲滅無。這是耶和華講的。」
50:31 主──萬軍的耶和華講：
看啊，驕傲者啊，我做你的對敵，
因為我辦你的日彼個期已經到。
50:32 驕傲者觸著跋倒，無人扶伊起來。
我欲互火佇伊許個城𤏸起來，
將伊四圍所有的一盡燒燎去。
50:33 萬軍的耶和華按呢講：「以色列人及猶大人平平受壓制；凡若掠𪜶者攏給伊顧住住，肯放伊去。
50:34 救贖𪜶者有大氣力，伊的名是萬軍的耶和華。伊欲伸𪜶的冤，互全地得著平安，亦互巴比倫徛起的百姓愕愕惙。」
50:35 耶和華講：
有刀劍臨到迦勒底人及巴比倫徛起的百姓，
及𪜶的貴族及𪜶的博士。
50:36 有刀劍臨到誇口的人，
𪜶就成做戇；
有刀劍臨到伊的勇士，
𪜶就驚惶。
50:37 有刀劍臨到伊的馬，伊的車，
及其中的雜色人；
𪜶欲親像婦仁人一樣。
有刀劍臨到伊的寶物，
就受搶奪。
50:38 有亢旱臨到伊攏總的水，
就欲焦啦去；
因為這是雕刻偶像的地，
人因為神佛來顛狂。
50:39 所以曠野的走獸及豺狼欲𫢶佇遐，刀劍亦欲𫢶佇彼中間，永永無人煙，代代無人徛。」
50:40 耶和華講：「的確無人徛起佇遐，亦無人寄腳佇𪜶中間，欲親像我──上帝捙倒所多瑪、蛾摩拉，及附近的城一樣。
50:41 看啊，有百姓對北方來，
亦有大國及多多君王受激動，對地極來。
50:42 𪜶攑弓及槍，
殘忍無憐憫；
𪜶的聲親像海湧嘩嘩哮。
𪜶騎馬排隊，
親像上陣的人，
巴比倫的城啊，𪜶欲攻擊你。
50:43 巴比倫王聽見𪜶的風聲，
手就軟落去，
痛苦給伊擒住，
痛疼親像欲生子的婦仁人。
50:44 「看啊，伊欲親像獅對約但河邊的樹林起來，攻擊堅固徛起的所在。目𥍉久，我欲互𪜶逃走，離開此個所在。是誰受揀選，我就派伊治理此個地。是誰會比得我？是誰會給我定一個期啊？有甚麼牧者會徛佇我的面前啊？
50:45 所以恁著聽耶和華所計劃攻擊巴比倫的計策，以及伊所註定攻擊迦勒底的旨意。𪜶定著欲將許個羊群的細個者拖去，伊也欲互𪜶徛起的所在荒廢。
50:46 因為巴比倫倒壞的聲，地就振動，𪜶喉叫的聲聽佇列邦中。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。