上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
耶路撒冷陷落
39:1 猶大王西底家九年十月，巴比倫王尼布甲尼撒導伊攏總的軍兵來圍困耶路撒冷。
39:2 西底家十一年四月初九日，城就破。
39:3 耶路撒冷受取的時，巴比倫王的貴族尼甲‧沙利設、三甲‧尼波、太監頭撒西金、博士長尼甲‧沙利設，及巴比倫王其餘一切的貴族攏來坐佇中門。
39:4 猶大王西底家及一切的戰士看見𪜶，就走，透暝對王的園的路，二個城牆中間的門出城，向平洋走去。
39:5 迦勒底的軍兵追趇𪜶，佇耶利哥的平洋趇著西底家，掠伊，就帶到哈馬地的利比拉、巴比倫王尼布甲尼撒遐；伊就審判伊。
39:6 巴比倫王佇利比拉刣西底家諸個子，互伊親目看見，巴比倫王閣刣猶大一切尊貴的人，
39:7 亦閣挖西底家的目睭，用鐵鍊鍊伊，欲帶伊到巴比倫。
39:8 迦勒底人用火燒王宮及百姓的厝，閣拆毀耶路撒冷的城牆。
39:9 彼時，侍衛長尼布撒拉旦將城內所剩的百姓及投降歸服伊者，以及其餘所剩的百姓攏掠去巴比倫。
39:10 侍衛長尼布撒拉旦就將百姓中喪到無半項的人留佇猶大地，當時亦互𪜶葡萄園及田。
耶利米受解放
39:11 巴比倫王尼布甲尼撒論到耶利米，就吩咐侍衛長尼布撒拉旦講：
39:12 「將伊交代你，著好款待伊，通害伊；伊對你講甚麼，你就照按呢給伊做。」
39:13 侍衛長尼布撒拉旦，太監頭尼布沙斯班、博士長尼甲‧沙利設，及巴比倫王諸個官長，
39:14 差人導耶利米出拘留所的院，交代沙番的孫亞希甘的子基大利，導伊倒去𪜶兜。對按呢伊就徛起百姓的中間。
以伯‧米勒的希望
39:15 耶利米猶關佇拘留所院內的時，耶和華的話臨到伊講：
39:16 「你著去給古實人以伯‧米勒講，萬軍的耶和華──以色列的上帝按呢講：看啊，我講降災禍無降福氣的話的確到此個城，到彼日欲成佇你的面前。
39:17 耶和華講：到彼日我欲拯救你，你的確不致交付佇你所驚許個人的手。
39:18 我定著欲拯救你，你不致倒佇刀下，你欲拾著你的生命，因為你倚靠我。這是耶和華講的。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。