上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
耶利米佇乾井裡
38:1 瑪坦的子示法提雅、巴施戶珥的子基大利、示利米雅的子猶甲、瑪基雅的子巴示戶珥聽見耶利米對眾人所講的話，講：
38:2 「耶和華按呢講：見若住佇此個城內者欲對刀劍、對飢荒、對瘟疫來死；獨獨出去歸迦勒底人者會得著活，欲拾著伊的生命來活啲。
38:3 耶和華按呢講：此個城決斷欲交佇巴比倫王軍兵的手，伊欲取伊。」
38:4 對按呢貴族給王講：「求你互此人死；因為伊對城內剩的兵丁及眾百姓講此號的話，互𪜶的手軟。此個人是求互百姓平安，是互𪜶抵著災禍。」
38:5 西底家王講：「看啊，伊佇恁的手頭，王𣍐會干涉恁甚麼代誌。」
38:6 𪜶就掠耶利米，㧒伊佇哈米勒的子瑪基雅的井；彼個井佇拘留所的院內。𪜶用索將耶利米墜落去。井內無水，只有土糜，耶利米就陷佇土糜。
38:7 佇王宮內的太監古實人以伯‧米勒，聽見𪜶將耶利米墜落井（彼時王坐佇便雅憫門口），
38:8 以伯‧米勒就出王宮，對王講：
38:9 「我的主──我的王啊，諸個人款待先知耶利米的攏是歹，有給伊㧒落井；伊會餓死佇遐，因為城內無米糧。」
38:10 王就吩咐古實人以伯‧米勒講：「你對遮帶三十人，趁先知耶利米猶未死，救伊出井。」
38:11 對按呢以伯‧米勒導諸個人相及去，入王宮，到庫房下，對遐提破布舊衫，用索墜落井，到耶利米遐。
38:12 古實人以伯‧米勒給耶利米講：「你用諸個破布及舊衫，墊佇胳下孔，下佇索頂。」耶利米就照按呢行。
38:13 按呢，𪜶就用索拔耶利米出井。耶利米猶原住佇拘留所的院。
西底家問耶利米
38:14 西底家王差人帶先知耶利米，入耶和華的厝第三個門到伊遐。王就對耶利米講：「我問你一項事，你攏通隱密佇我。」
38:15 耶利米應西底家講：「我若給你講，你豈無欲刣死我嗎？我若指點你，你無欲聽。」
38:16 西底家王暗靜對耶利米咒誓講：「彼個創造咱的活命的耶和華是活者，我指伊來咒誓：我的確無刣你，亦將你交互諸個數想你的生命的人的手。」
38:17 耶利米對西底家講：「耶和華──萬軍的上帝、以色列的上帝按呢講：你若出去投降巴比倫王的貴族，你的生命就會活啲，此個城不致互火燒，你及你的全家攏會活。
38:18 你若出去投降巴比倫王的貴族，就此個城欲交佇迦勒底人的手。𪜶欲用火燒伊，你亦𣍐脫離𪜶的手。」
38:19 西底家王對耶利米講：「我驚許個投降迦勒底的猶大人，驚見迦勒底人將我交佇𪜶的手，𪜶會凌辱我。」
38:20 耶利米講：「𣍐啦。求你聽我對你所講耶和華的話，按呢你就得著利益，你的生命也會活啲。
38:21 你若肯出去，耶和華指示我的話就是這：
38:22 看啊，猶大王宮所剩的婦仁人欲帶到巴比倫王的貴族遐。諸個婦仁人欲講：
你知己的朋友使唆你，
卡贏你；
你的腳落落土糜，
𪜶就越轉身退去。
38:23 「人欲將你諸個某及你諸個子帶到迦勒底人遐；你亦𣍐會脫離𪜶的手，欲互巴比倫王的手掠著；你也欲連累此個城受火燒。」
38:24 西底家對耶利米講：「莫得互人知諸個話，你就𣍐死。
38:25 貴族若聽見我有及你講話，𪜶就來尋你，問你講：『你給王講甚麼通對我隱密，阮就無互你死。王對你講甚麼亦攏著給阮講。』
38:26 你就著給𪜶講：『我佇王的面前懇求伊莫得互我閣入約拿單的厝來死佇遐。』」
38:27 後來眾貴族來尋耶利米，問伊，伊就照王所吩咐一切的話來應𪜶。𪜶就息，無閣及伊講話，因為事情無露出。
38:28 對按呢耶利米猶原住佇拘留所的院內，直到耶路撒冷受取的日。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。