上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
以色列人倒轉本國
31:1 耶和華講：「彼時，我欲做以色列逐房頭的上帝，𪜶欲做我的百姓。」
31:2 耶和華按呢講：
以色列互刀刣無了的百姓。
佇曠野得著恩典，
我去互𪜶得著安息。
31:3 早時耶和華對我顯現，講：
我用永遠的疼，疼你，
因為按呢我用慈愛牽你。
31:4 以色列的在室女啊，
我欲閣建立你，你就得著建立；
你欲閣用鈴瓏鼓做妝飾，
及快樂的人做陣跳舞出去；
31:5 你欲閣栽種葡萄園佇撒瑪利亞諸個山，
栽種者欲栽種伊，來享受伊的果子。
31:6 因為欲有一日，以法蓮山守望的人欲叫講：
起來！咱上來去錫安，
到耶和華──咱的上帝遐。
31:7 耶和華按呢講：
恁著為雅各唱歡喜的歌，
為萬國中做頭的國出大聲。
傳報謳咾講：
耶和華啊，
救你的百姓以色列所剩的人。
31:8 看啊，我欲導𪜶對北方來，
聚集𪜶對地極來；
及𪜶來者有睛瞑者、跛腳者、帶娠者、欲生子者；
歸大陣相及來。
31:9 𪜶欲啼哭來。
我欲佇祈禱導𪜶，
我欲佇正直𣍐跋倒的路導𪜶到河邊，
因為我是以色列的父，
以法蓮做我的大子。
31:10 列國啊，著聽耶和華的話，
傳報佇遠的海嶼講：
趕散以色列的欲聚集伊，
閣顧守伊，親像牧者顧守伊的羊群。
31:11 因為耶和華已經救贖雅各，
贖回伊脫離比伊卡強者的手。
31:12 𪜶欲到錫安高的所在唱歌，
閣欲親像河水流到耶和華恩典的地，
得著五穀、酒、油、
羊群、牛群的細隻的
𪜶的心欲親像灌沃的園；
攏無閣憂苦。
31:13 彼時，在室女欲跳舞來歡喜；
少年人、老人，亦欲相及歡喜；
因為我欲互𪜶的悲哀變做歡喜，
亦欲安慰𪜶，互𪜶佇憂悶了後來快樂。
31:14 我欲用油膩互祭司的心滿足；
我的百姓亦欲因為我的恩惠滿意。
這是耶和華講的。
耶和華憐憫以色列
31:15 耶和華按呢講：
佇拉瑪聽見聲啼哭閣大傷悲，
拉結哭伊的子兒，願受安慰，
因為伊的子無去。
31:16 耶和華按呢講：
著禁止你的聲莫得啼哭，
禁止你的目睭莫得流目屎，
因為你做工欲有報賞；
𪜶欲對對敵的國倒來。
這是耶和華講的。
31:17 耶和華講：你的尾境有向望；
你的子兒欲倒來家己的境內。
31:18 我實在有聽見以法蓮家己痛恨，講：
你督責我，我就受督責，
我親像教未上畷的牛仔，
求你互我越倒轉，我就越倒轉，
因為你是我的上帝──耶和華。
31:19 我越倒轉以後就反悔；
受教示以後就拍腳腿；
我就見誚漏氣，因為我擔當少年的時的凌辱。
31:20 耶和華講：以法蓮是我疼的子嗎？
是通歡喜的囝仔嗎？
我見若責備他，猶久深深數念伊；
所以我的心腸為著伊𣍐平安；
我的確欲憐憫伊。
31:21 以色列的百姓啊，
你著為家己立指路牌，
竪引路柱。
你著留心向大路，
就是你所去的原路；
你著倒來，倒來佇你諸個城。
31:22 悖謬的查某囝仔啊，
你四界流無定著，欲到底時啊？
耶和華佇地上創一項新的事，
就是查某人欲保護查甫人。
上帝百姓的光明前途
31:23 萬軍的耶和華──以色列的上帝按呢講：「我互受掠的人倒來的時，佇猶大地及伊許個城，人欲閣用此個話講：
公義的厝，
聖的山啊，願耶和華賜福你。
31:24 猶大及許個城的人，以及作穡人，四界飼羊的人，攏欲相及徛起佇遐。
31:25 因為心神厭倦的人，我已經互伊滿足；心神憂悶的人，我已經互伊知足。」
31:26 先知講：「我睏醒啲想，我的睏真歡喜！」
31:27 耶和華講：「看啊，日子欲到，我欲互以色列家及猶大家人及精牲攏傳種。
31:28 我早前怎樣專心將𪜶拔出、拆毀、捙倒、滅無、困苦，亦欲照按呢專心將𪜶建立、栽種。這是耶和華講的。
31:29 當許個日，人無閣講：
老父食酸的葡萄，
子的嘴齒酸軟。
31:30 逐人欲因為家己的罪來死；見若食酸的葡萄者，𪜶的嘴齒欲軟。」
31:31 耶和華講：「看啊，日子欲到，我欲及以色列家、猶大家立新的約，
31:32 是照我及𪜶的列祖所立的約，佇我牽𪜶的手，導𪜶出埃及地的時所立的。我雖莽做𪜶的丈夫，𪜶猶原背我的約。這是耶和華講的。」
31:33 耶和華講：「許個日了後，我及以色列家所欲立的約是此個：就是我欲用我的律法下佇𪜶的心內，刻佇𪜶的心。我欲做𪜶的上帝，𪜶欲做我的百姓。
31:34 𪜶無閣逐人教示𪜶的厝邊，及𪜶逐人的兄弟，講：『恁著識耶和華』，因為𪜶對大到細攏欲識我。因為我欲赦免𪜶的罪過，無閣記得𪜶的罪。這是耶和華講的。」
31:35 耶和華設太陽做日時的光，
設月及星的定例，做暝時的光，
搖動大海，互伊的湧嘩嘩哮，
萬軍的耶和華就是伊的名。
伊有按呢講：
31:36 諸個定例若會佇我的面前廢無，
以色列的後裔才會佇我的面前絕斷，
永遠𣍐成做國。
這是耶和華講的。
31:37 耶和華按呢講：
若佇頂面的天會量得，
佇下面的地諸個根基會測𢜬得，
就我的確因為以色列的後裔一切的所行來棄拺伊。
這是耶和華講的。
31:38 耶和華講：「看啊，日子欲到，此個城欲給耶和華起造，對哈楠業的樓到角頭的門。
31:39 量的索閣牽出去，直到迦立山，越轉到歌亞。
31:40 㧒身屍及傾火灰整個的山谷，及一切的田園，直到汲淪溪，閣直到東勢馬的門的角頭，攏欲做聖歸佇耶和華，無閣拔出，無閣捙倒，直到永遠。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。