上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
耶利米背軛
27:1 猶大王約西亞的子約雅敬起頭坐位的時，有一個話對耶和華臨到耶利米講：
27:2 「耶和華對我按呢講：你為家己做索及軛，下佇你的頷頸，
27:3 託仗來耶路撒冷見猶大王西底家許個使者的手，互𪜶帶許個物到以東王、摩押王、亞捫族的王、推羅王、西頓王遐，
27:4 閣命令使者，對𪜶的主講，萬軍的耶和華──以色列的上帝按呢講：恁著對恁的主按呢講，
27:5 我用我的大權能及我伸出的手，創造地及地上的人，以及精牲。將伊賞賜我所看做合宜的。
27:6 今我將諸個地攏交互我的奴僕巴比倫王尼布甲尼撒的手，我亦將田野的走獸互伊，做伊的差用。
27:7 列國攏欲服事伊以及伊的子伊的孫，直到伊本國抵著報應的日到。彼時，多多國及大君王欲用伊做奴僕。
27:8 「若有甚麼百姓甚麼國，肯服事此個巴比倫王尼布甲尼撒，亦肯將頷頸掛巴比倫王的軛者我欲用刀劍、用飢荒、用瘟疫刑罰彼個百姓，直到我借伊的手來一盡滅𪜶。這是耶和華講的。
27:9 總是恁，恁通聽恁的先知、恁的卜卦的、恁的圓夢的、恁的行邪術的，恁的師公；𪜶給恁講：『恁𣍐致到服事巴比倫王。』
27:10 𪜶對恁讖語白賊，欲互恁遷徙，離開本所在遠遠，致到我趕恁出，互恁滅無。
27:11 獨獨若有甚麼百姓肯將頷頸掛巴比倫王的軛來服事伊的，我欲互伊猶原住佇本所在，通種作，通徛起。這是耶和華講的。」
27:12 我就照諸個一切的話對猶大王西底家講：「著將恁的頷頸掛巴比倫王的軛，來服事伊及伊的百姓，才會得著活。
27:13 你及你的百姓啥事欲因為刀劍、因為飢荒、因為瘟疫來死，照耶和華論起肯服事巴比倫王彼號國的話啊？
27:14 許個先知給恁講：『恁𣍐致到服事巴比倫王』，莫得聽𪜶，因為𪜶對恁所宣傳的是白賊。
27:15 耶和華講：『我無差𪜶，總是𪜶託我的名宣傳白賊，致到我將恁及許個對恁宣傳的先知攏趕出，相及滅無。』」
27:16 我閣對諸個祭司及此國的眾百姓講：「耶和華按呢講：恁通聽許個先知對恁所讖語的。𪜶講：『看啊，耶和華的厝的器具無偌久欲對巴比倫帶倒來』；其實𪜶對恁所宣傳的，是白賊。
27:17 莫得聽𪜶，著服事巴比倫王來得著活。乜使互此個城變做拋荒？
27:18 𪜶若果然是先知，有耶和華的話到佇𪜶，𪜶就著求萬軍的耶和華，互許個佇耶和華的厝及猶大的王宮，及耶路撒冷剩的器具，無搬去巴比倫。（
27:19 因為萬軍的耶和華按呢講，論到諸個銅柱、銅海、盆座，及留佇此個城所剩的器具，
27:20 就是巴比倫王尼布甲尼撒掠猶大王約雅敬的子耶哥尼雅，及猶大、耶路撒冷諸個尊貴的人對耶路撒冷到巴比倫的時所無搶去的。）
27:21 實在萬軍的耶和華──以色列的上帝按呢講：論到留佇耶和華的厝及猶大王宮，及耶路撒冷的器具，
27:22 許個欲搬到巴比倫留佇遐，到我眷顧𪜶的日。就我欲帶𪜶上來，閣歸此個所在。這是耶和華講的。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。