上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
耶利米受審
26:1 猶大王約西亞的子約雅敬起頭坐位的時，有此個話對耶和華來，講：
26:2 「耶和華按呢講：你著徛佇耶和華的厝的院內，有猶大諸個城來耶和華的厝敬拜者，你著用我攏總命令你對𪜶講的話，給𪜶講，通少一句。
26:3 豈採𪜶肯聽趁，逐人回頭離開𪜶的歹路，就我為著𪜶所行的歹，想欲降互𪜶的災禍通退悔。
26:4 你著給𪜶講，耶和華按呢講：『恁若肯聽我，來行我所設佇恁面前的律法，
26:5 來聽趁我所差到恁遐我諸個奴僕眾先知的話，就是我早早起來所差者（總是恁無聽），
26:6 就我欲互此間厝親像示羅，互此個城做地上萬國咒詛的話柄。』」
26:7 耶利米佇耶和華的厝內講諸個話，祭司、先知，及眾百姓攏有聽見。
26:8 耶利米將耶和華吩咐伊對眾百姓講的話一盡講了，祭司、先知，及眾百姓攏來掠伊，講：「你的確著死！
26:9 你啥事託耶和華的名來讖語，講此間厝欲親像示羅，此個城欲拋荒無人徛起啊？」對按呢眾百姓攏佇耶和華的厝聚集到耶利米遐。
26:10 猶大的貴族聽見諸個代誌，就對王宮上到耶和華的厝，坐佇耶和華的厝新門的門口。
26:11 祭司、先知對貴族及眾百姓講：「此人著擬伊死罪；因為伊有讖語攻擊此個城，抵抵親像恁親耳所聽的。」
26:12 耶利米就對諸個貴族及眾百姓講：「耶和華差我讖語，攻擊此間厝，及此個城，講起恁所有聽見諸個一切的話。
26:13 所以恁今著改恁的路及恁的所做，聽趁恁的上帝──耶和華的聲，耶和華就欲退悔伊所欲降互恁的災禍。
26:14 論到我，看啊，我佇恁的手頭，恁看做好，看做應該的，就照按呢款待我！
26:15 總是恁著確實知，若害死我，就欲互無罪的血歸佇恁及此個城，及其中徛起的百姓；因為耶和華實在有差我到恁遮將諸個一切的話傳到恁的耳孔。」
26:16 貴族及眾百姓就給祭司、先知講：「此人應該擬伊死罪，因為伊是託耶和華──咱的上帝的名來對咱講。」
26:17 國內的老大就有幾若人起來，對聚會的眾百姓講：
26:18 「當猶大王希西家的日，有摩利沙人彌迦對猶大的眾人讖語講：
萬軍的耶和華按呢講：
錫安欲互人犂親像田園；
耶路撒冷欲變做土堆；
此間殿的山欲親像樹林高的所在。
26:19 猶大王希西家及眾猶大人豈有互伊死嗎？希西家豈是敬畏耶和華、懇求耶和華的恩？耶和華就退悔伊所講欲降互𪜶的災禍嗎？今若害死此人，咱就是做大歹，害家己的生命。」
（
26:20 閣有一人託耶和華的名來宣傳，是基列‧耶琳人示瑪雅的子烏利亞，伊照耶利米一切的話來宣傳，攻擊此個城及此個地。
26:21 約雅敬王及伊的眾勇士、貴族聽見伊的話，王就想欲互伊死。烏利亞聽見就驚，走去埃及。
26:22 約雅敬王差人去埃及，就是亞革波的子以利拿單及幾若人到埃及。
26:23 𪜶就對埃及掠烏利亞出來，送到約雅敬王遐；王用刀刣伊，㧒伊的身屍佇平常人的墓。）
26:24 總是，沙番的子亞希甘保護耶利米，才無交佇百姓的手互伊死。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。