上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
耶利米佇燒磁人的厝
18:1 耶和華的話臨到耶利米講：
18:2 「你起來，落去燒磁人的厝，我佇遐欲互你聽我的話。」
18:3 我就落去燒磁人的厝，抵當伊用輪啲轉，做伊的工。
18:4 燒磁人用土做的器具，佇伊的手若歹去，伊就用彼塊土另外做別號的器具；照燒磁人所看做好的來做伊。
18:5 耶和華的話就臨到我講：
18:6 「耶和華講：以色列家啊，我款待恁，豈𣍐會親像此個燒磁人的所做嗎？以色列家啊，土佇燒磁人的手中怎樣，恁佇我的手中亦是按呢。
18:7 我甚麼時論到一族抑是一國講，我欲給伊拔起來、給伊拆毀、給伊毀壞；
18:8 我所講的彼一族，若反悔離開伊的歹，我就欲退悔，所想欲降互𪜶的災禍。
18:9 我甚麼時論到一族抑是一國講，欲建立，欲栽種；
18:10 𪜶若行我看做歹的事，聽趁我的話，我就欲退悔，我所講欲互𪜶的福氣。
18:11 今你著給猶大人及徛起耶路撒冷的百姓講：『耶和華按呢講：我備辦災禍攻擊恁，亦設計謀攻擊恁。恁逐人著越頭離開伊的歹路，改正恁的所行恁的所做。』
18:12 「總是𪜶講：『無向望。阮欲照家己的計謀來行。』逐人照伊歹心的剛硬來做。」
百姓棄絕耶和華
18:13 所以，耶和華按呢講：
恁著去逐國查問，
看是誰聽見此號事？
以色列的百姓有行極通厭惡的事。
18:14 黎巴嫩的雪對田野的石磐豈會絕斷嗎？
對遠遠的所在流落的冷水豈會乾去嗎？
18:15 因為我的百姓𣍐記得我，
向虛假的神燒香，
𪜶互𪜶佇所行的路，佇舊的路觸著，
互𪜶行偏路無填高的；
18:16 致到𪜶的地做通卬愕，
長長互人恥笑；
見若對遐過的欲卬愕搖頭。
18:17 我欲親像用東風佇對敵的面前趕散𪜶。
𪜶抵著患難的日，我欲用尻脊向𪜶，
無欲用面。
謀害耶利米
18:18 𪜶就講：「來啊！咱來設計謀攻擊耶利米；因為祭司有律法，智慧的人有計劃，先知有讖語的話，攏𣍐絕斷。來啊！咱著用舌抵觸伊，伊的話攏免聽伊。」
18:19 耶和華啊，求你致意我，
也聽許個及我爭辯的人的話。
18:20 豈通用歹報好嗎？
因為𪜶開陷坑欲害我的生命！
求你記得我佇你的面前替𪜶求福氣，
互你的大受氣對𪜶越倒轉。
18:21 願你將𪜶的子兒交互飢荒將𪜶交互刀劍；
互𪜶的某無子，做寡婦；
互𪜶的查甫人互死無所滅，
𪜶的少年人佇戰陣互刀刣死。
18:22 你互軍隊忽然臨到𪜶的時，
願對𪜶的厝聽見啼哭的聲；
因為𪜶掘陷坑欲掠我，
設羅網欲絆我的腳。
18:23 耶和華啊，𪜶欲害我許個計謀，
你攏知。
莫得赦免𪜶的罪過，
亦莫得對你的面前擦消𪜶的罪惡，
著互𪜶佇你的面前跋倒；
你受氣的時著辦𪜶。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。