上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
上帝眷顧以色列
2:1 耶和華的話閣臨到我講：
2:2 你去向耶路撒冷人的耳孔叫講，耶和華按呢講：
你少年的恩愛，
婚姻的愛情，
你怎仔樣佇曠野，
佇未曾種作的地跟隨我，
我攏給你記得。
2:3 彼時以色列做聖歸耶和華，
做伊起頭熟的土產；
見若吞食伊的欲算做有罪，
災禍欲臨到𪜶。
這是耶和華講的。
以色列祖先的罪惡
2:4 雅各的家啊，以色列家的逐房頭啊，恁著聽耶和華的話。
2:5 耶和華按呢講：
恁的列祖看我有甚麼不義，
竟然離開我遠遠，去趁許個虛假者，
來做虛假者啊？
2:6 𪜶亦無講：
彼個導咱出埃及地的耶和華佇叨落？
伊是導咱經過曠野，
沙漠及深坑的所在，
亢旱、死蔭的地、
無人經過，
無人徛起的境界。
2:7 我導恁入肥的地，
互恁食彼中間的果子及好物；
總是恁入來了就拍垃墋我的地，
互我的產業成做可惡的。
2:8 祭司攏無講，
耶和華佇叨落咧？
講解律法的識我。
官長悖謬我；
先知靠巴力來讖語，
閣趁無利益的事。
上帝譴責伊的百姓
2:9 耶和華講：我因為按呢欲及恁爭辯，
亦欲及恁的子子孫孫爭辯。
2:10 恁著過去基提諸個海嶼來觀看，
差人去基達留心查考，
看曾有此號事抑無。
2:11 豈有一國改換𪜶的上帝嗎？
其實許個是上帝！
總是我的百姓將𪜶的榮光來換彼個無利益的。
2:12 諸個天啊，著因為此個來卬愕，
極其驚惶，盡在冷靜！
這是耶和華講的。
2:13 因為我的百姓做二項歹代，
就是我做活水的源頭，𪜶離開我，
閣為家己開池，
是破裂𣍐貯水的池。
以色列不忠的結局
2:14 以色列是奴僕嗎？
是家中生的奴僕嗎？
為何成做受搶的物啊？
2:15 勇的獅向伊噤噤哮，出大聲，
互伊的地拋荒；
城亦攏燒毀，無人徛起。
2:16 羅弗人及答比匿人亦拍碎你的頭殼頂。
2:17 此個事豈是你家己取的嗎？
因為你的上帝──耶和華導你行路的時，
你有棄拺伊。
2:18 今你啥事佇埃及的路，是欲飲西曷的水嗎？
你啥事佇亞述的路，是欲飲大河的水嗎？
2:19 你家己的歹欲警戒你；
你悖逆的事欲責備你。
對按呢通知，通看出，你棄拺你的上帝──耶和華，
無存敬畏我的心，
就是歹，閣艱苦的事。
這是主──萬軍的耶和華講的。
以色列拒絕敬拜耶和華
2:20 我佇古早的時遏折你的軛，解開你的索。
你講：我順服；
因為你佇逐個高山頂、逐欉青翠的樹腳屈落身軀行淫。
2:21 若是我曾栽種你是上等的葡萄樹，
全然是真的種子；
你對佇我怎樣變做別款葡萄樹的歹枝啊？
2:22 你雖莽用鹼、用多多雪文來洗，
你的罪惡的痕跡猶原顯出佇我的面前。
這是主耶和華講的。
2:23 你豈可會講：
我無染著垃墋、無隨諸個巴力啊？
你看你山谷中的路，就知你所行的怎樣。
你是單陵𠢕走的駱駝，走來走去。
2:24 你是野驢，慣勢佇曠野，
慾心發動就吸風；
𤞚的時是誰會阻止伊啊？
見若尋伊的免著磨；
佇伊彼月的確會尋著。
2:25 你著禁止你的腳免致無鞋，
禁止你的嚨喉免致嘴乾。
總是你講：這是無採工，啊。
我已經戀慕別個，我欲隨𪜶。
以色列該受責罰
2:26 賊互人掠著，怎樣見誚，
以色列家及𪜶的君王、貴族、
祭司、先知亦攏按呢見誚。
2:27 𪜶對柴頭講：你是我的父；
對石頭講：你是生我的。
𪜶用尻脊向我，
無用面向我；
到抵著患難的時才講：
起來，來救阮。
2:28 你為家己所造的上帝佇叨落？
伊若會救你佇你抵著患難的時，
就著起來救你！
猶大啊，你的上帝的數額及你的城的數額平平多。
2:29 耶和華講：
恁啥事及我爭辯？
恁攏悖逆我。
2:30 我督責恁的子兒是空空，
𪜶無受警戒。
恁的刀，
親像猛獅吞咬恁的先知。
2:31 此世代啊，
恁著明耶和華的話。
我對佇以色列豈曾做親像曠野？
抑是曾做親像黑暗的地啊？
我的百姓啥事講：
阮脫離約束，閣歸向你啦？
2:32 在室女豈會𣍐記得伊的妝飾嗎？
新娘豈會𣍐記得伊的媠衫？
總是我的百姓𣍐記得我𣍐算得日！
2:33 你怎樣修整你的路，要求寵愛？
連歹婦仁人，你亦用你的路教示𪜶。
2:34 閣你的衫仔裾有無罪的喪鄉人的血；
是佇挖厝孔的所在抵著，
是佇逐所在攏有。
2:35 你猶久講：我無罪；
耶和華的受氣的確越轉離開我。
看啊，我欲審問你；
因為你家己講：我無犯罪。
2:36 你啥事走東走西，欲改換你的路啊？
你欲因為埃及來見誚，
親像前因為亞述來見誚一樣。
2:37 你亦欲雙手抱頭殼，對遐出來；
因為耶和華已經棄絕你所倚靠者，
你亦𣍐對𪜶得著亨通。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。