上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
耶利米書
1:1 便雅憫地亞拿突城的祭司中，希勒家的子耶利米的話記佇下底。
1:2 當猶大王亞們的子約西亞坐位的十三年，耶和華的話臨到伊。
1:3 閣佇猶大王約西亞的子約雅敬坐位的時，直到猶大王約西亞的子西底家十一年的路尾，五月間耶路撒冷人受掠的時，耶和華的話臨到伊。
耶利米受選召
1:4 耶和華的話臨到我講：
1:5 我未創造你佇腹肚內的代先，我識你；
你未出胎的代先，我分別你做聖；
設立你做列國的先知。
1:6 我就講：嗐啊！主耶和華啊，你看，我𣍐曉講，因為我是囝仔。
1:7 總是耶和華對我講：
你通講我是囝仔，
因為我見有差你，你著去；
我見有吩咐你，你著講。
1:8 你莫得驚𪜶，
因為我及你佇啲，
欲救你。
這是耶和華講的。
1:9 耶和華就伸伊的手摸我的嘴，耶和華給我講：
你看，我有將我的話下佇你的嘴。
1:10 看啊，今仔日我設立你佇列邦列國的頂面，
是為著欲拔出、欲拆毀、欲敗壞、欲捙倒，
欲建立、欲栽培。
二個異象
1:11 耶和華的話閣臨到我講：「耶利米啊，你看見甚麼？」我講：「我看見杏樹的一枝。」
1:12 耶和華就對我講：「你所看是著；我啲關顧我的話，來成伊。」
1:13 耶和華的話第二擺臨到我講：「你看見甚麼？」我講：「我看見一個鼎啲滾，伊的面對北勢向過來。」
1:14 耶和華就對我講：「欲有災禍對北方發出，臨到此所在一切徛起的百姓。」
1:15 耶和華講：「看啊，我欲召北方列國的眾族；𪜶欲來，逐個安座位佇耶路撒冷諸個城門口，周圍攻擊城牆，亦欲攻擊猶大一切的城。
1:16 論到此個百姓一切的歹，就是離開我、向別個上帝燒香、跪拜𪜶的手所做的，我欲講起我的判斷，來攻擊𪜶。
1:17 所以你著縖腰，起來，將我所吩咐你一切的話給𪜶講；莫得因為𪜶來驚惶，驚了我互你佇𪜶的面前來驚惶。
1:18 看啊，因為我今仔日互你成做堅固的城、做鐵柱、做銅牆，來抵當全地以及猶大的列王、貴族、祭司，及此所在的眾百姓。
1:19 𪜶欲攻擊你，總是𣍐會贏你；因為我及你佇啲，欲拯救你，這是耶和華講的。」
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。