上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以賽亞書
上帝對悖逆者的責罰
65:1 平素未曾問我者，今我互𪜶問；
未有尋我者，今我互𪜶抵著；
未有求叫我的名者，我對𪜶講：
我佇遮！我佇遮！
65:2 我通日伸手向許個悖逆的百姓；
𪜶出在家己的意思行好的路。
65:3 諸個百姓常常當面惹著我的受氣；
佇園中獻祭，
佇磚瓦頂燒香；
65:4 徛起佇墓內，
歇佇隱密的所在，
食豬肉；
𪜶的器具內有可惡的物做湯；
65:5 閣對人講：你著徛開！
通倚近我，因為我比你卡聖。
諸個人是我鼻孔中的火熏，
是通日啲𤏸的火。
65:6 看啊，這攏寫佇我的面前。
我無欲靜靜，的確欲行報應，
報應佇𪜶的胸前，
65:7 耶和華講：
因為恁的罪惡，及恁的列祖的罪惡，
佇山裡燒香，
佇嶺頂褻瀆我，
所以我欲照𪜶平素所行的，
報應佇𪜶的胸前。
65:8 耶和華按呢講：親像佇葡萄葩內抵著有新酒，
有人講：通毀壞，
因為有福氣佇彼內面。
我因為我諸個奴僕的緣故亦欲照按呢來行，
無欲一盡滅𪜶。
65:9 我欲對雅各的中間導出後裔，
對猶大的中間導出承接我的眾山者。
我揀的百姓欲承接伊；
我諸個奴僕欲佇遐徛起。
65:10 沙崙欲成做飼羊的所在；
亞割的山谷欲成做牛群倒啲睏的所在，
攏是欲互尋我的百姓所得著。
65:11 總是恁諸個放拺耶和華，
𣍐記得我的聖山，給迦德辦桌，
給米尼灌奠調和的酒者，
65:12 我欲註定恁歸佇刀下，
攏欲屈身受刣；
因為我叫，恁無應；
我講話，恁無聽趁；
反轉行我目睭中看做歹的，
揀我所無歡喜的。
65:13 所以，主耶和華按呢講：
看啊，我的奴僕欲食，恁欲枵；
看啊，我的奴僕欲飲，恁欲嘴乾；
看啊，我的奴僕欲歡喜，恁欲見誚。
65:14 看啊，我的奴僕因為心快樂出歡喜的聲，
恁欲因為心憂愁哀哭，
閣因為心神憂傷哀哮。
65:15 恁欲留恁的名，
互我揀的百姓指伊來咒詛。
主耶和華欲刣恁，
另外用新的名稱伊的奴僕。
65:16 按呢，佇地上為家己求福氣者，
欲向真實的上帝求福氣；
佇地上來咒誓者，
欲指真實的上帝來咒誓。
因為，早前的患難已經𣍐記得，
亦對我的目睭前囥密。
新天新地
65:17 看啊！我創造新天新地；
以前的事無閣紀念，亦無閣追想。
65:18 恁著因為我所創造的來永遠歡喜快樂；
因為我創造耶路撒冷做歡喜的，
創造伊的百姓做快樂的。
65:19 我欲因為耶路撒冷來歡喜，
因為我的百姓來快樂；
其中的確無閣聽見啼哭的聲及哀哮的聲。
65:20 其中的確無有幾日仔死去的嬰仔，
亦無有歲壽無滿足的老人；
因為一百歲死者猶算是囝仔，
一百歲死的罪人猶久是受咒詛的。
65:21 𪜶欲起厝，家己徛起；
栽種葡萄園，來食伊的果子。
65:22 𪜶無欲起造，互別人徛伊；
𪜶無欲栽種，互別人食伊；
因為我的百姓的日子欲親像樹的日子；
我揀的百姓親手著磨得著的欲久長享受伊。
65:23 𪜶的確無空空著磨，
所生者亦無抵著災害，
因為𪜶攏是得著耶和華賜福者的後裔；
𪜶的子孫亦欲及伊有份。
65:24 𪜶猶未求叫，我就應伊；
抵抵啲講的時，我就聽伊。
65:25 豺狼欲及羊羔相及食；
獅欲食草親像牛；
土粉欲做蛇的食物。
佇我的聖山遍地，
攏無損傷，無殘害。
這是耶和華講的。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。