上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以賽亞書
耶和華對以色列的疼。
54:1 你無懷孕、無生子的，著唱歌；
你未曾經過生子艱苦的，著出聲唱歌，出歡喜的聲；
因為家己𫢶的婦仁人比有丈夫者生子卡多。
這是耶和華講的。
54:2 著開闊你布棚的地，
放大你徛起的帳幅，通限定；
著牽長你的索，
堅固你的杙仔。
54:3 因為你欲向左向右來開闊；
你的後裔的確得著列國做業，
閣互拋荒的城有人徛起。
54:4 莫得驚惶，因為你的確無致到見誚；
亦莫得畏小人，因為你無致到受凌辱。
你的確𣍐記得少年的時的見誚，
無閣記念你守寡的時的凌辱。
54:5 因為創造你的是你的丈夫；
萬軍的耶和華是伊的名。
救贖你的是以色列的聖者；
伊的確稱做全地的上帝。
54:6 耶和華召你，
親像召受棄拺心內憂傷的某，
就是少年的時所娶受棄拺的某。
這是你的上帝所講的。
54:7 我放離你不過霎仔久，
總是欲用大慈悲收你倒轉。
54:8 我發出受氣，
暫時對你掩面，
總是欲用永遠的慈愛憐憫你。
這是耶和華救贖你的主講的。
54:9 因為這在我看親像挪亞的大水。
我怎樣咒誓無閣互挪亞的大水氾濫遍地，
我亦照按呢咒誓無閣受氣你，
責備你。
54:10 大山會徙開，
小山會移徙；
獨獨我的慈愛的確無離開你；
我平安的約亦無移徙。
這是憐憫你的耶和華講的。
耶路撒冷的未來
54:11 你此個受困苦、互大風搖動𣍐得著安慰的人啊，
我欲用彩色安置你的石頭，
用藍色的寶石下你的地基；
54:12 閣用紅寶石造你的城壔址，
用紅玉造你的城門，
用寶石造你四圍的邊界。
54:13 你的子兒攏欲互耶和華教示；
你的子兒欲得著大平安。
54:14 你欲因為公義得著徛在，
欲離開制壓遠遠，無致到驚惶；
你欲離開災禍遠遠，因為伊的確無近倚你。
54:15 就豈採有人聚集，總是是對我；
見若聚集攻擊你的，欲因為你來跋倒。
54:16 鐵匠歕火炭、製造合用的器械的是我所創造；
我也創造陷害人的、互伊行剿滅。
54:17 見若為著攻擊你來造的器械的確無成路用；
見若佇審判的時起來攻擊你的舌，
你欲定伊的罪。
這是耶和華的奴僕的產業，
也是𪜶對我所得著的義。
這是耶和華講的。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。