上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以賽亞書
以色列外邦的光
49:1 諸個海嶼啊，著聽我的話！
諸個百姓啊，著留心對遠遠來聽！
對我佇胎裡，耶和華就揀召我；
對我佇老母的腹肚，伊就叫我的名。
49:2 伊互我的嘴親像利刀，
將我囥佇伊的手的致蔭下；
閣互我成做磨光的箭，
將我囥佇伊的箭袋；
49:3 對我講：你是我的奴僕以色列；
我欲因為你得著榮光。
49:4 我就講：我著磨是空空；
我盡力是無利益也無採工。
若是我的判斷在佇耶和華；
我的報賞在佇我的上帝。
49:5 耶和華對胎裡，造就我做伊的奴僕，
欲互雅各歸向伊，
互以色列聚集佇伊遐。
因為耶和華看我做尊貴；
我的上帝也成做我的氣力。
49:6 伊有講：你做我的奴僕，
振興雅各的支派，
互以色列中得著保全的倒轉來，
這猶是小可事，
我欲設立你做列邦的光，
做我的拯救者，到佇地極。
49:7 救贖以色列的聖主──耶和華，
對彼個互人所看輕、百姓所厭惡、
官長所壓制的按呢講：
君王欲看見你就起來徛，
首領也欲跪拜；
這攏是為著耶和華是真實的，
就是以色列的聖者有揀你。
耶路撒冷的復興
49:8 耶和華按呢講：
佇得著接納的時，我有聽你；
佇拯救的日，我有幫助你。
我欲保護你，
互你做百姓的約的中保；
閣興起土地，
互人承接拋荒的地做業。
49:9 也對受捆縛的人講：恁著出來！
對許個𫢶佇黑暗的人講：恁著顯現！
𪜶欲佇路裡得著食，
佇一切無草的山得著糧草。
49:10 𪜶無枵無嘴乾，
熱氣及炎日無欲傷害𪜶；
因為憐憫𪜶的欲導𪜶，
牽𪜶到水泉邊。
49:11 我欲互我的眾山成做路；
我的大路也欲填高。
49:12 看啊，諸個人欲對遠遠來；
看啊，諸個人欲對北方西方來；
也諸個人欲對秦國來。
49:13 諸個天啊，應該出歡喜的聲！
地啊，應該快樂！
眾山，應該出聲唱歌！
因為耶和華有安慰伊的百姓，
也欲憐憫伊許個困苦者。
49:14 錫安講：耶和華有棄拺我；
主已經𣍐記得我。
49:15 婦仁人豈會𣍐記得伊食奶的嬰仔，
無憐憫伊所生的子？
𪜶豈採有𣍐記得的，
總是我無𣍐記得你。
49:16 看啊，我將你刻佇我的手掌；
你的城牆常常佇我的目睭前。
49:17 你的子兒欲緊緊倒來，
毀壞你的，及互你拋荒的，欲離開你出去。
49:18 你著攑目四界看；
𪜶眾人攏聚集來歸倚你。
耶和華講：我指我的活命來講：
你欲用𪜶一切做妝飾來穿伊，
閣用𪜶做帶來縖腰，親像新娘一般樣。
49:19 論到你拋荒冷靜的所在，
及你受毀壞的地，
今百姓多徛起甚狹；
吞滅你的欲離開你遠遠。
49:20 你失落子以後所生許個子欲對你講：
此個所在我徛起甚狹，
求你互我有所在通徛起。
49:21 彼時你心內欲講：我已經失落子家己徛起，
是受掠的，漂流佇外面。
是誰給我生諸個？
是誰將諸個養飼到大漢？
看啊，我孤單的時，
諸個佇叨落？
49:22 主耶和華講：
看啊，我欲向列國攑手，
向萬百姓竪大旗；
𪜶欲將你的眾子抱來，
將你的眾查某子揹來。
49:23 列王欲做你的養父；
王后欲做你的奶母。
𪜶欲將面俯落地，
向你跪拜，
閣舐你的腳的土粉。
你就知我是耶和華；
凡若向望我的，的確無見誚。
49:24 猛人搶去的豈會搶倒轉？
強的人所搶掠的豈會救伊嗎？
49:25 總是耶和華按呢講：
猛人所搶掠者，欲搶倒轉；
強的人所搶者，欲得著救。
及你相爭者我欲及伊相爭，
我也欲救你的子兒。
49:26 閣我欲互許個壓制你的食家己的肉，
𪜶亦欲飲家己的血到醉，親像飲甜酒一樣。
見若有血氣的欲攏知我──耶和華是你的救主，
是救贖你的主，是雅各的大權能者。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。