上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以賽亞書
上帝應允拯救伊的百姓
43:1 雅各啊，創造你的耶和華，
以色列啊，彼個造成你者，
按呢講：
你使驚！因為我救贖你。
我曾叫你的名召你，你是我的。
43:2 你對水中經過，我的確及你相及佇啲；
你經過江河，水的確無淹密你；
你對火中行過去，的確無受燒，
火焰亦無𤏸佇你的身上。
43:3 因為我是耶和華──你的上帝，
是以色列的聖者──你的救主；
我已經互埃及做你贖回的價錢，
互古實及西巴做你的替身。
43:4 因為我看你做寶貝，做尊貴；
閣因為我疼你，
所以我互人替你，
互列國的人替你的生命。
43:5 莫得驚，因為我及你相及佇啲；
我欲導你的後裔對東方來，
閣對西方招集你。
43:6 我欲對北方講，放出來！
對南方講，莫得拘留！
將我的眾子對遠遠導來，
將我的眾查某子對地極導倒來，
43:7 見若用我的名來稱者，
是我為著家己的榮光創造者，
是我所做成，所創造者。
以色列是耶和華的見證人
43:8 你著將有目睭亦睛瞑、
有耳孔亦臭耳聾的百姓攏總導伊出來！
43:9 萬國著聚集；
眾百姓著聚會。
其中是誰會將此個講明，
亦將前的事講互阮聽啊？
𪜶通導干證來，家己顯明𪜶做著；
抑是𪜶聽見就講：這是真實。
43:10 耶和華講：恁是我的干證的，
是我所揀的奴僕。
互恁知，來信我，
閣明白我就是耶和華。
佇我的代先無有受造的上帝；
佇我的以後亦無。
43:11 只有我，我是耶和華；
除我以外無有救主。
43:12 我曾指示，我曾拯救，我曾講明，
閣佇恁中間無有別樣的上帝。
所以耶和華講：
恁是我的干證。
我就是上帝；
43:13 對有日子以來，我就是耶和華；
無一個會救人脫離我的手。
我欲行代誌是誰會阻止啊？
逃離巴比倫
43:14 救贖恁的主──耶和華、
以色列的聖者按呢講：
因為恁的緣故，
我已經差人到巴比倫；
閣我欲互迦勒底人敗落親像逃走的百姓，
攏坐𪜶嘩嘩哮的船。
43:15 我是耶和華──恁的聖者，
是創造以色列者，是恁的君王。
43:16 耶和華佇大海中開路，
佇大水中開路，
43:17 互車、馬、兵丁、勇猛的人攏出來，
𪜶做一下倒落去，𣍐閣起來；
𪜶滅無，親像熄去的火。
43:18 耶和華按呢講：
恁通紀念前的事，
亦通想早時的代誌。
43:19 看啊，我欲做一項新的事；
今啲發現，恁豈知嗎？
我欲佇曠野開道路，
佇沙漠開江河。
43:20 山裡的走獸欲尊重我；
山狗及鴕鳥亦欲按呢。
因為我互曠野有水，
互沙漠有河，
通互我的百姓、我所揀者飲。
43:21 此個百姓是我為著家己所造的，
欲報揚我的名聲。
以色列人的罪惡
43:22 雅各啊，你無有求叫我；
以色列啊，你反轉厭煩我。
43:23 你無帶你的羊做燒祭來互我，
亦無有用祭物尊敬我；
我無因為所獻的物互你著磨，
亦無因為乳香互你厭倦。
43:24 你無用銀為我買菖蒲，
亦無用祭物的油互我飽足；
反轉互我因為你的罪惡著磨，
互我因為你的罪過厭倦。
43:25 只有我因為家己的緣故擦滅你諸個過失；
我亦無紀念你諸個罪惡。
43:26 你著點醒我，你我通相及辯論；
你通排列你的情理，通得著稱做義。
43:27 你開基的祖犯罪；
你的中保悖逆我。
43:28 所以，我欲凌辱聖所的首領，
互雅各受咒詛，
互以色列受詈罵。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。