上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
以賽亞書
上帝對以色列的保證
41:1 眾海嶼啊，著佇我的面前靜靜；
眾百姓著得著新的氣力，
攏著近前來才通來講話，
咱通大家來辯論。
41:2 是誰對東方興起一人，
用公義召伊來到伊的腳前啊？
將列國交互伊，
互伊管轄君王，
將𪜶親像塵埃交互伊的刀，
親像風吹的草仔幼交互伊的弓。
41:3 伊追趕𪜶，
行伊所未曾行的路，
安然過去。
41:4 是誰做此個來成伊，
對起頭召歷代啊？
我──耶和華！
是起頭者，
亦是路尾者，
我就是伊。
41:5 海嶼看見就驚惶；
地極亦愕愕惙，
就近倚來。
41:6 𪜶逐人相幫助，
對兄弟講：著壯膽！
41:7 木匠勉勵銀匠，
用鎚拍光的勉勵拍砧的，
論銲鑰的工夫講，銲了好；
閣用釘釘住，互伊無搖動。
41:8 獨獨你──以色列是我的奴僕，
雅各──是我所揀選的，
我的朋友亞伯拉罕的後裔，
41:9 你是我對地極所帶來的，
對地的角頭所召來的，
閣對你講：你是我的奴僕；
我揀選你，亦無棄絕你。
41:10 你莫得驚惶，因為我及你相及佇啲；
莫得愞懾，因為我是你的上帝。
我的確堅固你，我的確幫助你；
我的確用我公義的正手扶持你。
41:11 看啊，凡若大受氣你者的確攏漏氣見誚；
及你相爭者的確親像無，亦欲滅無。
41:12 及你相爭者，你欲尋𪜶亦尋無；
及你爭戰者欲親像無物，成做空虛。
41:13 因為我耶和華──
你的上帝欲牽你的正手，
給你講：免驚！
我欲幫助你。
41:14 親像𫊥蚓的雅各及恁以色列人，
免驚！
耶和華講：我欲幫助你。
救贖你的就是以色列的聖者。
41:15 看啊，我欲互你做
拍五穀新的器具利閣有齒；
你欲將山嶺拍到碎碎，
互山頭親像粗糠。
41:16 你欲簸𪜶，風欲給𪜶吹去；
捲螺風欲給𪜶掃去。
總是你欲因為耶和華來歡喜，
因為以色列的聖者來誇口。
41:17 喪鄉困苦的人尋水亦尋無；
𪜶因為嘴渴，舌乾。
我──耶和華欲應𪜶；
我──以色列的上帝的確無放拺𪜶。
41:18 我欲佇無草的山開江河，
佇山谷中開水泉；
我欲互沙漠變做水池，
互乾地變做水泉。
41:19 我欲佇曠野栽柏香樹、
皂莢樹、岡拈樹，及野橄欖樹。
我佇沙漠欲將松樹、杉樹，
及黃楊樹做一下栽；
41:20 通互人來看、來知、
來想、相及明白；
這是耶和華的手所做的；
是以色列的聖者所創造的。
耶和華向假神挑戰
41:21 耶和華講：
恁著提起恁的案件；
雅各的人君講：
恁著排列恁有證據的理由。
41:22 𪜶著排列伊，著互阮知將來欲怎樣，
互阮知以前的事是甚麼，
互阮通講究，得著知事的結局，
抑是將欲來的事講互阮聽。
41:23 著互阮知將來的事，
通互阮知恁是上帝。
或是好，或是歹，恁著行伊，
互阮卬愕來相及看。
41:24 看啊，恁屬佇無，
恁的所做屬佇空虛；
彼個揀選恁者是可惡。
41:25 我對北方興起一人，伊就來；
伊對日出的所在求叫我的名者，
伊欲踏掌權者，
親像灰土，
親像燒磁師傅踏土一樣。
41:26 是誰對起頭講明此個事，互阮知？
是誰對起頭講明，互阮講伊無錯啊？
總是無有講明；
無有排列；
無有聽見恁的話者。
41:27 我代先對錫安講：
看啊，看啊，我欲將一位報好消息者賞賜耶路撒冷。
41:28 我看伊，無一人；
𪜶中間亦無謀士佇我問的時通應一句。
41:29 看啊，𪜶攏是空虛，
𪜶的所做是無物。
𪜶所鑄的偶像攏是風，
攏是空虛的。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。