上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
創世記
大水
7:1 耶和華對挪亞講：「你及你全家攏著入大船；因為佇此世代的中間，我看見你佇我的面前是義人。
7:2 見若清氣的精牲，你著帶七隻公的七隻母的；無清氣的精牲，你著帶一隻公的一隻母的；
7:3 天裡的鳥也著帶七隻公的七隻母的，通留𪜶的種，活佇全地；
7:4 因為閣過七日，我欲落雨佇地上四十日四十暝，將我所造逐號的活物攏對地上剿滅。」
7:5 挪亞就照耶和華所命令伊的一盡去行。
7:6 當大水氾濫佇地上的時，挪亞六百歲。
7:7 挪亞就及伊的子伊的某伊的媳婦攏入大船，閃避大水。
7:8 清氣的精牲及無清氣的精牲，飛鳥及地上一切的蟲𧒴，
7:9 攏一對一對，有公的有母的，到挪亞遐進入大船，照上帝命令挪亞的。
7:10 過許個七日，大水氾濫佇地上。
7:11 當挪亞六百歲，二月十七日彼日，深淵的水源攏裂開天也破隙，
7:12 四十日四十暝落雨佇地面上。
7:13 抵抵彼日，挪亞及伊的子閃、含、雅弗，及挪亞的某及伊三個媳婦，攏入大船。
7:14 𪜶及百獸，各照伊的類，一切的精牲，各照伊的類，一切趖佇地上的蟲𧒴，各照伊的類，一切有翅的，各照伊的類，一切的飛鳥，各照伊的類，攏總進入大船。
7:15 見若肉體、內面有活氣的，攏一對一對到挪亞遐，入大船。
7:16 見若入大船的，是有公有母的肉體，照上帝所命令伊的。耶和華就給伊關啲。
7:17 水氾濫佇地上四十日，水漲愈高，互大船淐浮，船就離地。
7:18 水勢真大，佇地上直直漲起來，船漂流佇水面。
7:19 水勢佇地上極其大，天下的高山攏互伊淹密。
7:20 水勢比山加漲高十五肘，山攏互伊淹密。
7:21 見若佇地上有肉體的動物，就是飛鳥、精牲、走獸，及一切趖佇地上的蟲𧒴，以及所有的眾人，攏死。
7:22 見若佇乾地、有鼻孔喘氣的生靈攏死。
7:23 見若地上一切的活物攏剿滅，人及精牲、蟲𧒴，以及天中的飛鳥，𪜶攏對地上受剿滅，只有挪亞參許個及伊佇船裡的留啲。
7:24 水勢真大，佇地上歷過一百五十日。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。