上一章 下一章 [ 條列 | 表格 | 整段 ] 著作權聲明 使用授權書PDF版 使用授權書Word版
詩篇
耶和華的律法
119:1 所行完全、遵趁耶和華律法者，
此號人有福氣！
119:2 遵守伊干證的話，專心尋伊者，
此號人有福氣！
119:3 𪜶無做不義的事，
𪜶遵趁伊的道路。
119:4 你曾將你教示的話吩咐阮，
是愛阮殷勤遵守。
119:5 願我的趨向定著，
來守你的律例。
119:6 我對重你一切的誡命，
就不致見誚。
119:7 我學習你公義的判斷，
就欲用正直的心感謝你。
119:8 我欲守你的律例；
求你通一盡放拺我！
順趁耶和華的律法
119:9 少年人著用甚麼來清氣伊的所行？
是著照你的話來細膩行！
119:10 我專心尋你；
求你通互我迷路離開你的誡命。
119:11 我將你的言語囥佇我的心內，
免得我得罪你。
119:12 耶和華啊，你是應該受謳咾者！
求你將你的律例教示我！
119:13 你所講一切的判詞我用嘴唇報揚伊。
119:14 我歡喜你干證的路，
親像歡喜一切的財物。
119:15 我欲靜靜想你教示的話，
亦欲注重你的道路。
119:16 我欲佇你的律例中家己快樂；
我無𣍐記得你的話。
遵守耶和華的律法得福氣
119:17 求你用大恩款待你的奴僕，互我得著活，
我就欲守你的話。
119:18 求你開我的目睭，
互我看出你律法中的奇妙。
119:19 我佇地上是做寄腳者；
求你通對我隱密你的誡命！
119:20 我的心爆裂，
因為時常切切欣慕你的判詞。
119:21 你責備驕傲、受咒詛的人，
就是迷路離開你的誡命的人。
119:22 求你給我除去凌辱及看輕，
因為我守你干證的話。
119:23 貴族坐啲濫糝議論我，
若是你的奴僕靜靜想你的律例。
119:24 你干證的話是我所歡喜的，
是我的謀士。
決定遵守耶和華的律法
119:25 我的生命敆住佇土粉；
求你照你的話拯救我活！
119:26 我講起我所行的路，你應我；
求你將你的律例教示我！
119:27 求你互我明白你教示的路，
我就靜靜想你的奇事。
119:28 我的心神因為憂苦來消溶；
求你照你的話互我勇健！
119:29 求你互我離開奸詐的路，
將你的律法恩賜我！
119:30 我有揀信實的路，
將你的判詞下佇我的面前。
119:31 我戀慕你干證的話；
耶和華啊，求你通互我見誚！
119:32 你開闊我的心的時，
我就走佇你誡命的路。
求主賜智慧
119:33 耶和華啊，求你將你律例的路指示我，
我欲徹底遵守！
119:34 求你互我智慧，我就守你的律法，
閣欲專心執守。
119:35 求你互我行你誡命的路，
因為此個路是我所歡喜的。
119:36 求你互我的心向你干證的話，
無向不義的錢財。
119:37 求你互我的目睭越走無看虛假，
閣互我佇你的路中來活。
119:38 你的奴僕敬畏你，
求你為伊堅固你的話！
119:39 求你互我所驚的凌辱離開我，
因為你的判詞是好。
119:40 我欣慕你教示的話；
求你佇你的公義互我來活！
倚靠耶和華的律法
119:41 耶和華啊，願你照你的話，互你的慈愛，
就是你的救恩，臨到我，
119:42 我就有話通應彼個凌辱我者，
因為我倚靠你的話。
119:43 求你互真理的話無一盡離開我的嘴，
因為我向望你的判斷。
119:44 我欲常常守你的律法，
直到永遠。
119:45 我欲行佇寬闊的所在，
因為我有講究你教示的話。
119:46 我亦欲佇君王的面前講論你干證的話，
亦無致到見誚。
119:47 我欲佇你的誡命中家己快樂；
諸個誡命平素是我所疼惜的。
119:48 我疼惜你的誡命，
我欲對伊攑起手；
你的律例我亦欲靜靜想伊。
因耶和華的律法得安穩
119:49 求你記得對你的奴僕所應允的話，
因為你曾互我有向望。
119:50 你的話將我救活；
我佇患難中，對這得著安慰。
119:51 驕傲的人盡在侮慢我，
總是我未曾偏離你的律法。
119:52 耶和華啊，我紀念你對早以來的判詞，
就家己得著安慰。
119:53 我因為棄拺你的律法的歹人，
就大受氣，親像火𤏸。
119:54 我佇寄腳的厝，
平時用你的律例做詩歌。
119:55 耶和華啊，我暝間紀念你的名，
守你的律法。
119:56 我得著按呢，
是因為我守你教示的話。
意愛耶和華的律法
119:57 耶和華是我的基業；
我曾講：我欲守你的話。
119:58 我曾專心求你的恩；
願你照你的話憐憫我！
119:59 我深深想我所行的路，
就越轉腳向你干證的話。
119:60 我守你的誡命，
趕緊無延迁。
119:61 歹人的索縛纏我，
總是我無𣍐記得你的律法。
119:62 我因為你公義的判斷，
半暝欲起來感謝你。
119:63 見若敬畏你，及守你的教示的人，
我及𪜶做伴。
119:64 耶和華啊，你的慈愛遍滿地面；
求你將你的律例教示我！
耶和華律法的寶貴
119:65 耶和華啊，你曾好款待你的奴僕是照你所講的話。
119:66 求你將好的聰明及智識教示我，
因為我信你的誡命。
119:67 我未受苦以前有行迷路，
總是我今守你的話。
119:68 你是好，所行亦是好；
求你將你的律例教示我！
119:69 驕傲的人造作無影話攻擊我，
總是我欲專心守你的教示。
119:70 𪜶的心鈍親像油包密，
總是我歡喜你的律法。
119:71 我有受苦是做我的利益，
因為欲互我學習你的律例。
119:72 你所講的律法是做我的利益，
贏過千萬個金銀。
耶和華律法的公正
119:73 你的手創造我，成持我；
求你互我智慧，通學習你的誡命！
119:74 敬畏你的人看見我就欲歡喜，
因為佇你的話我有向望。
119:75 耶和華啊，我知你的判斷是公義；
你互我受苦是對佇信實。
119:76 求你用你的慈愛安慰我，
照你對你的奴僕所講的話。
119:77 願你的慈悲臨到我，互我活，
因為你的律法是我所歡喜的。
119:78 願驕傲的人受見誚，因為𪜶無理由枉屈我；
總是我欲靜靜想你的教示。
119:79 願敬畏你的人歸向我，
𪜶就知你干證的話。
119:80 願我的心完全守你的律例，
互我不致見誚。
求主解救
119:81 我的心神欣慕你的救恩到昏去，
總是佇你的話我有向望。
119:82 我因為向望你的話目睭花，講：
你甚麼時欲安慰我？
119:83 因為我親像佇火薰中的皮袋，
總是我無𣍐記得你的律例。
119:84 你的奴僕的日子有偌多啊？
你欲底時審判窘迫我的人？
119:85 驕傲的人就是無趁你的律法者，掘陷坑欲害我。
119:86 你的誡命一盡誠實；
𪜶無因端窘迫我，求你幫助我。
119:87 𪜶險險滅無我佇世間，
總是我無放拺你的教示。
119:88 求你照你的慈愛互我活，
我就欲守你的嘴干證的話。
信靠耶和華的律法
119:89 耶和華啊，你的話安定佇天裡，
直到永遠。
119:90 你的誠實存到萬代；
你建立地，地就長長佇啲。
119:91 照你的定例，𪜶到今猶佇啲，
因為萬物攏是你的差用，
119:92 我若是歡喜你的律法，
就早早佇我的苦難中滅無啦！
119:93 我永永無𣍐記得你的教示，
因為你用這互我活。
119:94 我是你的，求你救我，
因為我尋你的教示。
119:95 歹人當等我，欲滅無我，
總是我欲講究你干證的話。
119:96 我看所有的完全攏是有限，
獨獨你的命令極其開闊。
疼惜耶和華的律法
119:97 我疼惜你的律法到怎樣啊！
我通日靜靜想。
119:98 你的誡命常常及我佇啲，
互我比我的對敵卡有智慧。
119:99 我比我攏總的先生卡通達，
因為我靜靜想你干證的話。
119:100 我比老人卡明白，
因為我守你的教示。
119:101 我禁我的腳一切的歹路無行，
互我通守你的話。
119:102 我無偏離你的判斷，
因為你有教示我。
119:103 你的話佇我的上腭到偌甜，
佇我的嘴比蜜卡甜！
119:104 我對你的教示得著明白，
所以我怨恨一切的邪路。
耶和華律法的光
119:105 你的話做我腳前的燈，
做我路上的光。
119:106 你公義的判斷，我曾咒誓欲遵守，
我決斷按呢行。
119:107 我受苦到極；
耶和華啊，求你照你的話互我活！
119:108 耶和華啊，求你鑑納我的嘴所歡喜獻的謳咾，
閣將你的判詞教示我！
119:109 我的生命常常抵著危險，
猶久我無𣍐記得你的律法。
119:110 歹人設羅網欲害我，
總是我無偏離你的教示。
119:111 我將你干證的話做永遠的基業，
因為這是我心內所歡喜的。
119:112 我互我的心專向你的律例，
永遠遵趁，直到路尾。
因耶和華律法得安全
119:113 二樣心的人是我所痛恨；
獨獨你的律法是我所疼惜。
119:114 你是我閃匿的所在，閣是我的盾牌；
我佇你的話有向望。
119:115 做歹的人啊，恁著離開我！
互我通守我的上帝的誡命。
119:116 求你照你的話扶持我，互我活，
亦無互我因為所向望的來見誚。
119:117 求你扶持我，我就得救，
我欲常常對重你的律例。
119:118 見若行差路離開你的律例的人，你看輕𪜶；
因為𪜶的詭詐是虛假。
119:119 世間的歹人，你攏給𪜶除去，親像渣滓；
因為按呢我疼惜你干證的話。
119:120 我因為驚畏你，我的肉就惙；
你的判斷亦互我驚惶。
遵趁耶和華的律法
119:121 我秉公行義，
求你通將我放互壓制我的人！
119:122 求你保認你的奴僕，通得著好境遇，
莫得互驕傲的人壓制我！
119:123 我因為向望你的救恩，
及你公義的話致到目睭花。
119:124 求你照你的慈愛款待你的奴僕，
將你的律例教示我。
119:125 我是你的奴僕，求你互我智慧，
互我會知你干證的話。
119:126 現今當是耶和華行代誌的時，
因為人廢無你的律法。
119:127 所以，我疼惜你的誡命贏過金，
亦贏過好金。
119:128 所以你一切的教示，萬事我攏掠做正直；
閣我怨恨一切的邪路。
欣慕遵趁耶和華的律法
119:129 你干證的話是奇妙，
所以我的心謹慎執守。
119:130 你的話一下開拆就發出光，
互戇人通達。
119:131 我開嘴直直喘，
因為我切切欣慕你的誡命。
119:132 求你越轉向我，憐憫我，
親像你平常款待許個敬愛你的名的人。
119:133 求你用你的話互我的腳步穩當，
莫容允甚麼罪惡管轄我。
119:134 求你救贖我脫離人的壓制，
我就欲守你的教示。
119:135 願你互你的面的光照你的奴僕，
閣將你的律例教示我。
119:136 我的目屎親像溪水啲流，
因為𪜶無守你的律法。
耶和華律法的公義
119:137 耶和華，你是公義的；
你的判斷亦是正直的！
119:138 你所命令干證的話是照公義極其誠實。
119:139 我的心熱，親像火燒滅我，
因為我的對敵𣍐記得你的話。
119:140 你的話鍛煉到真精，
所以你的奴僕真意愛。
119:141 我卑微，互人看輕，
總是我無𣍐記得你的教示。
119:142 你的公義是永遠的公義；
你的律法是真實。
119:143 我抵著患難憂苦，
總是你的誡命是我所歡喜的。
119:144 你干證的話永遠是公義；
求你互我智慧，我就會活。
求主解救
119:145 耶和華啊，我專心求叫你；
求你應我，我欲謹慎守你的律例。
119:146 我對你求叫，求你救我！
我就欲守你干證的話。
119:147 我趁天未光求叫你；
佇你的話我有向望。
119:148 暝時更猶未深我的目睭已經𥍉開，
因為欲靜靜想你的話。
119:149 求你照你的慈愛聽我的聲；
耶和華啊，求你將你的判斷互我會活！
119:150 慣練行歹的人迫倚來；
𪜶離開你的律法遠遠。
119:151 耶和華啊，你是近近；
你的誡命攏是真實！
119:152 我講究你干證的話，
早早已經知是你立定到永遠的。
求主幫助
119:153 求你看顧我的苦難，來牽救我，
因為我無𣍐記得你的律法。
119:154 求你給我伸冤，救贖我，
照你的話互我活。
119:155 救恩離開歹人遠遠，
因為𪜶無尋你的律例。
119:156 耶和華啊，你的慈悲是大；
求你照你的判斷互我活。
119:157 窘迫我的，抵敵我的，真多，
總是我無偏離你干證的話。
119:158 我看見奸惡的人就真厭惡，
因為𪜶無守你的話。
119:159 你看我怎樣疼惜你的教示！
耶和華啊，求你照你的慈愛互我活！
119:160 你的話的總根頭是真實；
你一切公義的判斷是永遠佇啲。
疼惜耶和華的律法
119:161 貴族無因端窘迫我，
總是我的心驚畏你的話。
119:162 我歡喜你的話，
親像人得著多多刣贏的物。
119:163 白賊話是我所痛恨所厭賤的；
你的律法是我所疼惜的。
119:164 我因為你公義的判斷逐日七擺謳咾你。
119:165 疼惜你的律法的人有大平安，
無一項會纏絆𪜶的腳。
119:166 耶和華啊，我有啲向望你的救恩，
有行你的誡命。
119:167 我的心有守你干證的話；
諸個話我盡在意愛。
119:168 我有守你的教示及你干證的話，
因為我一切所行的攏佇你的面前。
求主幫助
119:169 耶和華啊，願我求叫的聲透到你的面前，
求你照你的話賞賜我智慧。
119:170 願我懇求的話到你的面前，
求你照你的話牽救我。
119:171 願我的嘴唇發出謳咾的話，
因為你將你的律例教示我。
119:172 願我的舌唱歌謳咾你的話，
因為你一切的誡命攏是公義。
119:173 願你伸手幫助我，
因為我有揀你的教示。
119:174 耶和華啊，我切切欣慕你的救恩！
你的律法亦是我所歡喜的。
119:175 願我活啲，我的神魂就欲謳咾你！
願你的判斷幫助我！
119:176 我迷路親像拍見的羊，求你尋你的奴僕，
因為我無𣍐記得你的誡命。
上一章 下一章 [ 條列 | 表格 | 整段 ] 重新查詢
經文由台灣聖經公會提供，
不超過500節經文的使用權無須預先獲得批准，但請註明版權所屬。檢索技術與程式由
CBOL計畫提供，網站與資料庫資源由
信望愛資訊中心提供。
Fonts(Version 2024) by Open Han, Copyright (c) 2016 by UBS Open Han Bible Project. ; © 2003-2014 SIL International, all rights reserved. Provided by SIL's Non-Roman Script Initiative.
漢字字型2024版由聯合聖經公會Open Han Bible Project提供，羅馬字字型由SIL International免費授權提供，謹此致謝。使用者需遵守著作權聲明以免蹈法。